v1 Josvap Israelip naggueqatigiissortai tamaasa peqquai Sikemimi katersuuteqqullugit. Utoqqaanertat, qullersaasut, eqqartuussisut allattuusullu Guutip kiinaata saanut sassaqatigai. v2 Josvap inuit tamaasa oqarfigai: »Ima oqarpoq Naalagaq Israelikkut Guutiat: Itsaq siuaasasi kuussuup Eufratip ungataani najugaqarput, tassa Tera Aaperaap Nakorillu ataataat, guutillu allat guutisiorfigalugit. v3 Siuaasarsili Aaperaat nunamit kuussuup Eufratip ungataaniittumit aallaqquara Kana'animilu tamarmi angalaartillugu. Kinguaavi amerlasoorsuanngortippakka ernertaartillugulu Iisaamik. v4 Iisaaq ernertaartippara Jaakumik Esauimillu. Se'irip qaqqai Esauimut tunniuppakka pigisassaatut, Jaakuli erninilu Egyptenimut aallarput. v5 Mosesi Aronilu aallartippakka, Egyptenilu pillarlugu nalliutitippakka perluit, taavalu anisippassi. v6 Siuaasasi Egyptenimit anisereerakkit imarlu tikimmassuk Egyptenimiut malersorpaat qamuteqarlutik sorsuutinik sakkutooqarlutillu qimussersunik angullugillu Immami Ivissuartuumi. v7 Siuaasassi Naalagaq torlorfigaat, Naalakkallu taartoq akunnequtsiuppaa ilissinnut Egyptenimiunullu, immamullu qarsutitippai matuneqartillugit. Egyptenimiunut qanoq iliornera nammineq isissinnik takuarsi. Sivisuumik inoqajuitsumeereerassi v8 Amorikkut Jordanip kangiani najugaqartut nunaannut pisippassi. Taakkua saassuppaasi; ilissili assassinnut tunniuppakka; nunaat tigusaraarsi, siunissinnilu nungutippakka. v9 Taava Balakip Sipporip ernerata Moabip kunngiata Israelikkut saassuppai. Bileami Beorip ernera nalunaarfigiartortippaa taassumunnga perloqqoqqullusi. v10 Uangali tamanna tusarumanngilara, Bileamillu pilluaqquinnartariaqarpaasi; taamaalillungalu kunngimit Balakimit annaappassi. v11 Taava Jordani ikaarparsi Jerikomullu pillusi. Jerikop inuisa aamma Amorikkut, Perizzikkut, Kana'anikkut, Hittikkut, Girgashikkut, Hivvikkut Jebusikkullu saassuppaasi; ilissili assassinnut tunniuppakka. v12 Siunissinni ingerlatippara qanoq iliornissamik nalulerneq, tamatumalu Amorikkut kunngii aqqaneq-marluk siunissinni qimaatippai; ilissili panassinnik pisississinnillu qimaatinngilasi. v13 Nuna nammissinnik erloqillusi naggorissarsimanngisarsi ilissinnut tunniuppara, illoqarfiit ilissinnut tunniuppakka ilissi nammineq sanaarinngisasi, taakkulu najugarilerpasi; viinnequteqarfinnik olivenequteqarfinnillu ilissi nammineq ikkussugarinngisassinnik tunivassi, taakkuali inerititaat nerisaraasi.
v14 Naalagaq mianerisiuk, kiffartuussiullu ilumoorlusi unneqqarillusilu; guutit siuaasassi kuup ungataani Egyptenimilu guutisiorfigisimasaat piiarsigit, Naalagarlu guutisiorfigisiuk. v15 Guutisiorfigiumanngikkussiulli taava ullumi aalajangerniaritsi sorliit guutisiorfigiumagisi siuaasassi kuup ungataani guutisiorfigisaat imaluunniit guutit Amorikkut ilissi maanna nunagisassinni najugaqarsimagaluartut guutisiorfigisimasaat. Aamma uanga inoqutimalu Naalagaq kiffartuukkumavarput.«
v16 Taava inuit akipput: »Naalagaq tunukkumanngivipparput guutit allat guutisiorfigilerlugit. v17 Naalakkammi Guutitta uagut siuaasavullu Egyptenimit inussiaataaffigisatsinnit anisippaatigut, isigitillutalu tupinnangaartuliorpoq paaralutalu inuiaqatigiippassuit nunaat aqqusaartorlugit ingerlaarnitsinni. v18 Naalakkap inuiaqatigiippassuit taakku Amorikkullu nunami maani najugaqartut siunitsinnit peersippai. Uaguttaarlu Naalagaq guutisiorfigiumavarput, taannami Guutigaarput.«
v19 Josvap inuit oqarfigai: »Naalakkap guutisiorfiginissaa artorparsi Guutiummat illernartoq; Guutiuvoq ilungersortoq unioqqutitsinisi ajortuliasilu isumakkeerfigissanngilai. v20 Qimakkussinnili allamiut guutii kiffartuutilerlugit qanorluunniit siornatigut ajunngitsuliorfigisimatigigaluarunisi tunukkumaarpaasi pillarlusilu nungutilluinnarlusi.« v21 Israelikkut Josva akivaat: »Ilumut, Naalagaq guutisiorfigiumavarput!« v22 Josvap inuit oqarfigai: »Immissinnut ilisimannittuuffigaasi aalajangiukkassiuk Naalagaq guutisiorfigiumallugu.« Israelikkut akipput: »Taamaappoq.« v23 Josva oqarpoq: »Taava allamiut guutii ilissinniittut peersigit uummatisilu Naalakkamut Israelikkut Guutiannut saatsillugit!« v24 Inuit Josva akivaat: »Naalagaq Guuterput kiffartuukkumavarput, taannalu naalakkumavarput.«
v25 Ulloq taanna Josvap Israelikkut sinnerlugit Naalagaq angerfigeqatigaa, Sikemimilu inatsisit ileqqoreqqusallu aalajangersarpai. v26 Josvap oqaatsit taakku Guutip inatsisaasa allassimaffiannut allappai. Taava ujarassuaq orpiup egip Naalakkap illernartuutaata killinganiittup ataanut napparpaa. v27 Inunnut tamanut oqarpoq: »Ujarak taanna uatsinnut unnerluussisuussaaq; Naalakkammi uatsinnut oqaasii tamaviisa taassuma tusaasimavai; taannalu ilissinnut unnerluussisuussaaq Guutersi tunussannginnassiuk.« v28 Taava Josvap inuit aallartippai, tamaasa immikkut nunamut pissarsiaannut.
v29 Pisimasut tamakkua kingornatigut Josva Nunip ernera toquvoq 110-nik ukioqarluni. v30 Ilivaat nunami nammineq pissarsiarisaani Timnat-Serami Efraimip qaqqalittaani qaqqap Ga'aship avannaani.
v31 Israelikkut Naalagaq kiffartuuppaat Josva inuutillugu utoqqaallu Josvamit inuummersornerusut Naalakkallu Israelimut qanoq iliornerinik tamanik ilisimasut suli inuutillugit.
v32 Josefip saarngi Egyptenimiit nassarsimasatik Israelikkut ilivaat Sikemimi, nunaminermi Jaakup Sikemip ataataata Hamorip ernerinit pisiarisimasaanni, kesitanik 100-nik akilerlugu, Josefillu ernerisa pigilersimasaanni.
v33 Aamma Eleazari Aronip ernera toquvoq ilineqarlunilu Gibeami, illoqarfimmi Efraimip qaqqalittaaniittumi Pinehasimut Eleazarip erneranut tunniunneqarsimasumi.