v1 Ulloq taanna inuit Mosesip mappersagaataani allassimasunik atuffanneqarput. Taamaalilluni paasineqarpoq tassani allassimasoqartoq Ammonikkut Moabikkullu Guutip ilagiissaanut ilaatinneqanngisaannassasut. v2 Inuiaammi taakkua Israelikkut timiusamik imermillu inoroorsaarfigisimanngilaat. Bileamilu akilerlugu Israelikkunnik perloqqusitinniaraluarpaat; Guutittali perloqqussutissaagaluaq mumisippaa pilluaqqussutinngortillugu. v3 Inatsisit tusaramikkit takornartanit akusat tamaasa imminnit peersippaat.
v4 Siusinnerusukkut palasip Eljashibip Guutitta illuani peqqumaasivinnik nakkutilliisuusup Tobijamut eqqarliusup v5 ini angisooq Tobijamut inissanngorlugu aaqqissuuppaa – tassa ini taanna siornatigut toqqorsiviugaluartoq naatitanit pilliutissanut, tipigissaatinut, immersakkanut, karrinik pissarsiat qulinginut, viinnissat tunguannut, uuliamut, Levikkut tussiartartullu isaaffinnillu paarsisut inatsisit malillugit pissarsiassaannut palasillu pisassaannut. v6 Tamakkuninnga pisoqarnerata nalaani uanga Jerusalemimiinngilanga, tassami ukiut Artaxerxesip Babylonimi kunngiuffiisa 32-anni taassumunnga uterama. Kingunerileraali kunngi qinnuigaara aallarnissannut akuereqqullunga. v7 Jerusalemimut pigama paasilerpara Eljashibip peqqumaasivik Guutip illuata silarliiniittoq Tobijamut inissanngorlugu aaqqissuukkamiuk qanoq ajortigisumik iliorsimasoq. v8 Taamaaliornera ajoreqaara, Tobijallu pigisai tamaasa inimit eqqarpakka. v9 Taava peqqusivunga naalaffiup ineerartai minguersarneqassasut, immersakkallu Guutip illuani atortartut, naatitanit pilliutissat tipigissaatillu, kingumut inaannut inissitsippakka.
v10 Paasivara Levikkut pisassarisatik pisimanngikkaat taamaattumillu taakku tussiartartullu naalaffimmi kiffartortuusussat tamarmik immikkut nunaatiminnut qimaasimasut. v11 Naalagaanerit avoqqaarlerfigaakka oqarlunga: »Sooq Guutip illuanut tunngasut sumiginnarneqarsimappat?« katersorpakka kiffartorfiinullu iverteqqillugit. v12 Kingorna Judakkut tamarmik karrinik pissarsiat qulingi viinnissallu tunguat uulialu peqqumaasivinnukaattalerpaat. v13 Palasi Shelemja, allattuusoq Sadoki Pedajalu Levikkut ilaat peqqumaasivinnut nakkutilliisunngortippakka taakkununngalu ikiortissanngortillugu Hanani Zakkurip ernera Mattanjap erngutaa. Taakkumi tatiginartutut naatsorsuunneqarput. Taakkua suleqatitik pissarsiassaannik agguaavigisartussaavaat.
v14 Guutiga, tamanna pillugu eqqaaginga! Puioqinagillu upperluartutut Guutima illuanut tassanilu kiffartornermi naammassisakka!
