v1 Jiisusi-Kristusimik Guutip erneranik iivangkiiliup aallaqqaataa.
v2 Soorlu pruffiitip Esajap allagaani allassimasoq:
Takuat, inngiliga illit siunikkut aallartippara,
taassuma aqqutissat iluarsassavaa.
v3 Inoqajuitsumi suaartoqarpoq:
Naalakkap aqqutissaa iluarsarsiuk,
aqqusininnguit ingerlavissai nalimmatsersigit!
v4 – taamatut Johannesi Kuisisoq inoqajuitsumi saqqummerpoq oqaluussissutigalugulu kuissut allamik isumataaqqussut ajortit isumakkeerneqaatissaannik.
v5 Judæamiut Jerusalemimiullu tamarmik ornippaat, kuussuarmilu Jordanimi taassumunnga kuisipput ajortitik anngiiaatigalugit.
v6 Johannesi atisaqarpoq qatigattuup meqquinik sanaamik qiteruteqarlunilu amiusumik, inuussutigaalu pillertat tungusunnitsuullu nunaannarmi nassaaq.
v7 Imalu oqaluussivoq: »Kingunikkut tikiutissaaq uannit nakuunerusoq, uangalu qinngaqquppunga peqillunga singii qilerussaassallugit.
v8 Uanga imermik kuivassi, taassumali Anersaamik Illernartumik kuissavaasi.«
v9 Ulluni taakkunani Jiisusi Nazaretimit Galilæamiittumit tikiuppoq Jordanimilu Johannesimut kuisilluni. v10 Imermit qaqillunilu takuaa qilaat qupisut Anersaallu tuisut illuni aqqarfigigaani; v11 nipilu qilannit tutsiuppoq: »Illit tassaavutit ernera asasara, nuannarisaraakkit!«
v12 Erniinnaq Anersaap inoqajuitsumut aallartippaa. v13 Ullunilu 40-ni inoqajuitsumiippoq Saatanimillu usserneqarluni; nersutit nujuartat akornanniippoq, inngilillu kiffartorfigaat.
v14 Johannesi parnaarussivimmut pisinneqareersoq Jiisusi Galilæamut pivoq Guutillu iivangkiiliua oqaluussissutigalugu v15 oqarluni: »Piffissaq nalliuppoq, Guutillu naalagaaffia qanillivoq; allamik isumataaritsi, iivangkiiliulu upperisiuk!«
v16 Jiisusi Galilæap Tasersuata sinaagut ingerlagami takuai Siimuut taassumalu qatanngutaa Andreasi tasersuarmi qassusersortut, aalisartuugamimmi. v17 Jiisusip oqarfigai: »Qaallusi malissinga, taava inunnik aalisartunngortissavassi.« v18 Erniinnarlu qassutitik ilaginnaannarlugit malippaat. v19 Ingerlaqqitsiarami takuai Jaaku Zebedæusip ernera qatanngutaalu Johannesi umiatsiaami qassutitik passukkaat. v20 Erniinnaq qaaqquai; ataatartillu Zebedæusi sulisitatillu umiatsiaamiittut qimaannarlugit malippaat.
v21 Taava Kapernaumimut pipput. Sabbati nalliummat erniinnaq synagogimut iserpoq ajoqersuillunilu. v22 Ajoqersuutaalu tupigusuutigingaarpaat naalattariaqartutut ajoqersormatik allakkanik ilisimasutut pinnani.
v23 Taamanerpiaq synagogianniippoq angut minguttuumik anersaalik, taannalu nilliavoq: v24 »Illit sussagatsigut, Jiisusi Nazaretimioq! Tikiuppit suujunnaarsikkumalluta? Kinaasutit nalunngilara: Guutip illernartua!« v25 Jiisusilli anersaaq avoqqaaraa oqarlunilu: »Nipangerit, taassumanngalu anigit!« v26 Anersaallu minguttuup nutsuppaa, nillerujussuarlunilu taassumannga anivoq. v27 Tamarmik annilaangaaramik ataatsikkut oqallisilerput oqarlutik: »Tamanna sunaana? Ajoqersuut nutaaq naalattariaqartoq! Allaat anersaat minguttuut naalakkermatik naalappaat!« v28 Galilæamilu tamarmi erniinnaq tusaamaneqalerpoq.
v29 Synagogimit anigamik erniinnaq Siimuup Andreasillu illuannut iserput Jaaku Johannesilu ilagalugit. v30 Siimuup sakia arnaq kissarneqarluni nalavoq, erniinnarlu Jiisusi tamatuminnga oqaluttuuppaat. v31 Taava ornillugu assaatigut tiguaa makitillugulu, erniinnarlu kissarneerukkami saqqippai.
v32 Unnummat seqinerlu tarrereermat napparsimasut anersaapilullillu tamaasa taassumunngaappaat, v33 illoqarfiullu inui tamarmik matup silataani katersuupput. v34 Assigiinngitsunik nappaateqartut amerlasuut ajorunnaarsippai anersaapiluittaarlu amerlasuut anisillugit; anersaapiluillu oqaaseqaqqunngilai, kinaaninimi nalunngimmassuk.
v35 Ullaaralaannguaq suli taartoq Jiisusi makippoq, inoqanngitsumukarporlu tassanilu qinulluni. v36 Siimuup ilaasalu tuaviinnaq malippaat, v37 nanigamikkulu oqarfigaat: »Tamarmik ujarpaatsit.« v38 Oqarfigaali: »Allanukarta, illoqarfeeqqanut matuma eqqaaniittunut, taakkunanissaaq oqaluussisinnaaniassagama; tamanna pillugu aallarpunga.« v39 Taava angalaarpoq synagogiinilu Galilæa tamakkerlugu oqaluussisarluni anersaapilunnillu anisitsisarluni.
v40 Taava pupissoq Jiisusimut pivoq; seeqqumiarfigalugulu qinnuigaa oqarluni: »Piumaguit mingukkunnaarsissinnaavarma.« v41 Jiisusip naakkitsaateqigamiuk assani isatsillugu attorpaa oqarfigalugulu: »Piumavunga, mingukkunnaarit!« v42 Erniinnarlu pupinnerata qimappaa, mingukkunnaarporlu. v43 Jiisusip sukangasumik oqaluffigaa erniinnarlu aallartillugu v44 oqarfigalugulu: »Kimulluunniit oqaatiginiaqinagu; palasimulli takutikkiartorit, mingukkunnaarnerillu pillugu Mosesip pilliutissatut aalajangersimasai pilliutigikkit inunnut uppernarsaatitut.« v45 Qimagukkamili angutip taassuma piniataaqaluni tamaginni oqaaseq oqaluussissutigilerpaa Jiisusi tamanut saqqumisumik illoqarfimmut sumulluunniit isersinnaajunnaarsillugu avataanili inoqanngitsumiittariaqalersillugu. Taamaakkaluartoq inuit tamanit ornigartuarpaat.