v1 Taama oqaloreerami Jiisusi Galilæa qimallugu Judæamukarpoq nuna Jordanip kangianiittoq aqqutigalugu. v2 Inuppassuillu malippaat, tassanilu ajorunnaarsippai.
v3 Farisiiarinik Jiisusimut tikiuttoqarpoq, misilinniarlugulu aperipput: »Angut suugaluartumilluunniit patsiseqarluni nuliaminit avissinnaatitaava?« v4 Akivorlu oqarluni: »Atuarsimanngilisiuk pileqqaarneranniit Pinngortitsisup angut arnarlu pinngortikkai v5 oqarlunilu: ›Tamanna pillugu angutip ataatani anaananilu qimassavai nulianilu attavigalugu, taakkulu marluk uininngussapput ataaseq‹? v6 Taamaattumik marluujunnaarlutik uiniulissapput ataaseq. Guutimmi ataqatigiilersitai inuup avissaartissanngilai.« v7 Aperaallu: »Soormi Mosesip angut peqquaa avikkuni nuliani allakkanik avissutinik tunissagaa?« v8 Oqarfigaali: »Uummatissi manngernersuat pissutigalugu Mosesip nuliassinnit avissinnaatippaasi; pileqqaarneranniimmi taamaanngikkaluarpoq. v9 Oqarfigaassimi: Kinguaassiuutitigut inuunerlunnerunngitsumik peqquteqarluni avittoq allamillu nuliartoq allasiorpoq.« v10 Ajoqersugaasalu Jiisusi oqarfigaat: »Angutip arnamut pissuserisai taamaappata pitsaanerussaaq aappaninngikkaanni.« v11 Jiisusilli oqarfigai: »Tamanna tamarmik pinnatik paasinnissinnaanermik tunineqartut kisimik paasisinnaavaat. v12 Ilaat ilumiuunerminniilli angutaassuseqanngereerput, ilaat angutaassuseqanngillat inunnit angutaassusiiagaallutik, ilaallu imminnik angutaassuseerutissimapput Qilaap Naalagaaffia pillugu. Paasinnissinnaasup paasiliuk!«
v13 Taava meerannguit Jiisusimukaappaat assamminik pateqqullugit qinnuteqqullugillu. Ajoqersukkalli avoqqaaraat. v14 Jiisusili oqarpoq: »Meerannguit uannut orniguttut akornuseqinasigit, taakkuami Qilaap Naalagaaffia pigaat.« v15 Assamminillu patippai qimagullunilu.
v16 Taava Jiisusimut orniguttoqarpoq aperalugulu: »Ajoqersuisoq, ajunngitsumik sumik iliussaanga inuuneq naassaanngitsoq pigilerumallugu?« v17 Akivaa: »Sooq ajunngitsoq pillugu uanga aperaanga? Ataaseq kisimi ajunngitsuuvoq. Inuunermullu iserumaguit inassutit maleruakkit.« v18 Aperivaa: »Suut?« Jiisusip akivaa: » ›Inuassanngilatit, allasiussanngilatit, tillissanngilatit, sallullutit nalunaajaassanngilatit, v19 ataatat anaanallu ataqqikkit‹ aamma: ›Tullit ilittut asassavat.‹ « v20 Angut inuusuttoq oqarpoq: »Tamakku tamaasa maleruareerpakka. Taavami suna amigaatigaara?« v21 Jiisusip oqarfigaa: »Iluarluinnarumaguit pigisatit tamaasa akigiartukkit piitsunullu tunniullugit, taava qilanni pisuussuteqalerumaarputit; qaallutillu malinnga!« v22 Angutip inuusuttup akissutaa tamanna tusaramiuk aliasulluni qimaguppoq, pisoorsuugamimi.
v23 Jiisusip ajoqersukkani oqarfigai: »Ilumut oqarfigaassi: Pisuumut Qilaap naalagaaffianut isernissaq ajornakusooqaaq. v24 Oqarfigaassimi: Qatigattuumut meqqutip isaatigut putoqqunnissaq pisuup Guutip naalagaaffianut isernissaanit ajornannginneruvoq.« v25 Ajoqersukkat tamanna tusaramikku annilaangaarput oqarlutillu: »Taavami kina annassinnaava?« v26 Jiisusilli qiviarlugit oqarfigai: »Inunnut tamanna ajornaqaaq, Guutimulli ajornartoqanngilaq.«
v27 Taava Petrusi pilerpoq oqarluni: »Takuat, uagut suut tamaasa qimallugit malippatsigit; sunami taava pisassaraarput?« v28 Jiisusip oqarfigai: »Ilumut oqarfigaassi: Ernioqqissitaaffimmi Inuup Ernera naalannassutsimi issiavissaarsuanut ingippat, taava ilississaaq uannik malinnittusi issiavissaarsuarni aqqaneq-marlunni issiajumaarpusi Israelip naggueqatigiissortai aqqaneq-marluusut eqqartuullugit. v29 Kinaluunniit illuminik, qatanngutiminik angutinik arnanillu, ataataminik anaanaminillu, qitornaminik narsaamminilluunniit atera pillugu qimatsisimasoq pissarseqqissaaq 100-riaammik inuunerlu naassaanngitsoq kingornutissallugu. v30 Amerlaqisulli siulliugaluartut kingullinngussapput kingulliugaluartullu siullinngussallutik.