v15 Tamatuma nalaani takuakka Judami inuit sabbatikkut viinnissanik tunguiaasut karrinik katersuillutik siutituunut nammakkersuullugit. Taamatuttaaq viinnimik, viinnissanik, figeninik nioqqutissaminnillu allanik sabbatikkut Jerusalemimukaassipput. Uangali inerterpakka nerisassaatiminnik tuniniaaqqunagit. v16 Aammattaaq angutit Tyrusimiut Jerusalemimi najugassissimasut aalisakkanik nioqqutissanillu assigiinngitsunik tamalaanik aggiussipput sabbatimilu Judakkunnut tuniniarlugit. v17 Taava Judami akimarngit avoqqaarlerfigaakka oqarfigalugit: »Qanoq taama ajortigisumik iliorsinnaavisi! Sabbati nalinginnaatipparsi! v18 Imaannginnerpa siuaasasi taamaaliormata Guutitta ajunaarneq uatsinnut illoqarfimmullu matumunnga nalliutitikkaa? Maannalu Israelimut kamanneq annerulersipparsi sabbati nalinginnaatikkassiuk!«
v19 Jerusalemip isaaffiini sabbatip siuninnguagut tarrajussilermat peqqusivunga isaaffiit matuneqassasut; Peqqusivungalu sabbati qaangiutsinnagu ammaqqunagit. Angutitama ilaat isaaffiit killingini paarsisuutippakka, nioqqutissanik sabbatimi eqqussisoqaqqunagu. v20 Marlussoriarluni niuffagianik inunnillu nioqqutissanik assigiinngitsunik tamalaanik nuisitsisunik Jerusalemip silataani unnuisoqarmat v21 inerterpakka oqarfigalugillu: »Suniarlusi qarmarsuup silataani unnuivisi? Taamaalioqqikkussi pillassavassi!« Tamatuma kingorna sabbatimi takkuttoqaqqinngilaq. v22 Kingorna Levikkut minguersaqquakka aggeqqullugillu isaaffiit killingini paarsisuujartorlutik sabbati illernartinneqarsinnaaqqullugu.
Guutiga, aamma taamaaliornera pillugu eqqaaginga, illillu ajunngitsuliungaarninni naakkiginnga!
v23 Tamatuma nalaanissaaq paasivara Judakkut ilaat Asdodimiut, Ammonikkut Moabikkullu arnartaannik nuliartaarsimasut. v24 Meeraasa affaat Asdodimiutut inuiaalluunniit allat ilaattut oqalupput Judakkutut oqalussinnaanatik. v25 Avoqqaarlerfigaakka perloqqullugillu, allaammi ilaat unatarpakka nujaartorlugillu. Taava Guuti naqqissigalugu uppernarsaasippakka oqarlungalu: »Panisi ernerinut tunniutissanngilasi, paniilu ernissinnut nuliartaaritissanngilasi ilissiluunniit nammineq nuliartaarissanagit. v26 Taamaaliorluni Salomo Israelip kunngia ajortulinnginnerpa? Inuiaqatigiit amerlaqisut ilaat ataasiinnaalluunniit Salomotut ittumik kunngeqarsimanngillat. Salomo Guutimit asaneqarpoq, Guutillu Israelimut tamarmut kunnginngortippaa; taamaakkaluartoq takornartat arnartaasa ajortuliortippaat. v27 Aamma ilissi tassaanerarneqassanerpisi ajortuliungaartuusut Guutitsinnullu ilumuunngitsuliortut takornartallu arnartaannik nuliartaarsimasut?«
v28 Jojadap ernerisa ilaat, palasiunerup Eljashibip ernutaa, Sanballatimut Horonimiumut ningaajuvoq; taamaattumik uannit ajattorpara. v29 Guutiga, qanoq iliorsimanerat eqqaamagiuk! Palasitut atorfik kiisalu palasit Levikkullu angerusiat mingutsissimavaat.
v30 Takornartat taakkunaniittut tamaasa peersippakka; palasillu Levikkullu ataasiakkaat tamaasa najoqqutassippakka tamarmik immikkut suliarisaat naapertorlugit. v31 Aammattaaq ilisimatippakka qanoq ilinikkut qisussanik inereqqaatinillu aggiussisassasut, tamaasa aalajangersimasumik piffissalerlugit.
Guutiga, eqqaaginga, qanorlu iliorsimanikka uannut iluaqutissanngortikkigit!