v1 Israeli, saanniarumaguit,
oqarpoq Naalagaq,
taava uannut saanniarit.
Guutiliatit maajunnartut uannit peerukkit
inissaasuassanngilatit.
v2 Sallusuissut iluarnerlu naapertuilluarnerlu naqqissigalugit uppernarsaaguit:
»Ilumut uumammat Naalagaq«,
taava inuiaat allattaaq taassumannga pilluaqquneqassapput
usorsisimaarutigissallugulu.
v3 Naalagarmi Judamiunut Jerusalemimullu oqarpoq:
Orpikkat kapinartullit akornanni siaruarterinasi
nunaatissassinnik nutaanik assallatserigitsi.
v4 Kipineqartigitsi Naalakkamut
uummatissilu kipineqanngissutaat peerlugu,
ilissi Judamiut Jerusalemimiullu,
uumitsannera innertut ikualaleqqunagu
ikumaavaqqunagulu qaminneqarsinnaanani
iliornisi ajortut pillugit.
v5 Judami oqaatigisiuk Jerusalemimilu tusarliussiuk,
sulluartaammik nunami tamarmi qarlortartitsigitsi,
tamaviannguat torlulagitsi:
Ataatsimut katersuunniaritsi,
illoqarfiit pallittaalisallit qimarnguffigissavavut!
v6 Napparsiuk katinngat: Zionimut!
Isumannaatsumut inissikkiartoritsi, unikaallannasi,
Avannaanit nalliutitissagakku ajunaarnissaq,
ajorsartitaanersuaq.
v7 Løveq orpikkanit najukkaminit majuarpoq,
inuiannik toqutsisussaq aallarpoq nunagisaminit
illit nunat inoqajuitsunngortikkumallugu;
illoqarfitillu piuneerukkumallugit
inuerullugit.
v8 Taamaattumik puunik atisigitsi
kappialallusi nimaarlusilu,
Naalakkap kamangaarnera
uatsinnit qimagukkumanngimmat.
v9 Ullussami tassani, oqarpoq Naalagaq,
kunngi naalagartallu nikallorluinnassapput,
palasit amiilaammissapput
pruffiitillu oqajuissallutik annilaarnermik.
v10 Oqarpungali: Ila Guuti Naalagaq!
Inuiaat uku Jerusalemimiullu salloqittarsimavatit
ima oqaravit: »Eqqissineqassaaq!«
Sunaaffa panamit kapineqaraluttuartugut.
v11 Taamanikkut inuiaat uku Jerusalemimiullu
ima oqarfigineqarumaarput:
Anori uunartoq pitorarnialerpoq
nunamit soqanngitsumit inoqajuitsumiittumit innuttama paniata tungaanut,
karrinik teqqalatitsissutissaanngitsoq qalipakuiaatissaanngitsorlu.
v12 Tassaana anorersuaq sakkortuneroqisoq
tikiuttoq uanga peqqusinikkut.
Ilumut, uanga maanna eqqartuunniarpakka.
v13 Takuat, akeqqat aggerput nuissatut,
qamutaallu anorersuartut kaavittuliortutut,
hestii nattoralinnit sukkanerupput.
Eqqanaq uagut! Nungutitaalerpugut.
v14 Uummatit eqqiaruk ajorsusiiarlugu, Jerusalemi,
annaanneqaqqullutit!
Eqqarsaatitit ajortut
qanoq sivisutigisumik ilunni ineqartissavigit?
v15 Tutsiuppoq Danimit kalerrisaarisoq,
ajunaarnermik nalunaariartortoq Efraimip qaqqalittaanit:
v16 Inuiaat nalunaarfigisigit,
Jerusalemimut torlulaatigisiuk:
Ungusiartortut aggerput nunamit ungasissumit,
nilliallutik Judami illoqarfiit saassuppaat.
v17 Narsaammik paarsisutut illoqarfik kaajallallugu inississapput
uannut naalasseriimmat, oqarpoq Naalagaq.
v18 Inuuserisavit suliavillu
taama pineqartippaatsit;
tassa illit ajunaarnerit, qasilipporlu.
Inuuniarnarsivoq!
v19 Iluga, iluga, nallisitsivunga!
Uummatima iluata iigai,
uummatiga kassuppoq,
nipangiinnarsinnaanngilanga
tusaagakkit
sulluartaatip nipaa sorsuttullu nillianerat.
v20 Tutsiupput ajorsaqattaartuarnerit,
nuna tamarmi piuneerutitaammat.
Tupikka aserortigaapput tassanngaannaq,
tupermalu qalerai peerupput tassuuguinnaq.
v21 Qanoq sivisutigisumik katinngat isigissavara
sulluartaatillu nipaa tusaassallugu?
v22 Innuttakka sianiitsuupput,
naluaannga.
Qitornaapput sianiitsut,
paasisimasaqanngitsut.
Ajortuliorneq nalornisiginngikkaluaqaat,
ajunngitsuliornermilli paasisimasaqanngillat.
v23 Nuna takorloorpara, sunaaffali piunngilaq soqaranilu,
taamatullu aamma qilak, qaamasoqanngilarlu.
v24 Qaqqat takorloorpakka, sajuppullu;
qattorngillu tamarmik aalapput.
v25 Takorluuigaluarpunga, inoqanngilarlu,
qilaallu timmiai tamarmik teqqarsimapput.
v26 Takorluuigaluarpunga, paarnanillu naatitsiviit inoqajuitsunngorsimapput,
illoqarfiit tamarmik piuneerutitaasimapput
Naalakkap kamangaarneranit.
v27 Ima oqarpoq Naalagaq:
Nuna tamarmi inuilaanngussaaq
– kisianni suujunnarsilluinnarumanngilara –
v28 taamaattumik nuna aliasussaaq,
qilallu pavani taartuinnanngussaaq.
Oqaloreerpungami pilersaarusioreerlungalu;
peqqissimissutiginngilakka ilaginnarumanagillu.
v29 Qimussersut pisissaartullu pisorpalunnerannit
illoqarfiup inui tamarmik qimaassapput;
orpikkanut isertoriartussapput
qaqqanullu majuassallutik.
Illoqarfiit tamarmik qimagaassapput
inuerutivillutik.
v30 Illillu piuneerussaasutit taava qanoq iliussavit?
Aappallarissakkanik atukkersoraluaruit
kuultinillu pinnersaasersorlutit
isitillu tarnummik qalipallugit
pinnersaraluarnerit iluaqutigissanngilat;
angutaativit narrugalutit
toqunniassavaatsit.
v31 Nipi tusarpara soorlu ernisuttup nipaa,
pernaamminik ernilersup erloqerpalua.
Tusaasiuk! Zionip pania anertikkarpoq,
assani isatsippai:
»Eqqanaq, sapersippunga
toqutsiniartunut!«