v1 Nunami Usimi najugaqarpoq angut Jobimik atilik. Taanna angutaavoq assuarnaatsoq peqqusersuitsorlu Guutimik mianerinnittuusoq ajortumillu iliuuseqarnaveersaartuusoq. v2 Arfineq-marlunnik erneqarpoq pingasunillu paneqarluni. v3 Pigisarai savat 7.000-it, qatigattuut 3.000-it, ussigit illugiit 500-t siutituullu arnavissat 500-t inussiaaterpassuaqarlunilu. Angutini Kangiamiuni tamani pigissaarnerpaavoq.
v4 Jobip erneri nikittaallutik illuminni qassimiuaaqatigiittarput. Aamma qatanngutitik arnat pingasut qaaqqusarpaat nereqatigeqqullutik imeqatigeqqullutillu. v5 Nikittaalluni qassimiuaaqatigiinnerit qaangiukkaangata Jobip ernini qaaqqutittarpai illernarsartarlugillu. Ullaannguakkut makilluni ikikkagassanik pilliisarpoq ernini tamaasa immikkut pilliuteqartillugit, isumaliortarami: »Immaqa ernikka ajortuliorsimassapput uummatimikkullu Guuti perloqqusimallugu.« Jobi tamatigut taamaaliortarpoq.
v6 Ullut ilaanni Guutip erneri takkupput Naalakkamullu sassarlutik; Saatani aamma taakkununnga ilaavoq. v7 Naalakkap Saatani aperaa: »Sumit aggerpit?« Saatani akivoq: »Nunarsuaq angalaffigeqqissaarakku.« v8 Taava Naalakkap Saatani oqarfigaa: »Taavami kiffara Jobi arajutsisimagunanngilat. Taanna nunarsuarmi tamarmi nalissaqanngilaq assuarnaatsuullunilu peqqusersuitsuugami Guutimillu mianerinnittuulluni ajortumik iliuuseqarnaveersaartuugami.« v9 Saatanilli akivaa: »Jobimi pissutissaqarluarunarpoq Guutimik mianerinninnerminut. v10 Taanna ilaqutaalu pigisaalu tamaasa tamatigut sernissugarisimannginnerpigit? Sulinera tamaat pilluaqqusimavat, nersutaataalu amerlangaaramik nunamut tamarmut siammarsimapput. v11 Ataguli assat isatseriassagit pigisai tamaasa attorlugit, taava kiinnat toqqavillugu perloqqussagaluarpaatit!« v12 Taava Naalakkap Saatani oqarfigaa: »Pigisai tamaasa piumasannik iliorfigisinnaavatit, taannali nammineq pinerlissanngilat.« Taava Saatani Naalakkamit qimaguppoq.
v13 Ullut ilaanni Jobip erneri paniilu qatanngummik angutip angajulliup illuani nerillutillu viinnimik imertillugit v14 oqariartortoq Jobimut tikiuppoq oqarlunilu: »Ussigit assallatserummik uniartillugit siutituullu eqqaanni mangiartillugit v15 Sabamiut tikiullutik tamakku tillippaat kiffallu panamik toqullugit. Uanga aniguisutuaallunga tamatuminnga nalunaarfigiartorpakkit.« v16 Suli taanna oqalutsillugu alla tikiuppoq oqarlunilu: »Guutip innerata qilammit nakkarluni savat paarsisuilu tuffigai ikuallatsillugillu. Uanga aniguisutuaallunga tamatuminnga nalunaarfigiartorpakkit.« v17 Taama oqalutsillugu alla tikiuppoq oqarlunilu: »Kaldæamiut pingasuiullutik tikiukkamik qatigattuut saassuppaat tillillugillu paarsisuilu panamik toqullugit. Uanga aniguisutuaallunga tamatuminnga nalunaarfigiartorpakkit.« v18 Taama oqalutsillugu alla tikiuppoq oqarlunilu: »Ernitit panitillu qatanngummik angutip angajulliup illuani nerillutillu viinnimik imertillugit v19 tassanngaannaq anorersuaq inoqajuitsup tungaanit pitorarpoq. Anorip illup teqeqqui sisamat eqqormagit illu uppippoq inuusuttut nanerlugit toqullugillu. Uanga aniguisutuaallunga tamatuminnga nalunaarfigiartorpakkit.«
v20 Taava Jobi nikuippoq, qallersaatinilu alittorpaa nujaajarlunilu nujaarutivilluni. Taava ataqqinningaarluni nunamut pallorpoq
v21 oqarlunilu:
»Tamaqarnanga anaanama timaanit anigama
tamaqarnanga utissaanga!
Naalagaq tunniussigami Naalagaq tigusivoq,
Naalakkap aqqa unnersiutigineqarli.«
v22 Jobi tamakkuninnga tamanik pineqaraluarluni ajortuliunngilaq Guutilu assuarliuteqarfiginngilaa.