ukiunik naatsorsuisarneq: Itsaq Kangiani Qiterlermi ukiunik naatsorsuisarput seqineq qaammalluunniit najoqqutaralugit, sumi najugaqarneq ukiullu suut atuunnerat apeqqutaallutik. Israelikkut, juutit, oqaluttuarisaaneranni naatsorsuinermi seqineq qaammallu nikittaallutik atorneqarput erseqqissumik immikkoortinneq ajornarlutik. Najoqqutaanerusorli tassaavoq qaammat, tassami hebræerit qaammammut taaguutaat aamma »qaammanniffik« assigiipput (tak. qaammanniffissiorneq immikkoortumi: nalliussinerit). Qaammatit ukiup qanoq ilinera tunngavigalugu atsigaapput; sisamat Testamentitoqqami taaneqarput: etanimi (1 Kng 8,2) paarnanik inerittunik katersuinerup qaammataa septembari-oktobarimut naleqquttoq; buli (1 Kng 6,38), siallertarfiup qaammataa oktobari-novembarimut naleqquttoq; abi-bi (2 Mos 13,4; 5 Mos 16,1) karrertaqalerfiup qaammataa, karrit ineriffiat marsi-apriilimut naleqquttoq; zivi (1 Kng 6,1.37) naasuniffiup qaammataa apriili-maajimut naleqquttoq. Israelip oqaluttuassartaani kingusinnerusumi ukiup immikkoortitigaanera allanngortitaavoq abibi tassaalerluni ukiup qaammataa siulleq, 2 Mos 12,2; 13,4. Suli kingusinnerusukkut ukioq aqqaneq-marlunnik qaammateqalersitaa-voq Babylonimiut naatsorsuisaasiannik sunnerneqarnikkut. Qaammatit taakkua ilaat Testamentitoqqami taaneqartut ukuupput: Qaammat siulleq nisani (Neh 2,1) marsi-apriilimut naleqquttoq; qaammatit pingajuat sivani (Est 8,9) maaji-juunimut naleqquttoq; qaammatit arferngat eluli (Neh 6,15) aggusti-septembarimut naleqquttoq; qaammatit qulingiluaat kislevi (Neh 1,1) novembari-decembarimut naleqquttoq; qaammatit qulingat tebeti (Est 2,16) decembari-januaarimut naleqquttoq; qaammatit aqqarngat sebati (Zak 1,7) januaari-februaarimut naleqquttoq; qaammatit aqqaneq-aappaat adari (Ezra 6,15) februaari-marsimut naleqquttoq. Aammattaq ateqartinnagit eqqartorneqarput qaammatit sisamaat (Ez 1,1), qaammatit tallimaat (Jer 28,1), qaammatit arfineq-aappaat (Jer 28,17) qaammatillu arfineq-pingajuat (Zak 2,6). Qaammatit amerlassusiat nunarsuup seqinermik kaajallaanerata ulluinut naleqqukkunnaaraangat ilaanni qaammammik ilassusiisarsimapput.

Qaammat aggorneqarpoq qaammatip allanngortarneri sisamat ullut rfineq-marlukkuutaarlugit pisartut tunngavigalugit, ullunili taakkunani sabbati (tak. nalliussinerit) kisimi ateqartitaavoq, ullulli kisitsisilersorneqarput qaammatip ullui najoqqutaralugit, soorlu Ez 1,1 aamma 8,1.

Hebræerini ullup unnuallu ingerlanerat aallartittarpoq seqerngup tarrinneraniit, 1 Mos 1,5; 5 Mos 23,11. Tamanna siullerpaamik pingaaruteqarpoq nalliuttut aalajangiiffiginiarneranni. Ulluinnarni ulloq ullaamiit aallartittarpoq. Ulloq nalunaaquttap-akunnerinik minutsinillu aggugaanngilaq, seqernulli qilammi sumut killinnera najoqqutaasarpoq, soorlu Jos 6,15; 1 Kng 18,26; 1 Mos 18,1; 1 Mos 3,8; 2 Mos 12,6. Ullup nalunaaquttap-akunnerinik immikkoortiternera qanga pisimanersoq nalorninarpoq. Nalunaaquttap-akunnerinik immikkoortiterineq Testamentitaami atuuttuusutut naatsorsuussaavoq, soorlu Matt 20,3-6, immaqalu aamma tamanna tunngaviuvoq Neh 9,3-mi. 2 Kng 20,9-11-mi eqqartorneqarpoq seqinermut nalunaaqutaq titarnernik aggornilersugaq; qanoq atorneqarsimanersoq ilisimaneqanngilaq.

Unnuaq pigaarfinnik pingasunik immikkoortitigaavoq, soorlu Eqq 7,19; 2 Mos 14,24; Tuss 90,4. Testamentitaami oqaluttuarineqartut nalaanni Romamiut pigaarfinnik sisamanik immikkoortiterisarnerat atortalersimavaat, Matt 14,25; aamma tak. Mark 13,25.