v1 Allarpassuit misilereersimammassuk akornatsinni pisimasut allaaseralugit v2 aallaqqaataaniilli isiginnittuusunit oqaatsimullu kiffaasunit uatsinnut kingornunneqartitaanerat malillugu, v3 taava uangattaaq aalajangersimavunga tamaasa aallaqqaataanniilli sukumiisumik misissorniarlugit tulleriiaarlugillu allaaseriniarlugit ilinnut, Theofilusi ataqqinangaartutit, v4 ilisimaqqullugu ilinnut ajoqersuutigineqartut qanoq tatiginartigissusiat.
v5 Taamani, Herodesi juutit nunaanni kunngiutillugu palasit sinnerseraattoqatigiit Abiakkut ilaqarput palasimik Zakariamik atilimmik. Nulia Aronimit naggueqarpoq Elisabethimillu ateqarluni. v6 Taakku tamarmik Guutip takkuani iluartuupput assuarnaatsumik inuullutik Naalakkap inassutai ileqqoreqqusaalu maleruarlugit, v7 qitornaatsuuppulli Elisabethi ernisuitsuummat, tamarmillu utoqqalereersimaqaat.
v8 Taava Zakaria Guutip saani palasitut kiffartuussitilluni, tassa sinnerseraattoqatigiit ilaasuuffigisami suliffissaat nalliussimammat, v9 palasit akornanni ileqquusoq malillugu immeraannermi eqqugaavoq Naalakkap naalaffianut iserluni tipigissaatilliisussatut. v10 Tipigissaatilliitillugu inuit tamarmik silataaniipput qinullutillu. v11 Taava Naalakkap inngiliata Zakaria saqqummerfigaa pilliiviup tipigissaatilliiffiup talerpiatungaani qeqarluni. v12 Zakariap inngili takugamiuk annilaaqaaq ersilerlunilu. v13 Inngililli oqarfigaa: »Erseqinak, Zakaria! Qinnutit tusarneqarpoq. Nuliavit Elisabethip ernertaatissavaatit, taannalu Johannesimik atsissavat. v14 Ilinnut tipaatsuutaallunilu nuannaarutaassaaq, inunngorneralu amerlasuut nuannaarutigissavaat, v15 Naalakkammi saani angisuunngussaaq; viinnimik immiamillu imissanngilaq; anaanami timaata iluaniitillunili Anersaamik Illernartumik ilumiulerneqassaaq, v16 Israelillu qitornai amerlasuut Naalakkamut, Guutiannut, utertissavai. v17 Naalakkap siulerissavaa taanna Eliatut anersaaqartoq pissaaneqartorlu angajoqqaat uummataat qitornaannut saatsissallugit naalasseriitsullu iluartutut siuneqalersillugit Naalagarlu innuttassarsissallugu piareersarsimasunik.«
v18 Zakaria inngilimut oqarpoq: »Qanoq ilillunga tamatuma eqqortuunera ilisimasinnaavara? Uangami nammineq utoqqaavunga, nuliaralu aamma utoqqalereeqaaq.« v19 Inngilip akivaa: »Gabrieliuvunga Guutip kiinaata saaniittuusoq; aallartitaavunga oqaluuteqqullutit nalunaarummillu nuannersumik tamatuminnga nalunaarfigeqqullutit. v20 Maannali oqajuitsunngussaatit oqalussinnaassanallu ulloq taama pisoqarfissaa nalliutserlugu, oqaatsikka piffissaq nalliuppat eqquuttussat upperinnginnakkit.«
v21 Taamaatillugu inuit Zakariamik utaqqisut tupigaat naalaffimmiinnera sivitsormat. v22 Anigami oqalussinnaanngimmat paasivaat naalaffimmi takusaqarsimasoq; ussersorfigiinnartariaqarpai oqajuerluinnarsimagami. v23 Ullut suliffissani naammatsimmata angerlarpoq. v24 Kingunerileraa nulia Elisabethi naartulerpoq, qaammatinilu tallimani allanut takutinngilaq, eqqarsarporli: v25 »Naalakkap taama pivaanga ulluni taakkunani, isumagigaminga peerlugulu inunni narrunarsagaanera.«
v26 Elisabethip naartulluni qaammatit arfinilinngormagit inngili Gabrieli Guutimit aallartinneqarpoq Galilæami illoqarfimmut Nazaretimik atilimmut, v27 niviarsiamut Mariamut Josefip eqqarleriit Daavikkut ilaata nuliassaanut. v28 Inngilip iserfigaa ilassillugulu ima oqarluni: »Naalakkap najorpaatit saammaassaasutit uumaa!« v29 Oqaatsit taakku Mariap annilaarutigeqai isumaliutigalugulu ilassinnissut tamanna qanoq isumaqarnersoq. v30 Taava inngilip oqarfigaa: »Erseqinak, Maria! Guutimut saammaannarsivutit. v31 Naartulissaatit ernertaassallutillu, taannalu Jiisusimik atsissavat. v32 Pingaartorsuanngussaaq Qutsinnerussaartullu erneranik taaneqassalluni, Guutillu Naalakkap tunissavaa ataataata Daavip issiavissaarsuanik; v33 Jaakukkunnut kunngiussaaq naassaanngitsumik, naalagaassusialu atajuaannassaaq.« v34 Maria inngilimut oqarpoq: »Qanoq ililluni tamanna pissava? Angummimmi ilaqarsimanngilanga.« v35 Inngilip akivaa: »Anersaaq Illernartoq ilinnut piumaarpoq, Qutsinnerussaartullu pissaanerata ulikkumaarpaatit. Taamaattumik meeraq erniusussaq taaneqassaaq Illernartumik, Guutip erneranik. v36 Aammattaaq Elisabethi eqqarlit ernertaartussaavoq utoqqalinermini. Taassuma ernisuitsuuneragaasup naartulluni maanna qaammatit arfinilinngorpai; v37 Guutimummi sumik ajornartoqanngilaq.« v38 Taava Maria oqarpoq: »Naalakkap kiffaraanga. Oqaatsisit malillugit pineqarlanga.« Inngilillu qimappaa.
