v1 Jojakimip Judap kunngiata Josijap ernerata ukiut naalakkersuiuffiisa sisamaanni Naalakkap oqaasia Jeremiamut pivoq imaalluni: v2 Mappersakkamik tigusillutit taassumunnga allakkit oqaatsit Josijap ulluini ilinnut oqaluttaleqqaarninnit ulloq manna tikillugu Israeli Judalu inuiaallu allat tamaasa pillugit ilinnut oqaaserisakka tamaasa. v3 Immaqa taava Judamiut perlussat imminnut nalliutilersaartitakka tamaasa tusarunikkit tamarmik immikkut ingerlavigisaminnit ajortunit saanniarumaarput. Taava iluanngitsuliaannik ajortuliaannillu isumakkeerfigissagaluarpakka.
v4 Jeremiap Baruki Nerijap ernera qaaqquaa, Jeremialu oqalutsillugu Barukip oqaatsit Naalakkap taassumunnga oqaaserisimasai tamaasa mappersakkamut allappai. v5 Jeremiallu Baruki oqarfigaa: »Uanga Naalakkap naalaffianut isernissamut akornuteqarpunga. v6 Illilli tassunga iserlutit Naalakkap oqaasii uanga oqalutsillunga mappersakkamut allassimasatit ullormi iisinnginniarfimmi katersorsimasunut Naalakkap naalaffianiittunut atuassavatit. Aammattaaq Judamiunut illoqarfimminnit aggersimasunut tamanut atuassavatit. v7 Immaqa taava ilungersorlutik Naalagaq qinnuigiumaarpaat, immaqalu tamarmik immikkut ingerlavigisaminnit ajortunit saanniarumaarput, kamanneq uumitsannerlu Naalakkap innuttaminut sioorasaarutigisai sualoqimmata.«
v8 Baruki Nerijap ernera pruffiitip Jeremiap peqqussutaa malilluinnarlugu iliorpoq Naalakkallu oqaasii mappersakkami allassimasut Naalakkap illuani atuarlugit.
v9 Jojakimip Judap kunngiata Josijap ernerata ukiut naalakkersuiffiisa tallimaanni qaammatit qulingiluaanni Naalakkap kiinaata saani iisinnginniarfissaq Jerusalemimiunut tamanut inunnullu Judami illoqarfinnit Jerusalemiliarsimasunut tamanut tusarliunneqarpoq. v10 Taava Barukip Jeremiap oqaasii mappersakkami allassimasut katersorsimasunut atuarpai Naalakkap naalaffiani, Gemarjap Shafanip allattuusup ernerata ineeraani isaaffittaap saniani silarlermi qullermiittumi. v11 Mikap Gemarjap ernerata Shafanip ernutaata Naalakkap oqaasii mappersakkami allassimasut atuarneqartut tusaramigit v12 kunngip illussaarsuanut aterpoq naalagaaffimmi allattuunerup inaanut, tassaniippullu naalagartat tamarmik: Naalagaaffimmi allattuuneq Elishama, Delaja Shemajap ernera, Elnatani Akborip ernera, Gemarja Shafanip ernera, Sidkija Hananjap ernera naalagartallu allat tamarmik. v13 Taakku Mikap oqaluttuuppai Baruki mappersakkami allassimasunik katersorsimasunut atuffassitillugu tusakkaminik tamanik.
