v1 Tamakku tamaasa oqaaserereeramigit Jiisusi ajoqersukkaminut oqarpoq: v2 »Nalunngilarsi ullut marluk qaangiuppata poorski nalliutissasoq. Taava Inuup Ernera tunniunneqassaaq sanningasulimmut kikiattorneqassalluni.«
v3 Taamani palasiunerit inuillu utoqqaanertaat palasiunerup Kajfasimik atillup illuata kaajaluisaani katersuupput, v4 isumaqatigiissutigaallu peqqusersusaarlutik Jiisusi tigusariumallugu toqukkumallugulu. v5 Oqarpulli: »Nalliussinerup nalaani pinnata, inuit eqqissisimajunnaaqinapput.«
v6 Jiisusi Betaniami Siimuup Pupissup illuaniitillugu v7 arnap ornippaa qummuattannguaq alabastiusoq uuliamik akisoorsuarmik ulikkaartoq nassarlugu, Jiisusilu nerrivimmiitillugu uulia niaquanut kuivaa. v8 Ajoqersukkat tamanna takugamikku kamalerput oqarlutillu: »Sooq taama kuilussinnaarneqarpa? v9 Uuliami taanna aningaasarpassuarnik akilersillugu tunineqarsinnaagaluarpoq aningaasallu piitsunut tunniunneqarlutik.« v10 Jiisusilli tamanna paasileramiuk oqarfigai: »Sooq arnaq erloqisippisiuk? Ajunngitsumimmi iliorfigaanga. v11 Piitsummi najortigiuarpasi, uangali najortigiuassanngilassinga. v12 Uulia taanna timinnut kuigamiuk taamaaliorpoq ilisaanissannut piareersaatitut. v13 Ilumut oqarfigaassi: Silarsuarmi sumiluunniit tamarmi iivangkiiliu taanna oqaluussissutigineqaraangat taassumattaaq qanoq iliornera oqaluttuarineqartassaaq taanna eqqaaniarlugu.«
v14 Taava taakkua aqqaneq-marluk ilaat Judasi Iskariotimik atilik palasiunernukarpoq v15 imalu oqarluni: »Sumik tunissavisinga taanna ilissinnut killuutigigukku?« Aningaasanik sølvinik 30-nik tunivaat. v16 Taamanernillu periarfissarsiorpoq killuutiginissaanut.
v17 Nalliussinerup seernarsaateqanngitsumik timiusartorfiusup ulluisa siullianni ajoqersukkat Jiisusi ornippaat aperalugulu: »Savaaqqamik poorskisiutissannik sumi piareersaaqquisigut?« v18 Akivai: »Illoqarfimmukaritsi, nalunngisarpullu taanna ornillugu ima oqarfigisiuk: Ajoqersuisoq oqarpoq: Piffissara qanillivoq; ilinni poorskisiummik neriniarpunga ajoqersukkakka ilagalugit.« v19 Ajoqersukkat taamaaliorput, soorlu Jiisusip peqqugaatik, poorskisiutissarlu piareersarpaat.
