v1 Sabbatip-akunnerata ulluisa siullianni, ullaaralaannguugaa suli taartoq, Maria-Magdalene ilivermut pivoq; takuaalu ujarak ilivermit peerneqarsimasoq. v2 Taava arpaannaq Siimuut-Petrusi ajoqersugarlu alla, taanna Jiisusip asasaa, ornippai oqarfigalugillu: »Naalagaq ilerfanit peersimavaat, sumullu ilisimaneraat naluarput.« v3 Taava Petrusi ajoqersugarlu alla taanna anipput ilivermukarniarlutik. v4 Arpaqatigiikkaluarlutik ajoqersugaq alla taanna Petrusimit oqilanerugami siulliulluni ilivermut annguppoq; v5 ilivermullu alakkarami takuai ilupaassiat nermutit tassaniittut, ilivermulli isinngilaq. v6 Siimuut-Petrusi kingulliulluni anngukkami ilivermut iserpoq, takuaalu tassaniittut ilupaassiat nermutit v7 annoraaminerlu Jiisusip niaquata uligisimasaa; taanna ilupaassianut nermutinut ilaanani imusimalluni immikkoorluni inissisimavoq. v8 Taava ajoqersugaq taanna alla, siulliulluni ilivermut annguttoq iserpoq; takunnillunilu upperpoq. v9 Tamannami tikillugu toqusunit makittussaaneranik oqaatsit Allakkaniittut suli paasinngilaat. v10 Taava ajoqersukkat kingumut angerlarput.
v11 Mariali ilerfup silataaniippoq qiallunilu. Suli qialluni ilivermut alakkarami v12 takuai inngilit qaqortunik atisallit marluk Jiisusip timaata inigisimasaaniittut, aappaa niaquata nalaani aappaalu isigaasa nalaanni. v13 Taakkua oqarfigaat: »Arnaq-aa, sooq qiavit?« Akivai: »Naalagara aallarussimammassuk sumullu ilisimaneraat nalugakku.« v14 Taama oqareerluni allamut qiviarami takulerpaa Jiisusi tamaani qeqartoq, naluaali Jiisusiusoq. v15 Jiisusip oqarfigaa: »Arnaq-aa, sooq qiavit? Kina ujarpiuk?« Naatsiivilerisuutikkamiuk akivaa: »Naalagaq, illit allamut nuussimagukku ilisimatinnga sumut ilinerit, aaniassagakku.« v16 »Maria!«, Jiisusip oqarfigaa. Taava Mariap qiviarlugu hebræerisut oqarfigaa: »Rabbuni!« – imaappoq: Ajoqersuisoq. v17 Jiisusip oqarfigaa: »Uninngateqinanga, suli Ataatamut pavunnannginnama; qatanngutikkali oqarfigiartukkit: Pavunnalerpungagooq uanga Ataatannut ilissilu Ataatassinnut, uanga Guutinnut ilissilu Guutissinnut.« v18 Taava Maria-Magdalenep ajoqersukkat ornillugit oqaluttuuppai Naalagaq takusimallugu taamalu oqaluffigigaani.
v19 Ulloq taanna sabbatip-akunnerata ulluisa siullianni unnukkut ajoqersukkat matut parnaarlugit inimi katisimatillugit – juutimmi annilaangagigamikkit – Jiisusi tikiuppoq akornanniilerluni oqarfigalugillu: »Eqqissigitsi!« v20 Taama oqarfigereeramigit assani saneqqanilu takutippai. Ajoqersukkat nuannaalerput Naalagaq takugamikku. v21 Jiisusip oqarfigeqqippai: »Eqqissigitsi! Soorlu Ataatap aallartikkaanga, uangattaaq aallartippassi.« v22 Taama oqareerami anersaartorfigai oqarfigalugillu: »Anersaaq Illernartoq pigilersiuk! v23 Ajortaannik isumakkeerfigisasi isumakkeerfigineqassapput, isumakkeerfigiumanngisasi isumakkeerfigineqassanngillat.«
v24 Tuuma Didymosimittaaq taaneqartartoq aqqaneq-marluk ilaat, Jiisusi tikiummat najuutinngilaq. v25 Ajoqersugaqataasa oqarfigaat: »Naalagaq takuarput.« Tuumali oqarpoq: »Assaani kikissat inikui takunngikkukkit tikeralu taakkununnga mangunngikkukku assagalu saneraanut mangunngikkukku tamanna upperilissanngilara.«
v26 Ullut arfineq-pingasunngormata ajoqersukkat kingumut katisimapput, Tuumallu ilagai. Taava Jiisusi matut parnaarsimatillugit tikiulluni akornanniilerpoq oqarfigalugillu: »Eqqissigitsi!« v27 Tuumamullu oqarpoq: »Tikit isaateriaruk, aajuku assakka; assallu isaallugu saneqqannut manguguk, uppinngitsuujunnaarlutit upperniarit.« v28 Tuuma akivoq: »Naalagara, Guutigalu!« v29 Jiisusip oqarfigaa: »Takugamma upperputit. Pilluarput takunninngikkaluarlutik uppertut.«
v30 Jiisusi aamma amerlasuunik allanik nalunaaqutiliorpoq ajoqersukkami takkuanni; tamakku mappersakkami uani allaatigineqanngillat. v31 Makkuli allattorneqarsimapput ilissinnut uppereqqullugu Jiisusi Kristusiusoq, Guutip ernera, ilissilu uppertuususi aqqagut inooqqullusi.