v14 Taava naalagartat tamarmik Jehudi Netanjap ernera Shelemjap ernutaa Kuship ernutaqqiutaa Barukimut aallartippaat oqaqqullugit: »Allakkat imusat katersorsimasunut atuffassissutitit nassarlugit maanngarit!« Taava Barukip Nerijap ernerata allakkat imusat nassarlugit ornippai. v15 Oqarfigaat: »Ingeriarlutit atuffatsigut!« Barukillu atuffappai. v16 Tusarnaartaasali oqaatsit tamakku tamaasa tusaramikkit annilaangaqalutik imminnut isikkupput oqarlutillu: »Oqaatsit tamakku tamaasa kunngimut oqaatigisariaqarpavut.« v17 Barukilu aperaat: »Oqarfigitigut, oqaatsit taakku taanna oqalutsillugu allagaraagit?« v18 Baruki akivoq: »Jeremiap oqaatsini tamaasa uannut allattortippai, mappersakkamullu pilikkimik allappakka.« v19 Naalagartat Baruki oqarfigaat: »Isertorfissarsiorniaritsi illit Jeremialu, sumiissusersilu kimulluunniit ilisimatinnagu.«
v20 Taava mappersagaq naalagaaffimmi allattuunerup Elishamap inaanut inaaleriarlugu illussaarsuup silarlianut kunngi ornippaat tamakkuninngalu tamanik oqaluttuullugu. v21 Kunngip Jehudi aallartippaa mappersagaq naalagaaffimmi allattuunerup Elishamap inaaniittoq aasillugu, Jehudillu kunngi naalagartallu tamaasa taassuma saani qeqartut taassuminnga atuffappai. v22 Taamani – qaammatit qulingiluaanni – kunngi illumi ukiorsiortarfimmini najugaqarpoq aamalivillu saamini ikumatillugu; v23 Jehudillu allakkat ammukarneri pingasut sisamalluunniit atuareeraangagit kunngip savimmik allatsimi allaammut inngigissaataanik sissoriarlugit aamalivimmi innermut igittarpai, taamaaliortuarporlu mappersagaq tamarmi aamalivimmi innermi nungutserlugu. v24 Kunngilli nammineq kunngikkormiortaasaluunniit oqaatsit tamakku tamaasa tusaraluaramikkit annilaajallaatiginngilaat atisatilluunniit alittornagit, v25 allaammi Elnatanip Delajallu Gemarjallu mappersagaq ikuallaqqunagu qinnuigigaluarmanni kunngip tusaajumanngilai. v26 Taava kunngip Jerakme'eli kunngip ernera, Seraja Azrielip ernera Selemjalu Abde'elip ernera peqqusiffigai allattuusoq Baruki pruffiitilu Jeremia tigusareqqullugit; kisianni taakku Naalakkap isertorpai.
v27 Mappersagaq oqaatsinik Jeremiap oqaasii issuarlugit Barukip allattugaanik imalik kunngip ikuallareersimalermagu Naalakkap oqaasia Jeremiamut pivoq imaalluni: v28 »Mappersakkamik allamik tigusillutit oqaatsit mappersakkami siullermi Jojakimip Judap kunngiata ikuallagaani allassimasut tamaasa taassumunnga allakkit. v29 Taavalu Jojakimi Judap kunngia oqarfigissavat: Ima oqarpoq Naalagaq: Mappersagaq ikuallappat oqarlutillu: Sooq tassani allappit Babylonip kunngia tikiutissasoq nunalu manna aserorlugu inuillu nersutaatillu nungutillugit? v30 Taamaattumik, ima oqarpoq Naalagaq Jojakimi Judap kunngia pillugu: Kinguaavinik Daavip issiavissaarsuani issiasoqassanngilaq, timaalu toqungasoq igitaassaaq ullup kiannerani unnuallu qiianarnerani maaniinnarmiittussanngorlugu; v31 pillarumaarpakkalu taanna eqqarliilu kunngikkormiortaalu ajortuliaat pillugit, aammalu taakku Jerusalemimiullu Judamiullu perlussamik taakkununnga nalliuttussatut oqaatigisimasannik kisianni tusarumanngisaannik nalliutitsivigalugit.«
v32 Taava Jeremia mappersakkamik allamik tigusivoq taannalu allattuusumut Barukimut Nerijap erneranut tunniullugu, taassumalu oqaatsit Jeremiap oqaasiinit issuakkat mappersakkami Jojakimip Judap kunngiata ikuallagaani allassimasut tamaasa allattorpai taamaaqataannik amerlasuunik ilallugit.