v1 Tamatuma kingorna juutit nalliussisaqarmata Jiisusi Jerusalemimut majuarpoq. v2 Jerusalemimi Savat Isaaffiata killingani tasiliaqarpoq hebræerisut Betesdamik atilimmik; taanna kaajallallugu sukat akornisigut tallimanik ingerlavissaligaavoq. v3 Taakkunani nalapput napparsimasorpassuit – tappiitsut nukillaarsimasullu iloqiaallu, imeq aalaterneqarsiillugu. v4 Ilaannimi Naalakkap inngilia tasiliamut aqqartarpoq imerlu aalalersittarlugu. Imeq aalalersinneqariaraangat tassunga ikeqqaartoq sumilluunniit nappaateqaraluartoq ajorunnaartarpoq. v5 Tamaani nalasut ilagaat angut ukiuni 38-ni napparsimasimasoq. v6 Jiisusip taanna takugamiuk nalunnginnamiullu sivisuumik tamaaneereersimasoq oqarfigaa: »Ajorunnaarusuppit?« v7 Napparsimasup akivaa: »Naalagaq, imeq aalalersinneqaraangat tasiliamut ikinissannut ikiortissaqarneq ajorpunga, aqqarniarusaartillungalu allap ingiareersimasarpaanga.« v8 Jiisusip oqarfigaa: »Makigit, nallaviillu tigoriarlugu angalaarniarit.« v9 Erniinnarlu angut ajorunnaarpoq, nallavinilu tigoriarlugu angalaalerpoq.
Ullorli taanna sabbataavoq; v10 taamaattumik ajorunnaarsinneqartoq juutit oqarfigaat: »Sabbataammat nallavinnik angallassinissat ajornartitaavoq.« v11 Akivai: »Uannik ajorunnaarsitsisup oqarfigaanga: Nallaviit tigoriarlugu angalaarniarit.« v12 Aperaallu: »Kinaana angut taanna ilinnut oqartoq: Nallaviit tigoriarlugu angalaarniarit?« v13 Ajorunnaarsitaasulli naluaa kinaanersoq; Jiisusimi nigortersimavoq tamaani inuppassuaqarmat. v14 Kingorna Jiisusip naalaffiup silarliani angut taanna naapikkamiuk oqarfigaa: »Maanna ajorunnaarputit; ajortulioqqinniaqinak ajornerusumik pineqaqqunak.« v15 Angutip uterluni juutit oqaluttuuppai imminik ajorunnaarsitsisoq tassaasoq Jiisusi. v16 Taamaattumik juutit Jiisusi qinugilerpaat sabbatimi ajorunnarsitsinera pillugu. v17 Jiisusilli oqarfigai: »Ataataga suliuarmat uangattaaq sulivunga.« v18 Taamaattumik juutit suli annerusumik ilungersuutigilerpaat Jiisusi toqunniarlugu sabbati unioqqutiinnarnagu oqarmattaaq Guuti ataatagalugu Guutimuttaarlu naligitilluni.
v19 Jiisusip oqarfigai: »Ilumut, ilumut oqarfigaassi: Erneq nammineerluni qanoq iliorsinnaanngivippoq, Ataatap iliuuserisai takusani kisiisa iliuuserisinnaavai. Ataatap iliuusai Erneruttaaq iliuuserisarpai. v20 Ataatammi Erneq asavaa namminerlu iliuutsiminik tamanik takutittarlugu; sulianillu suli annerusunik takutikkumaarpaa tupigusulersillusi. v21 Soorlumi Ataatap toqusut makitittarai inuuneqalersillugillu, taamatuttaaq Ernerup piumasani inuuneqalersittarpai. v22 Aamma Ataataq kimilluunniit eqqartuussisanngilaq, eqqartuussinissarli tamaat Ernermut suliarisassanngortippaa v23 tamarmik Erneq ataqqissammassuk Ataatamik ataqqinninnermissut. Ernermik ataqqinninngitsup Ataataq taassuminnga aallartitsisoq ataqqinngilaa.
