v1 Inuit qassiinik 1.000-illit katersuummata, amerlangaaramik imminnut tullaatinngersaalerlutik, Jiisusip oqaluffigilerpai – pingaartumik ajoqersukkani saaffigalugit: »Farisiiarit seernarsaatissiaat, tassa ilumoortuusaarneq, mianersorfigisiuk. v2 Anngigisaqanngilaq saqqummertussaanngitsunik isertugaqaranilu ilisimaneqalersussaanngitsunik. v3 Taamaattumik: Taartumi oqaaserisasi qaamasumi tusarneqassapput, ineeqqanilu inunnut isussuutigisimasasi illut qaaviniit oqaluussissutigineqassapput.
v4 Ikinngutikka, oqarfigaassi: Ersigeqinasigit timimik toqutsisut kingornalu allamik iliorsinnaasarnatik. v5 Nalujunnaarsissavassi ersigisassassinnik: Ersigisiuk toqutsereerluni Anniarfimmut igitsissalluni pissaaneqartoq. Ilumut oqarfigaassi: Taanna ersigissavarsi. v6 Qupaloraarsuit tallimat skillinginik marlunnik akilersillugit tunineqartannginnerpat? Taamaattorli taakkua ilaat ataaserluunniit Guutimit puiorneqanngilaq. v7 Ilami ilissi nutsasiluunniit tamarmik kisissimapput. Erseqinasi, qupaloraarsuppassuarnit pingaarneruvusi.
v8 Oqarfigaassimi: Kinaluunniit inunnut uannik nassuerutiginnittoq Inuup Ernerata Guutip inngiliisa saavanni nassuerutigissavaa. v9 Inunnulli uannik miserratiginnittoq Guutip inngiliisa saavanni miserratigineqassaaq. v10 Kinaluunniit Inuup Erneranut assortuilluni oqaluttoq isumakkeerfigineqassaaq. Anersaamilli Illernartumik mitalliisoq isumakkeerfigineqassanngilaq. v11 Synagogini, pisortanut naalakkersuisunullu sassartinneqarussi eqqasuutigissanngilarsi qanoq sumillu illersuutissaqarnissarsi qanorlu oqarnissarsi. v12 Taamaalippammi Anersaap Illernartup oqaasissassinnik ajoqersorumaarpaasi.«
v13 Inuit ilaat Jiisusimut oqarpoq: »Ajoqersuisoq, qatanngutiga oqarfigiuk kingornussassatsinnik aviffigissagaanga.« v14 Akivorli: »Inungaa, kia ilissinnut eqqartuussisunngortillungalu kingornussassanik agguaasussanngortikkaminga?« v15 Inuillu oqarfigai: »Sissueritsi mianersorlusilu piumatussusermut sumulluunniit, inuummi inuuneranut aalajangiisuunngilaq sumik pigisaqarnera naammattorsuarnilluunniit pigisaqaraluaruni.« v16 Assersuummillu oqaluttuuppai: »Inoqarpoq pisuumik narsaatiminit pissarsilluarsimaqisumik. v17 Taanna qamuuna eqqarsarpoq: Qanoq iliussaanga? Naatitat katersugassakka inissaqartinngilakka. v18 Taava oqarpoq: Ima iliussaanga: Quikka ingutsissavakka anginerusunillu sanallunga, taakkununngalu karriutikka tamaasa pigisakkalu tamaasa katersussavakka. v19 Imminullu oqarfigissaanga: Uumaangaa, perpassuaqarputit ukiorpassuarnut naammattunik. Eqqasuutaarupputit, nerillutillu imerniarit inuulluataarlutillu! v20 Guutilli oqarfigaa: Sianiitsutit, unnuaru tarnit ilinnit qaaqquneqassaaq. Kiammi taava katersugarpassuatit pissavai? v21 Taama pisarpoq pisuussutinik katersisoq Guutimili pisuujunani.«
v22 Ajoqersukkaminut oqarpoq: »Taamaattumik oqarfigaassi: Inuuneq isumakuluutigeqinasiuk, suna nerissagissi imaluunniit timissigut suna atissagissi. v23 Tassami inuuneq nerisassaqarnermit pingaarneruvoq, timilu atisassaqarnermit. v24 Tulukkat maluginiarsigit, siaruarterinatillu katersuinngillat, pissamaasiveqaratillu queqanngillat, Guutillu nerisassittarpai. Ilissi timmissanit pingaarnerungaarpusi! v25 Kiammi arlassi isumakuluuteqarnermigut ullut inuuffigisassani ullormik ataatsimik ilasinnaanerpai? v26 Tassami minnerpaannguarluunniit saperassiuk taava sullusi allat isumakuluutigissavisigit? v27 Malugeriarsigit naasut liljat qanoq naajartortartut; sulisanngillat qissisarnatilluunniit. Oqarfigaassili: Salomoluunniit alutornangaarsutsimini taakkua ilaattut atisitinneqanngilaq. v28 Guutip ivikkat ullumi narsaammiittut aqagulu kissarsuummut qissiussassat taama atisitikkamigit ilissi annerungaartumik pissannginnerpaasi, uppernikitsusi! v29 Ilissi nerisassaqarnissarsi imigassaqarnissarsilu eqqarsaatigeqinasigit, ernumaqinasilu. v30 Tamakku tamaasa Guutimik nalusut silarsuarmiittut noqqaassutigisarpaat, ataatassili nalunngilaa tamakku pisariaqartikkisi. v31 Kisianni naalagaaffia noqqaassutiginiarsiuk, taava tamakku ilanngullugit ilissinnut tunniunneqarumaarput.