v20 Unnummat Jiisusip taakku aqqaneq-marluk nerrivimmut ingeqatigai. v21 Nerisillutillu oqarfigai: »Ilumut oqarfigaassi: Ilassi killuutigiumaarpaanga.« v22 Taava aliasungaalerput, kinguleriiaarlutillu apersulerpaat: »Naalagaq, anersa uangaanngila?« v23 Akivai: »Puugutarsuarmut misusseqatima killuutigiumaarpaanga. v24 Inuup Ernera toqukkut qimagutissaaq pilluni allassimasut malillugit, eqqanarli inuk taanna Inuup Erneranik killuussisoq. Inummut taassumunnga pitsaaneroqqajaqaaq inunngorsimanngikkuni.« v25 Killuussisaata Judasip aperaa: »Rabbi, uangaanerluni?« Akivaa: »Soorlu nammineq oqartutit.«
v26 Nerisillutik Jiisusip timiusaq tiguaa pilluaqqusillunilu aggorpaa, ajoqersukkaminullu tunniuppaa oqarlunilu: »Tigusiuk nerillugulu; tassa timiga.« v27 Ermuserlu tiguaa qujallunilu taakkununnga tunniuppaa oqarlunilu: »Tamassi tassannga imeritsi, v28 taanna tassa aaga, angerutsip aava, amerlasuut pillugit kuineqartussaq ajortit isumakkeerneqaatissaannik. v29 Oqarfigaassimi: Maannamiit viinnequtip inerititaanit imissaassaanga ulloq taanna Ataatama naalagaaffiani ilissi ilagalusi nutaamik imerfissara nalliutserlugu.«
v30 Erinalimmillu unnersiutiginnissummik tussiareeramik Uuliap Qaqqaanukarput. v31 Taava Jiisusip oqarfigai: »Unnuaq manna ilissi tamassi tunukkumaarpassinga, allassimavormi: ›Paarsisoq persuttarumaarpara, savat paarisai siammartillugit.‹ v32 Toqusunilli makereeruma siulerissavassinga Galilæamut.«
v33 Petrusip oqarfigaa: »Tamarmilluunniit tunukkaluarpatsit uanga tununngisaannassavakkit.« v34 Jiisusip akivaa: »Ilumut oqarfigaakkit: Unnuaq manna kukkukooq angutiviaq qarlortinnagu pingasoriarlutit miserratigiumaarparma.« v35 Petrusip oqarfigaa: »Toqoqatigissagaluarukkilluunniit miserratiginngisaannassavakkit.« Ajoqersukkattaaq tamarmik taamatut oqarput.
v36 Taava Jiisusi ajoqersukkani ilagalugit nunaammut Getsemanemik atilimmut pivoq, oqarfigaalu: »Maanga ingikkallaritsi ikunga qinujartorninni.« v37 Taava Petrusi Zebedæusillu erneri marluk qimaguteqatigai; aliasulerporlu qussalangaalerlunilu. v38 Taava oqarfigai: »Tarniga aliasungaarpoq toqumut allaat. Maaniigitsi pigaaqatigalunga.« v39 Qimannerulaariarlugillu pallorpoq kiinnani nunamut tutsillugu qinullunilu: »Ataataga, ajornanngippat ermutsip uuma uanga qaangiinnarlinga. Uangali piumasara pinnani illit piumasat pili.« v40 Ajoqersukkaminut uterami tikippai sinittut, Petrusimullu oqarpoq: »Nalunaaquttap-akunnera ataasiinnarluunniit pigaaqatigisinnaannginnassinga? v41 Eqqumagitsi, qinugitsilu usserneqaqqunasi. Anersaaq kajumikkaluarpoq, uinilli qajannarpoq.« v42 Aappassaanik aamma qimaguppoq qinujartorluni: »Ataataga, ermutsip uuma qaangiinnarsinnaanngippanga imertussaagukkulu, taava illit piumasat pili.« v43 Uteqqikkamilu sinittut siumorpai, uisaneq sapilersimagamik. v44 Kingumut qimappai, pingajussaanillu qinujartorami oqaatsit taakku uteqqippai. v45 Taava ajoqersukkaminut uterami oqarfigai: »Suli sinippisi qasuersaarlusilu? Maanna piffissaq nalliuppoq Inuup Ernerata ajortuliortut assaannut pisitaaffissaa. v46 Nikuillusi aallarniarta! Takuat, uannik killuussisoq tikiutereerpoq.«
v47 Sulilu oqalutsillugu Judasi, taakkua aqqaneq-marluk ilaat, tikiuppoq inuppassuit panalisartut anaatalisartullu palasiunernit inuillu utoqqaanertaannit pisut ilagalugit. v48 Killuussisaata taakku nalunaaqutissaqartissimavai oqarluni: »Kunitassara taannaassaaq; taanna tigusiuk.« v49 Erniinnarlu Jiisusi ornippaa ilassillugulu: »Rabbi!« kunillugulu. v50 Jiisusip oqarfigaa: »Ikinngutiga, tassa suliassat naammassivat.« Taava Jiisusi ornillugu nakuuserfigaat tigusaralugulu. v51 Jiisusillu najortaasa ilaata panani amoriarlugu palasiunerup kiffaa panarpaa siutaarlugu. v52 Jiisusillu oqarfigaa: »Panat puuanut manguguk. Panalersortummi tamarmik panamik toqunneqassapput. v53 Isumaqarpilluunniit Ataataga qinnuigisinnaanngikkiga maannakkorpiaq ikiortisseqqullunga inngilinik legioninit aqqaneq-marlunnit amerlanerusunik? v54 Qanorli ilillutik taava Allakkat taama pisoqarumaarneranik imallit eqquutissappat?« v55 Taamaalimmat Jiisusip inuit oqarfigai: »Panalisarlusi anaatalisarlusilu tigujartorpassinga soorlu tassa piiaasuusunga. Ullut tamaasa naalaffiup silarliani issiasarpunga ajoqersuillunga, tigusarinngilassingalu. v56 Tamakkuli tamarmik taama pipput pruffiitit allagaat eqquuteqqullugit.« Taava ajoqersugaasa tamarmik immineerpaat qimaallutillu.
