nipilersuutit: Taaguutit atorneqartut sunut taaguutaanerat qularnaalluinnartumik ilisimaneqanngilaq. Hebræerisuut Testamentitoqqami atorneqartut grækerisuullu Testamentitaamiittut isummamikkut assigiinngissuteqarsinnaalluarput.

avilortoq, avilortuliaq: Testamentitoqqami eqqartorneqartoq nipilersuutiviunngilaq; pineqarpulli sianertut ittut palasiunerup atisaaniittut pisutsillugu sianaaluttartut, 2 Mos 39,25. 1 Kor 13,1-imi taaneqartoq avilortuuvoq cymbelitut ittuugunartoq.

cymbeli: Testamentitoqqamiinnaq taaneqarpoq, savimerngit saattukujuut imminnut anaarlussaanneqartartut. Aamma tak. avilortoq.

kukkilattariaasaq: Dan 3-miinnaq taaneqarpoq. Amerlasuunik noqartilik.

kukkilattariaq: Nipilersuut angisooq, Tuss 33,2; 92,4, qulinik noqartilik. Testamentitaami taaneqartoq sianaamut naleqquppoq.

qarlortaassuaq: Testamentitaamiinnaq taaneqarpoq, soorlu Saqq 8,2. Testamentitoqqamiittoq sulluartaat assigaa.

qarlortaat: Testamentitoqqami oqaatsit hebræerisuut qassiit atorneqarput qarlortaatinut assigiinngitsunut qisummik sanaajugajuttunut taaguutit. Taamaattut aamma Testamentitaami taaneqartarput.

qarlortaat kalerrisaarutaasoq: 4 Mos 10,2 malillugu saviminermik sanaajuvoq.

qarlortaatit puujusat: Dan 3-miinnaq taaneqarput.

qilaat: Rytmilersuut tumerparpaajusaq, tumerparpaamut sinimigut sianaaluttulersukkamut assingusoq. Testamentitoqqamiinnaq taaneqarpoq.

sianaalaaq: 1 Sam 18,6-imiinnaq taaneqarpoq. Saviminiuvoq anaalertariannguaq.

sianaaq: Noqartilik pingasuniit aqqaneq-marlunnut amerlassuseqartunik. Nipilersuut taanna Testamentitoqqami taaneqakulanersaavoq. Testamentitaami kukkilattarissamik nutserneqarsimavoq.

sisteri: 2 Sam 6,5-imiinaq taaneqarpoq. Sianaalatittagaq savimerngit saattukujuut imminnut anaarluttarlugit.

sulluartaat: Testamentitoqqami taaneqartoq; nipilersuutiviunngilaq tassaallunili sorsunnissamut, Jos 6,4, nalliuttorsiornissamulluunniit, Tuss 81,4, kalerrisaarutaasartoq. 1 Kng 1,39 kunnginngortitsinermi atorneqarpoq. Testamentitaamiittumut qarlortaassuarmut naleqqukkunarpoq.