v1  Halleluja.

Naalagaq qutsavigisiuk ajunngitsuummat,
unneqqarissusia atavoq naassaanngitsumik.

v2  Kia oqaluttuarisinnaavai Naalakkap suliarsui?
Kia nalunaajaatigisinnaavaa nersorneqaatissaa tamaat?
v3  Pilluarput innarluissummik sianiginnittut
tamatigullu naapertuilluartumik iliuuseqartut.
v4  Eqqaaginga, Naalagaq, innuttannik saammaassininni,
isumagiginga annaassininnik,
v5  uannut takusinnaaqqullugu qinikkavit pilluarnerat,
innuttatit tipaatsoqatigeqqullugit,
qiimasoqqullungalu inuiaat innuttassarsiatit peqatigalugit.

v6  Ajortuliorpugut siuaasavut assigalugit,
iluaatsutut ajortumik iliorsimalluta.
v7  Siuaasatta Egyptenimi
tupinnartuliatit sumiginnarpaat;
unneqqarissorsuunerit eqqaamanngilaat,
Qutsinnerussaartorli naalasseriiffigaat Immami Ivissuartuumi.
v8  Taamaattorli Guutip annaappai pissutigalugu atini,
pissarsuussutsini takutikkumallugu.
v9  Imaq Ivissuartooq tissorpoq sioorasaarmani,
immallu itineratigut ingerlatippai soorlu inoqajuitsukkut.
v10  Akerartortaannit annaappai
akeraannillu aniguisillugit.
v11  Kisianni akerartortaat immap matoorpai
ataasiinnarmilluunniit aniguisoqartinnagit.
v12  Taava oqaasii innuttaasa tatigilerpaat
erinarsorlutillu unnersiutigalugu.

v13  Kisianni naammassisai erniinnaq puiorpaat
ilitsersuutaalu utaqqiumanagu.
v14  Piumasaqarpallaalerput inoqajuitsumi,
Guutilu misilinniarlugu inuilaami.
v15  Piumasaannik taava tunivai,
timaasigulli sanigornartumik nappaatissillugit.
v16  Tammaarsimaffimminni uumissulerpaat Mosesi,
aamma Aroni Naalakkap illernartua.
v17  Taava nuna aatsarpoq iillugulu Datani,
katersallu Abiramikkut mattullugit.
v18  Inneq nungutitsivoq katersaanni,
ikualanermillu iluneqarput iluaatsut.

v19  Horebimi nersuteeraasaliorput angutivissamik
guutiliarlu kuisaq pallorfigalugu.
v20  Naalannaatertik taarserpaat
ussiup ivigartortup assinganik.
v21  Puiorpaat Guuti annatsitsisertik,
malunnangaartuliortoq Egyptenimi,
v22  tupinnartuliortoq Kamip nunaani,
suliaqartorlu annilaarnangaartunik Immami Ivissuartuumi.
v23  Nungutikkumallugit aalajangeraluartoq
Mosesi qinersimasaa
akunnermiliuppoq
Guutip kamanneratigut nungutinneqaqqunagit.

v24  Nuna alianaatsoq asiginnarpaat
Guutillu oqaasii tatiginagit.
v25  Naammagittaalliorput tuperminni
naalakkumanagulu Naalagaq.
v26  Taava Naalakkap assani tungaannut silutsippaa
orlorartikkumallugit inoqajuitsumi,
v27  kinguaassaat siammartikkumallugit
inuianni allanertani,
siaruarterumallugit nunanut tamanut.

v28  Ba'al-Peori sammilerpaat
nerillugillu toqusunut pilliutit.
v29  Suliaminnik Naalagaq kamassaarpaat,
taakkununngalu nalliupput perluit.
v30  Taava Pinehasi sassarpoq eqqartuussillunilu,
perluillu kipitinneqarput.
v31  Taamaaliornermigut iluassuseqartitaavoq
kinguaariikkuutaani naassaanngitsumik.

v32  Naalagaq kamassaarpaat Meribap puilasuini,
taakkulu pisuullutik perlutsitaavoq Mosesi,
v33  naalasseriiffigigamikku
mianersuaalliorluni oqalulersillugu.

v34  Nungutinngilaat inuiaat
nunguteqqusaralui Naalakkap,
v35  kisianni inuiaqatigiit akuliuffigaat
issuarlugillu ileqqupilui.
v36  Guutisiorfigaat taakkua guutiliaat,
taamaaliornertillu napitinneqaatigaat.
v37  Pilliutigaat ernitik panitillu anersaapilunnut.
v38  Qitornat pinngitsuusut toqutippaat.
Ernermik panimmillu aavat
Kana'anikkut guutiliaataannut pilliutigaat
nunartik aammik illernassusiiarlugu.
v39  Suliamikkut minguttuunngortitaapput
allasiorlutillu iliuutsiminni.

v40  Taava Naalagaq innuttaminut kamangaalerpoq,
innuttassarsianilu avaannguutivikkamigit
v41  inuiannut allanut qunusiassanngortippai.
Akerartortaat taakkununnga naalaganngorput,
v42  akeraasalu annikilliortippaat.
Taakkunannga qunutitaapput.
v43  Qasseeriaqaluni annaattarpai,
pilersaarusiamikkulli naalasseriiffigaat
ajortuliornermullu maggukkiartuinnarlutik.
v44  Annikilliorneranni isumassortarpai
nillianerat tusaagamiuk.
v45  Taakkununnga angerutsiminik eqqaasittarpai,
ilumoorsutsiminilu angingaartumi peqqissimivoq
v46  naakkigineqalersillugit
aallarussisaannit.

v47  Annaatsigut, Naalagaq Guuterput,
inuiannit utertitsigut
aqqit illernartoq qujassutigeqqullugu,
tulluusimaarlutalu unnersiutigisinnaaqqullutit.
*
v48  Unnersiutigineqarli Naalagaq, Israelip Guutia,
naassaanngilluinnartumik.
Inuillu tamarmik akissapput: Amen!