v57 Jiisusimik tigusisut palasiunermut Kajfasimukaappaat, tassanilu allakkanik ilisimasut utoqqaanertallu katersuussimapput. v58 Petrusilli ungasianiit malippaa palasiunerup illuata kaajaluisartaa tikivillugu, tassungalu iserluni nakkutilliisut akornannut ingippoq qanoq pisoqarnissaa takujumallugu.
v59 Palasiunerit Killisiuisoqatigiillu tamarmiusut Jiisusimut sallusumik nalunaajaasussarsiorput toqutassanngortikkumallugu; v60 nassaanngillalli, naak sallusumik nalunaajaallutik sassartut amerlagaluartut. Taamaallutik marluk sassarput v61 oqarlutik: »Una oqarpoq: Guutip naalaffia ingutsersinnaavara ullullu pingasut ingerlaneranni sanaqqillugu.« v62 Taava palasiuneq nikuippoq Jiisusilu oqarfigalugu: »Ilinnik pisuutitsillutik nassuiaataannut akissutissaqanngilatit?« v63 Jiisusili nillinngilaq. Taava palasiunerup oqarfigaa: »Guuti uumasoq naqqissigalugu uppernarsaaqquakkit: Oqarfigitigut, illit taannaanersutit Kristusi Guutip ernera?« v64 Jiisusip akivaa: »Soorlu nammineq oqartutit. Oqarfigaassili: Matuma kingornagut Inuup Ernera takujumaarparsi Ajugaqanngitsup talerpiata tungaani issiasoq qilaallu nuiaasigut aggersoq.« v65 Taava palasiunerup qallersaatini alippaa oqarlunilu: »Guuti mitaatigaa! Nalunaajaasoqaqqittariaqarnerpa? Mitallernerami maanna tusaavarsi. v66 Qanoq isumaqarpisi?« Akivaallu: »Toqutaasariaqarpoq.«
v67 Taava kiinaagut qitserarpaat tilluarlugulu, ilaasalu anaalerpaat v68 oqarlutik: »Eqqoriaaffigitigut, Kristusi! Kiaana patikkaatit?«
v69 Petrusili silataani kaajaluisami issiavoq. Kiffallu arnap ornippaa oqarfigalugulu: »Illittaaq Jiisusi Galilæamioq ilagaat.« v70 Tamaasali tusaatillugit misiarpoq oqarluni: »Suna pinerit naluara.« v71 Isaariaanut anillammat kiffap arnap allap takullugu tassaniittut oqarfigai: »Uuma Jiisusi Nazaretimioq ilagaa.« v72 Misiaqqippoq uppernarsaallunilu: »Inuk taanna naluara.« v73 Kinguninngualu tassaniittut Petrusi ornippaat oqarfigalugulu: »Ilumut, aamma illit taakkua ilagaatsit; sumiorpaluutivimmi nalunaarpaatsit.« v74 Taava oqaasipilulerpoq uppernarsaallunilu: »Inuk taanna ilisarisimanngilara.« Taamaalisorlu kukkukooq angutiviaq qarlorpoq. v75 Petrusillu Jiisusip oqaasii eqqaalerpai: »Kukkukooq angutiviaq qarlortinnagu pingasoriarlutit miserratigiumaarparma.« Silataanullu anilluni qiangaalerpoq.