v1 Taava Guutip anorersuarmit Jobi oqaluffigaa:
v2 Kiaana aalajangeriigara taallertinniaraa
oqaatsinik sianiitsorpallattunik?
v3 Qiterutserit angutitut iliorlutit,
taava apersussavakkit, illillu akissavarma?
v4 Taamani uanga nuna tunngavilerakku illit sumiippit?
Silaqassuseqaqiguit tamatuminnga oqaluttuutinnga!
v5 Kia uuttuutissai aalajangerpai? – Tamannami nalugunanngilat!
Kia ussersaammik siaarsivigaa?
v6 Sukai tunngaviusut sumut manngussuunneqarpat,
kialu inissippaa ujarak teqeqqussaq
v7 ullaap ulloriai tamarmik tipaatsutsillugit
Guutillu erneri tamarmik nipertik illugalugu qiimmattartillugit?
v8 Kia imaq matorsuarnik assiaqusersorpaa
supilluni anaanami illiaanit animmat,
v9 taamani uanga nuissanik ikerinnarmiittunik atukkersorakku
nuissanullu taartunut immullugu,
v10 killiffissalerakku
isaaffilerlugulu sannerutserlugulu
v11 oqarlungalu: »Tassa killissat qaangissanngisat,
malissuatit tassunga unillit.«
v12 Illit ullaassaq saqqummeqqusimaviuk
aappilliunneralu inissaanik tikkuullugu,
v13 nunarsuaq sinarsuisigut tigoriarlugu
issuttuuteqqullugu iluaatsut issugiussorlugit?
v14 Taava nunap qalipaataa allanngortarpoq marrartut naqitsimmik naqinneqartutut,
qalipaaserneqarpoq atisassat misuttarlugit qalipanneqartarnerattut.
v15 Taamaalillutik iluaatsut qaammaqqutigisartik annaasarpaat,
taliilu silutsisimasaralui napineqarput.
v16 Illit immap puilaffii tikissimavigit
itinersuullu naqqani angalaarsimallutit?
v17 Toqup isaaffii ilinnut ersiussimappat,
takusimavigillu taartorsuup matui?
v18 Nunarsuaq isorartoqisoq qimerloorsimaviuk?
Oqaluttuutinnga qanoq angitigisoq ilisimagukku.
v19 Qaamasup inaanut sukkut aqquteqarpa,
taartorlu sumi najugaqarpa?
v20 Najugaat nalunngikkukkit taava inaannukaatikkit,
aqqutaa atuarlugu illuanukaallugu!
v21 Nalunngilammi! Taamani inunngoreersimavutit
sivisuumillu inooreersimallutit!
v22 Apummut peqqumaasivinniissimavit
nataqqornanut peqqumaasiviit takusimallugit?
v23 Tamakku uninngatittarpakka annikilliulerfissanut,
ullormut akiuuffiusussamut sorsuffiusussamullu.
v24 Sukkoorluni tikinneqartarpa qaamarngit avissaartorfiat,
kangisiup siammaaffia nunamut tamarmut?
v25 Kina qillerilluni ikerasaliorpa erngup supisup aqqutissaanik,
kia ingerlavissiorpai nuissat kallerup pilerfii –
v26 siallersitsilluni nunamut nunagineqanngitsumut,
allaat inoqajuitsumut inoqanngitsumut,
v27 taamaalilluni inoqajuitsoq naammattumik imeqalersillugu
ivikkallu naatillugit?
v28 Sialuk ataataqarnerpa?
Kanernerillu kuseriarneri kimit kinguaassiarineqarpat?
v29 Sermeq kimit erniarineqarpa,
kialu erniarai qaqornaat qilammit nakkartartut,
v30 imeq serminnguuttartoq ilerluni ujaqqatut
itinersuup toqqinnerata aalajangerfiatut.
v31 Illit Qiluttuusat qilersuutaat kalunnerit imminnut qilerussinnaavigit,
imaluunniit Siattut kalunneri qilerussaajarsinnaallugit?
v32 Ullup Malittaa nuiffissaa eqqorlugu nuitittarpiuk,
Løveq piaraalu tasissersuuttarlugit?
v33 Qilammut inatsisit ilisimavigit,
nunamut pissaanera aalajangiiffigisarpiuk?
v34 Nipit nuissanut anngutitissinnaaviuk
imersuarnit qallerneqartillutit?
v35 Innaallagissat aallarartissinnaanerpigit
ilinnut oqartillugit: Piareersimavugut?
v36 Kia timmiaq ibisi ilisimassusilersimavaa,
kialu kukkukooq angutiviaq silaqassusilerpaa?
v37 Kina ima ilisimatuujutigaa nuissat kisissinnaallugit?
Kialu imeq qilaap imertaataanit kuisarpaa
v38 issoq manngertikkaangat mattutsikkaangallu
saanngullu issoqqanngortiterluni?
v39 Illit løveq arnaviaq piniuttarpiuk?
Løvitsiaat kaattut nerisassaannik tunisarpigit
v40 pulaqqavigisartakkaminnut pulagaangata
orpikkaniluunniit qamagaangata?
v41 Kia tulugaq nerisassaanik pissittarpaa
piaraasa Guuti nilliaffigigaangassuk
isaqqilaannaleraangatalu nerisassaqarnatik?