v24 Ilumut, ilumut oqarfigaassi: Oqaatsinnik tusartoq uannillu aallartitsisumut uppertoq naassaanngitsumik inuuneqarpoq eqqartuunneqassananilu, toqumiilli inuunermut nuussimavoq. v25 Ilumut, ilumut oqarfigaassi: Piffissaq nalliukkumaarpoq, maannakkummi nalliussimavoq, toqusut Guutip ernerata nipaanik tusarumaarfissaat, tusartullu inuujumaarput. v26 Soorlumi Ataataq immini inuuneqartoq, taamattaaq Erneq immini inuuneqarnissaanik tunisimavaa. v27 Aamma tunivaa eqqartuussisinnaassusermik, tassaammat Inuup Ernera. v28 Tamanna tupigusuutigissanngilarsi; piffissarmi nalliukkumaarpoq ilivermiittut tamarmik taassuma nipaanik tusarumaarfissaat v29 ilivernillu aniumaarfissaat – ajunngitsumik iliorsimasut makillutik inuunissamut ajortumilli iliorsimasut makillutik eqqartuunneqarnissamut. v30 Immineerlunga iliuuseqarsinnaanngilanga; tusakkakka malillugit eqqartuussisarpunga, eqqartuussutigalu naapertuilluartuuvoq uanga piumasara pinnagu uannilli aallartitsisup piumasaa piniarakku.
v31 Imminut nalunaajaassutigiguma nalunaajaatiga atortuusinnaanngilaq. v32 Allap uanga nalunaajaatigaanga, nalunngilaralu uanga pillunga nalunaajaataa ilumoortuusoq. v33 Johannesi oqariartortitsivigaarsi, taassumalu sallusuissut nalunaajaassutigaa. v34 Imaanngikkaluarpoq inummut nalunaajaassutigitinniartunga, taamali oqarpunga annaanneqaqqullusi. v35 Johannesi tassaavoq qulleq ikumasoq, qaamasoq; qaamaneralu sivikitsumik qiimmattaatigissavarsi.
v36 Nalunaajaalli uanga pigisara Johannesip nalunaajaataanit anneruvoq, suliammi Ataatap uannut naammasseqqusaasa, suliat tamakkua suliarisama, nalunaajaatigaannga Ataatap aallartikkaanga. v37 Ataatallu uannik aallartitsisup nammineq nalunaajaassutigaanga. Ilissi nipaa tusaanngisaannarparsi oqaluttorlu inuttarsinngisaannarlugu, v38 oqaasiilu ilumiugiuaannanngilasi aallartitaa upperfiginnginnassiuk. v39 Allakkat isumasiortarpasi ilissi isumaqarassi tamakku naassaanngitsumik inuuneqaatigalugit; taakkorpiaallu uanga nalunaajaatigaannga. v40 Taamaattorli ornikkumanngilassinga inuussut piniarlugu.
v41 Nersorneqaatissara inunnit piumanngilara v42 nalunnginnakku Guutip asanninneranik ilumiugisaqanngitsusi. v43 Uffa Ataatama aqqani tikiuttunga ilissi ilassinngilassinga; allali nammineq atermini tikiuppat ilassiumassagaluarparsi. v44 Qanoq ilillusi uppersinnaassavisi nersorneqaatissaq ilissi nammineq akornassinnit pissarsiariniartarussiuk Guutituaasumilli pissarsiariniarnagu? v45 Isumaqarniaqinasi uanga Ataatamut unnerluutiginiarissi; ilissinnik unnerluutiginnittoq tassaavoq Mosesi isumalluarfigisarsi. v46 Mosesi upperisimagaluarussiuk uangattaaq upperisimassagaluarpassinga; Mosesimmi uanga allaaseraanga. v47 Taassumali allagai upperinngikkussigit qanoq ilillusi uanga oqaatsikka upperissavisigit?«