nalliussinerit/nalliuttorsiornerit: Sabbatip-akunnerinik nalliussinerit, qaammatinik nalliussinerit aammattaaq ukiup immikkoortuisa nalliussineqarneri, tak. ukiunik naatsorsuisarneq Nalliussinerit pileqqaarsimasinnaapput inooqatigiinni ikinnerusuni ilaallu ukiut ingerlaneranni tassaalersimallutik Jerusalemimi naalaffimmi katersuussimasut nalliuttorsiorneri, nalliuttorsiornerup imaata nassuiarnera nutaanngortillugu.

karrinik katersuinerup nalliussineqarnera: 2 Mos 23,16-imiinnaq eqqartorneqarpoq; assigaa ullut 50-ianni nalliussineq.

naalaffiup atoqqaarteqqinnerata nalliussineqarnera: tak. naalaffiup atoqqaartinnerata nalliussineqarnera.

naalaffiup atoqqaartinnerata nalliussineqarnera: Tassaavoq eqqaaniaaneq Jerusalemimi naalaffimmi guutisiortaleqqinnermik ukioq 165 Kr.in.si.; taamaattumik nalliussivik taanna Testamentitoqqami eqqartorneqanngilaq, aatsaalli Testamentitaami, Joh 10,22.

nalliussiartorneq: Immikkut nalliuttorsiornerunngilaq ataatsimulli taaguutaalluni naalaffimmut Jerusalemimiittumukaasarnermut poorskisioriartorluni, sabbatip-akunneranik nalliussiartorluni tupiusaliorfissioriartorlunilu, tak. Tuss 42,5 aamma »Nalliussiartornermi erinarsuutissat« Tuss 120-134.

paarnanik katersuinerup nalliussineqarnera: Assigaa tupiusaliorfik, pisartoq ukiut nikinneranni (tak. ukiunik naatsorsuisarneq) 2 Mos 23,16, inoqutigiinni eqqarleriit ikinngutillu peqatigalugit.

piinsi: Grækerisuumiit pentekostemit = (ullut) 50-issaat, tassa poorskimiit, tak. 5 Mos 16,9-10. Testamentitaami taaguutaavoq Anersaap Illernartup tikiunneranut, tak. ApS 2. Aamma tak. ullut 50-ianni nalliussineq.

poorski: Hebræerisuumiit pesachimit. Nutserneqarsinnaagunarpoq: »qaangiineq«, tak. 2 Mos 12,13, nalliussineqartartoq qaammatip siulliup ulluisa 14-ianni, (tak. ukiunik naatsorsuisarneq), aallaqqaataani tassaasarpoq ilaqutariinni nalliuttorsiorfik, tak. 2 Mos 12,3-4, katersuif-fiit nalliussineqartarnerattut, kingornali naalaffimmi nalliussineqartalerpoq Jerusalemimukaasunit, 5 Mos 16,16 (tak. nalliussiartorneq), eqqaaniarlugu Egyptenimit anineq, 2 Mos 12,14 aamma 5 Mos 16,1. Jiisusip sanningasulimmut kikiattugaanera toqusunillu makinnera pivoq juutit poorskisiornerata nalaani.

purimi: Nagguigaa perserit oqaasiat pur = »immeraanneq«, nalliussineqartartoq adarip 14-15-ianni (tak. ukiunik naatsorsuisarneq) eqqaaniarlugu juutit Persiami nungutinneqartussaagaluartut annaanneqarnerat, Est 9,26.

qaammanniffik imaluunniit: qaammanninnerup nalliussineqarnera: Sabbatimut atatillugu taaneqarajuppoq, soorlu 2 Kng 4,23. Inoqutigiinni nereqatigiinnermik nalliussineqartarpoq, 1 Sam 20,27, aammattaarlu illernartuummi pilliinertalerlugu (tak. qaammanniffimmi pilliutit ikikkagassat, immikkoortumi: pilliineq) qarlortartoqartillugulu, 4 Mos 10,10.

