v1 Jiisusi taama oqaloreerami ajoqersukkani ilagalugit anivoq, kuunnguarlu Kedroni ikaarlugu naatsiivimmut tamaaniittumut iserpoq ajoqersukkani ilagalugit. v2 Judasittaaq, Jiisusimik killuutiginnittup naatsiivik taanna nalunngilaa Jiisusi ajoqersukkanilu tassani naapeqatigiikkajummata. v3 Taava Judasip sakkutuut paarsisuutitat aamma palasiunerit farisiiarillu naalaffimmi nakkutilliisuutitaat ilassarsiarai; naatsiivimmukarpullu qullilisarlutik nanerussisarlutillu sakkulisarlutillu. v4 Jiisusip qanoq pineqarumaarnini tamaat ilisimareeramiuk sassarluni aperai: »Kina ujarpisiuk?« v5 Akivaat: »Jiisusi Nazaretimioq.« Jiisusip oqarfigai: »Uangaavunga.« Ilagaattaaq Judasi Jiisusimik killuutiginnittuusoq. v6 Jiisusi oqarmat: »Uangaavunga,« tunuariarput nunamullu niverlutik. v7 Taava apereqqippai: »Kina ujarpisiuk?« Akivaat: »Jiisusi Nazaretimioq.« v8 Jiisusip oqarfigai: »Uangaavunga; taamammi oqarfigereerpassi, uangalu ujagarigassinga taava ilakka uku qimagutitiinnarsigit.« v9 Taamaalillunimi oqaasia una eqquutissaaq: »Uannut tunniussannik annaasaqanngilanga.« v10 Siimuut-Petrusilli panaq nassatani amullugu palasiunerup kiffaa panarpaa talerperlermik siutaarlugu; kiffaq taanna Malkusimik ateqarpoq. v11 Jiisusi Petrusimut oqarpoq: »Panaq puuanut mangunniaruk! Ermuseq Ataatap uannut tunniussaa imissannginnerpara?«
v12 Sakkutuut paarsisuutitat sakkutuullu naalagaata aamma juutit naalaffimmi nakkutilliisuutitaasa Jiisusi tigusaraat qilersorlugulu; v13 siullermik ingerlappaat Annasimut Kajfasip ukioq taanna palasiunerusup sakianut. v14 Kajfasi taannaavoq juutinut siunnersuisoq pitsaanerunerarlugu inuiaat sinnerlugit inuk ataaseq toquppat.
v15 Siimuut-Petrusip ajoqersukkallu ilaata allap Jiisusi malippaat. Ajoqersugaq taanna palasiunermut takornartaannginnami Jiisusi palasiunerup illuata kaajaluisaanut iseqatigaa, v16 Petrusili isaaffiup silataani uniinnarpoq. Ajoqersukkap taassuma allap palasiunermut takornartaanngitsup anilluni arnaq isaaffimmik paarsisoq oqaloqatigeriarlugu Petrusi isertippaa. v17 Arnap kiffaasup isaaffimmik paarsisup Petrusi oqarfigaa: »Illit aamma angutip taassuma ajoqersugaasa ilagaatsit?« »Naagga, taakkua ilaginngilaannga,« Petrusi akivoq. v18 Kiffat naalaffimmilu nakkutilliisuutitat qisunnik aamalisanik ikumatitsipput uunnasserlutik, qiianarmat. Petrusittaaq tassani uunnasseqatigai.
v19 Taava palasiunerup Jiisusi apersorpaa ajoqersugaanik ajoqersuutaanillu. v20 Jiisusip akivaa: »Tamanut ammasumik silarsuarmut oqaluttarpunga. Tamatigut synagogini naalaffiullu silarliani juutit kikkulluunniit katersuuttarfiini ajoqersuisarpunga, isertorlungalu oqalunngisaannarpunga. v21 Sooq uanga aperaanga? Tusarnaartikka aperikkit qanoq taakkununnga oqalussimaninnik; taakkuami nalunngilaat qanoq oqaluffigisimagitsik.« v22 Jiisusi taama oqarmat naalaffimmi nakkutilliisuutitat ilaata sanianiittup isappaa oqarfigalugulu: »Palasiuneq taama akineqartarami?« v23 Jiisusip akivaa: »Eqqunngitsumik oqarsimaguma eqqunngitsuunera uppernarsaruk, eqqortuuppalli sooq taava isappinga?« v24 Taava Annasip qilersorsimasoq palasiunermut Kajfasimukaatitippaa.
v25 Taama pisoqartillugu Siimuut-Petrusi tassani uunnasserpoq. Taava oqarfigaat: »Ilaa illit aamma ajoqersugaasa ilagaatsit?« Petrusip tamanna miserratigaa oqarluni: »Naagga, ilaginngilaannga.« v26 Taava palasiunerup kiffaasa ilaat, Petrusip siutaagaata eqqarlia, oqarpoq: »Ilagalugu naatsiivimmiittutit takunnginnerpakkit!« v27 Petrusi misiaqqippoq; taamaalisorlu kukkukooq angutiviaq qarlorpoq.
v28 Jiisusi Kajfasimiit naalagaatitap illorsuanukaappaat. Tamanna pivoq ullaannguugaa. Illorsuarmukaassisut namminneq tassunga isinngillat poorskisiummik nerinissaminnut mingutsikkumanatik. v29 Pilatusip annivigai oqarfigalugillu: »Inuk una sumik unnerluutiginiarpisiuk?« v30 Akivaat: »Pinerluttuunngikkaluarpat ilinnukaassimassanngikkaluarparput.« v31 Pilatusip oqarfigai: »Taavami ilissi tiguniarsiuk inatsisisilu malillugit eqqartuullugu.« Juutit oqarput: »Uagut toqutsisinnaatitaanngilagut.« v32 Taamaalillutik Jiisusip qanoq toqunissaminik oqaasii eqquuttussanngorput.
v33 Taava Pilatusi illorsuarminut iseqqilluni Jiisusi qaaqquaa oqarfigalugulu: »Illit juutit kunngigaatsit?« v34 Jiisusi akivoq: »Isumannik taama oqarpit, allanilluunniit uanga pillunga taama oqarfigineqarsimavit?« v35 Pilatusip akivaa: »Uanga juutiunerpunga? Illinuna nammineq inuiaqativit palasiunerillu uannut pisikkaatsit. Qanoq ilioravit?« v36 Jiisusip akivaa: »Uanga naalagaaffiga silarsuarmit matumannga pinngilaq. Uanga naalagaaffiga silarsuarmit matumannga pisuugaluarpat kiffama akiuullutik illersussagaluarpaannga juutinut pisinneqaqqunanga; kisiannili naalagaaffiga silarsuarmit matumannga pinngilaq.« v37 Pilatusip oqarfigaa: »Taavami ilaa kunngiuvutit?« Jiisusip akivaa: »Soorlu oqartutit, kunngiuvunga. Taamaattumik inunngorpunga, taamaattumillu silarsuarmut pivunga sallusuissut nalunaajaassutigissallugu. Sallusuissummit pisup kialluunniit nipiga tusartarpaa.« v38 Pilatusip oqarfigaa: »Sunaana sallusuissut?«
Taama oqarami juutit annivigeqqippai oqarfigalugillu: »Uanga una pisuutinngilara. v39 Ilissinnili ileqquuvoq parnaarussat ilaata poorskimi uannit iperarneqartitaasarnera. Piumasaraasiuk juutit kunngiat ilissinnut iperagaatissagiga?« v40 Akivaat ima suaarlutik: »Taanna pinnagu, Barabbali iperaruk!« Barabba piiaasuuvoq.