Israeli: 1 Mos 32,28-mi oqaatigineqarpoq Jaaku Naalakkap Israelimik atertaartikkaa, tassa »Naalakkamut akiuussimammat«; oqaatsip hebræerisuup isumaa imaannerugaluarpoq: »Guuti akiuuppoq«. Jaakup kinguaavi Israelikkunnik taaguuteqarput. Israeli aamma naalagaaffimmut ateritinneqarpoq. Israelikkut naalagaaffiat Salomop kingornatigut marlunngorluni avimmat naalagaaffik avannarleq (tassa Israelikkut naggueqatigiit avannarliit quliusut naalagaaffigiligaat) kisimi Israelimik (imaluunniit Jaakumik) taaneqartalerpoq, kujallerli Judamik taaneqartarpoq. Naalagaaffimmi avannarlermi innuttaasut »Israelimiunik« taaneqartarput taaguulli »Israelikkut« naalagaaffimmi avannarlermi kujallermilu najugaqartunut ataatsimut atorneqarluni.