sabbati: Hebræerisooq shabat = »qasuersaarneq«, soorlu 2 Mos 20,11. Aallaqqaataani sabbatip ullua tassaasorineqarpoq qaammatip imissiffia: Testamentitoqqami qasseeriarlugu qaammanniffimmut atatillu-gu taaneqarpoq, soorlu 2 Kng 4,23. Kingorna tassaalerpoq sabbatip-akunnerani ulloq kingulleq (tak. ukiunik naatsorsuisarneq) qasuersaarfissaq sukannersunik najoqqutassalik, soorlu tak. Neh 13,15-22. Nalliuttoq sabbati kristumiuni ukiut ingerlaneranni taarserneqariartorpoq sapaammik, tassa ullormik Jiisusip toqusunit makiffianik, »Naalakkap ullua«nik, Saqq 1,10, sabbatip-akunnerani aamma sapaatip-akunnerani ulloq siulleq, ApS 20,7; 1 Kor 16,2. Nalitsinni aalajangerneqarpoq sapaat tassaasoq sapaatip-akunnerani ulloq kingulleq.

savanik kissaanerup nalliussineqarnera: Soorlu 1 Sam 25,4; katersuiffiup nalliussineqarneratut ippoq, naalaffimmili pinngisaannarpoq.

seernarsaateqanngitsumik timiusartorfiup nalliussineqarnera: Pisarpoq ulluni arfineq-marlunni qaammatip siulliup ulluisa 15-ianniit (tak. ukiunik naatsorsuisarneq), 3 Mos 23,6; tassani allassimavoq timiusat seernaqanngitsut nerineqassasut eqqaaniarlugu Israelikkut Egyptenimit aninerat, tak. 2 Mos 12,15-20. 33-34. Aallaqqaataani tassaagaluarpoq katersuiffiup siulliup, tassa suaasiassanik katersuinerup, nalliussineqarnera, kingornali poorskisiornermut uiggiunneqarpoq Jerusalemimi naalaffimmi nalliuttorsioriartortunit nalliussineqartarluni.

tupiusaliorfik: Nalliussineqartarpoq ulluni arfineq-marlunni qaammatit arfineq-aappaata ulluisa 15-ianniit (tak. ukiunik naatsorsuisarneq), 3 Mos 23,39-43 paarnanik katersuinerup (annermik viinnissanik oliveninillu) kingorna, tak. paarnanik katersuinerup nalliussineqarnera Nalliussivik tupiusaliorfimmik ateqarpoq paarnanik katersuisut narsaatini naatitsiffiusuni avalequtinik illuaraliani najugaqartarmata. Kingorna naalaffimmi nalliussineqartalerpoq Jerusalemimukaasunit, 5 Mos 16,16 (tak. nalliussiartorneq), tupiusallu inoqajuitsumi angalaarnermut eqqaaniutitut nassuiarneqartarput, 3 Mos 23,43.

ulloq saammaannartitsivik: Nalliussineqartarpoq qaammatit arfineq-aappaata ulluisa qulinganni (tak. ukiunik naatsorsuisarneq), 3 Mos 23,27-31, katerisimaarnermik iisinnginniarnermillu. Nalliuttorsiornermi malittarisassat peqqissaartumik allaaserineqarput 3 Mos 16-imi. Inuit ajortaat saammaanneqassapput. Aamma tak. Azazeli.

ullut 50-ianni nalliussineq: Pisarpoq sabbatip-akunneri arfineq-marluk poorskip kingorna 5 Mos 16,9-10 qajuusiassanik katersuinerup nalliussineranut atatillugu, tak. karrinik katersuinerup nalliussineqarnera. Aallaqqaataani illoqarfikkuutaartumik nalliussineqartaraluar-poq, kingornali naalaffimmi nalliussineqartalerpoq Jerusalemimukaasunit, 5 Mos 16,16 (tak. nalliussiartorneq aamma piinsi).