Naalagaq: Testamentitoqqamiittoq nutsigaavoq oqaatsimit hebræerisuumit adonajimit; adonaj taaguutaavoq Guutimut Jahvemut, naalisarlugu Jah, Jahu. Juutit ataqqinninnermit Guutip aqqa taajumasanngimmassuk Jahve atuarneqartarpoq adonajimik. Taamaattumik Jahve kalaallisut nutserneqartarpoq: »Naalagaq«. »Jahve«li atuinnarneqartarpoq erseqqivissumik oqaatigineqaraangat taanna aterigaa, soorlu 2 Mos 3,15 aamma Es 42,8. Testamentitoqqap grækerisuunngornerani pisarneq malillugu Jahve »Naalakkamik« nutserneqarpoq, taamaalillunilu Testamentitaami atorneqarportaaq Guutimut Kristusimullu taaguutaalluni.