pilliineq: Itsaq upperisarsiornernut tamanut atatillugu inuit pilliisarput guutiminnut ataatsimut qassiiusunulluunniit. Pilliutaasarput nerisassat uutassatut piareersarneqarsimasut piareersarneqarsimanngitsulluunnit, aallaqqaataanilu isumagineqartoq tassa pilliutit guutip nerisassarissagai, tak. 1 Mos 8,21; Tuss 50,12-13. Ukiulli ingerlaneranni pilliut tassaalerpoq inuit guutimut tunissutaat akiliutaallu. Pilliutigineqartarput nersutit (Testamentitoqqami nersutaatit kisimik) imaluunniit naatitanit pisut, amerlanertigut pilliivimmi ikuallanneqartarlutik. Piaqqeqqaatit naatitanillu inereqqaatit Guutimut illernartitaassapput, tassa pilliutigineqassapput, tak. 2 Mos 13,1-16. Pilliisarnerit ilaat pisartuartuupput piffissanut aalajangersimasunut atatinneqarlutik (tak. nalliussinerit) allallu pisartunut immikkut ittunut tunngatitaallutik. Najoqqutassat sukumiinnerpaamik allaatigineqarput 3 Mos 1-7-imi.

Testamentitoqqami ilaatigut pilliinermut tunngasut nangaasoornertalimmik oqaatigineqartarput, soorlu Tuss 50,7-15; 51,18-19; Hos 6,6; Mika 6,6-8.

Aamma Testamentitaami pilliinermut tunngatillugu nangaasoorpalunnermik naammattuugassaqartarpoq, soorlu Mark 12,33, qassiitigut issuakkanik Testamentitoqqamit pisunik ilaqartillugu, soorlu Matt 9,13. Ukioq 70 Kr.in.king. naalaffik piuneerussaammat pilliisarneq atorunnaarluinnarpoq, Jiisusillu toqunera tassaatinneqarpoq pilliinivik saammaassissut allanngortitassaanngitsoq, soorlu Hebr 9,26, tak. 1 Joh 2,2. Oqaaseq pilliineq atorneqarajuppoq isumavianit allaasumik isumaqartillugu, soorlu Rom 12,1; Fil 2,17.