v32 Erseqinasi savarpannguususi ukorsii; Ataatarsimi aalajangiisimavoq Naalagaaffik ilissinnut tunniukkumallugu. v33 Pigisasi akigisigit piitsunullu tunissutinik tunissuteqarlusi. Pissarsiniaritsi aningaasivinnik nungullassanngitsunik, qilanni erlinnartuutinik nungussanngitsunik, tillinniat inugaannik qillaalaallu aserussanngisaannik. v34 Uummatissimi erlinnartuutisi najortuartarpaat.
v35 Qiterusersimassaasi qullisilu ikumatillugit, v36 assiginiarsigillu inuit naalakkamik katittorsiortunit angerlarnissaanik utaqqisut tikiulluni kasuttorpat erniinnaq mappiussinnaajumallugu. v37 Pilluarput kiffat eqqumatillugit naalagaata tikitai! Ilumut ilissi oqarfigaassi: Qiteruserluni nerrivimmut inississavai namminerlu saqqillugit. v38 Pigaarfiit aappaanni pingajuanniluunniit tikiukkaluarpat – pilluarput eqqumatillutik tikinneqartut. v39 Nalunngilarsimi illumi ittuusup tillinniap nalunaaquttap akunnerani sumi tikiunnissaa nalunngikkuniuk taava illuminut nakuuserluni isertoqarnissaa akornusissagaa. v40 Ilississaaq piareersimassaasi, Inuup Ernera piffissakkut ilimaginngisassigut tikiutissammat.«
v41 Petrusip aperaa: »Naalagaq, uagununa assersuummi tassani pigitsigut – imaluunniit kikkulluunniit tamaasa pivigit?« v42 Naalagaq akivoq: »Kinaavami pilittaasoq ilumoortoq silatoorlu naalagaata kiffaminut nerisassanik tunniussisaqqusaa piffissaq eqqorlugu? v43 Pilluarpoq kiffaq taanna naalagaata taamaaliortillugu tikitaa. v44 Ilumut oqarfigaassi: Pigisaminut tamanut paarsisunngortissavaa. v45 Kiffarli taanna ima isumaliorpat: Naalagara mululerpoq! taavalu kiffat angutit arnallu tamaasa unatalerlugit nerilluni imerlunilu aalakoorluni, v46 taava kiffap taassuma naalagaa ullormi ilimasunngiffiani nalunaaquttap-akunneranilu nalusaani tikiutissaaq toqussallugulu ilumuunngitsut atugarisaannik pineqartillugu. v47 Kiffaq taanna naalakkami piumasaa nalunngikkaluarlugu tamanna malillugu iliuuseqarsimanngitsoq piareersarsimananiluunniit peqqaannagu unatarneqassaaq. v48 Kiffarli tamatuminnga sianigisaqarnani pillaateqartariaqartumik iliuuseqarsimasoq annikitsuinnarmik unatarneqassaaq. Kinaluunniit angisuumik tunineqarsimasoq angisuumik piumaffigineqassaaq. Kinalu angisuumik paarisassaqartitaasoq suli annerusumik piumaffigineqassaaq.
v49 Innermik nunamut nalussiartorpunga, ikumallualereeqqugaluaqaaralu! v50 Kisiannili kuissummik kuineqassaanga, nanertuutigiuassavaralu naammassineqareerserlugu. v51 Isumaqarpisi tikiuttunga nunarsuarmi eqqissisitsiartorlunga? Taamaanngilaq, eqqissisitsiartunngilanga, kisianni akerleriilersitsiartorpunga. v52 Maannamiit illoqatigiit tallimaasut akerleriilissapput, pingasut marluk akerleralugit, marlullu pingasut, v53 akerleriissapput ataataq erninilu, erneq ataatanilu, anaanaq paninilu, panik anaananilu, saki arnaq ukussanilu, ukuarlu sakinilu arnaq.«
v54 Inunnuttaaq oqarpoq: »Nuiaq kitaanit majortoq takugaangassiuk oqapallattaraasi: Siallilissaaq! taamaalisaraarlu. v55 Kujataaniillu anorleraangat oqararaasi: Kiatsissaaq! taamaalisaraarlu. v56 Ilumoortuusaartusi ukorsii, nunap qilaallu isikkui nassuiaatissaqartittarpasi; soormiuna ullut makku nassuiassallugit sapertusi? v57 Soormi ilissi nammineq misilittakkasi tunngavigalugit paasinianngilisiuk suna eqqortuusoq? v58 Akerlerisat ilagalugu pisortanukartillutit aqqutaani sapinngisannik isumaqatiginiarniaruk, taamaaliunngikkuit pinngitsaalillutit eqqartuussisumukaateqinammatit eqqartuussisullu tunniussinnaammatit parnaarussanik paarsisumut, taassumalu aamma parnaarussivimmut pisissinnaammatit. v59 Oqarfigaakkit: Tassannga iperagaassanngilatit aningaasannguaq akiligassavit nunngutaat akilereertinnagu.«