v39 Kingunerileraa Maria aallarpoq tuaviinnarlu illoqarfimmukarluni Judæap qaqqalittaaniittumut; v40 Zakariap illuanut iserami Elisabethi ilassivaa. v41 Elisabethip Mariap ilassinnissutaa tusaraalu ilumiua pikeriarpoq, Elisabethilu Anersaamik Illernartumik ilumiulerneqarpoq v42 nipituumillu nillerluni: »Arnat akornanni pilluaqqusaavutit, ilumiullu pilluaqqusaavoq! v43 Qanoq-una iliorsimagama Naalakkama anaanaanit orninneqartunga. v44 Ilassinnissutit uanga siutinnut anngummat meeraq ilumiora tipaatsunnermik pikeriarpoq. v45 Pilluarpoq una uppertoq, Naalakkap taassumunnga oqaatigisai naammassineqartussaammata.«
v46 Taava Maria oqarpoq:
Tarnima Naalagaq naalannartippaa
v47 anersaamalu qiimmattaatigaa Guuti, annaassisiga!
v48 Kiffani nikanartoq qiviarpaa.
Maannamiit eqqarleriit tamarmik pilluarnerassavaannga,
v49 Pissaasup malunnangaartuliorfigimmanga.
Illernarpoq taassuma aqqa,
v50 mianerinnitsiminullu nallittuinera
atajuarpoq kinguaariikkuutaani.
v51 Talerminik malunnangaartuliorpoq,
uummatimikkut makitasuut avissaartortippai;
v52 pissarsuit peersippai issiavissaarsuinit,
nikanartullu akitsisillugit;
v53 kaattut qaarsillartippai tunissutinik ajunngitsunik
pisuullu qimagutitillugit soqartinnagit.
v54 Kiffani Israeli isumagaa,
v55 eqqaamavaalu nallittuiumanini
– neriorsuutini siuaasatsinnut –
Aaperaamut kinguaavinullu, naassaanngitsumik.
v56 Maria qaammatit pingasut missiliorlugit tassaneereerami angerlarpoq.
v57 Taava Elisabethip ernivissaa nallerpoq, ernertaarporlu. v58 Eqqaamiuisa eqqarliisalu tusarpaat Naalakkap qanoq atsigisumik nallittorsimagaa, nuannaaqatigaallu. v59 Ullut arfineq-pingajussaanni nukappiaraq kipineqartikkiartorpaat, Zakariamillu atserniaraluarpaat ataataa atsiullugu. v60 Taava anaanaa oqarpoq: »Naagga, Johannesimik ateqassaaq.« v61 Oqarfigaalli: »Illit eqqarlinni taama ateqartoqanngilaq;« v62 ataataalu ussersorfigalugu aperaat nukappiaraq qanoq ateqaqquneraa. v63 Zakaria allaffissiamik tuneqqoriarluni tassunga allappoq: »Johannesi ateraa.« Tamarmillu tupigusupput. v64 Taamaalisorlu qarna oqaalu iluarsipput oqalulerporlu Guutilu unnersiutigalugu. v65 Eqqaanni najugaqartut tamarmik ersilerput, Judæallu qaqqalittaani tamarmi pisimasut tamakku oqaluuserineqarput. v66 Tusartullu tamarmik tamakku uummammiuliuppaat oqarlutik: »Nukappiaraq taanna sunngorumaarpami-taava?« Naalakkammi assaata najorpaa.
v67 Ataataa Zakaria Anersaamik Illernartumik ilumioqangaalerpoq siulittuilerlunilu:
v68 Unnersiutigineqarli Naalagaq, Israelip Guutia,
innuttani tikeraarmagit aniguisillugillu
v69 naalersitsivigimmatigullu nassummik annassummik
kiffami Daavip kinguaavini,
v70 soorlu qangali oqalussimasoq
pruffiitimigut illernartutigut:
v71 Annaakkumalluta akeqqatsinnit
uumissortitsinnillu tamanit,
v72 siuaasavut nallittorumallugit
eqqaamallugulu angerutsi illernartoq
v73 ataatatsinnut Aaperaamut uppernarsaatini:
v74 Akeqqatsinnit aniguisitaalluta
ersiornata kiffartorfigissagitsinni
v75 upperluarluta iluartuullutalu
kiinnami saani ullussavut naallugit.
v76 Illillu, naalungiaq-aa, Qutsinnerussaartup pruffiitianik taaneqassaatit,
Naalakkap siornagut ingerlassagavit aqqutissiuullugulu
v77 innuttaalu illit ilisimatissagakkit annaanneqarnissamik
– ajortaasa isumakkiigaanerannik –
v78 Guutitta nallittuingaarnera pissutigalugu,
tassuuna seqernup pavannga nuiffigiumammatigut
v79 qaammarsarumallugit taarsiortut toqullu taartitaani ittut,
isikkavullu ingerlatikkumallugit eqqissinermut aqqutaasumut.
v80 Nukappiaraq alliartorpoq anersaakkullu pissatsitaalluni, inoqajuitsumiipporlu ulloq Israelikkunni sulilerfissani tikillugu.