v1  Appittartumut. Al-ajjelet-ha-shahar.
Daavip tussiaasiaa.

v2  Guutiga, Guutiga! Sooq qimappinga?
Ungaseqaatit ikioqqullunga torlulaninnit aamma nillianinnit.
v3  Guutiga, ullukkut torlulaffigisaraluarikkit akinngilatit,
unnuakkut aamma, qasuerfissaqanngilangali.

v4  Issiavissaarsuanni issiavutit illernartuusutut,
illit Israelip erinalimmik unnersiutigisaa.
v5  Siuaasatta illit tatigaatsit;
tatigimmatsit aniguisippatit.
v6  Ilinnut torlulapput annaanneqarlutillu;
illit tatigaatsit pakatsisinneqarnatillu.

v7  Uangali quperluinnaavunga angutitullu innanga,
inunnut kanngunarsaat, inuit asissugaat.
v8  Takunnittut tamarmik mitaatigaannga,
mitaarput ileqimisaartorlutillu:
v9  »Naalakkamut isumagisassanngortippoq, taassuma aniguisilliuk,
iluarisarigamiummi annaanniarliuk!«

v10  Illimmi anaanama timaata iluanit anisipparma
eqqissaarfeqartillungalu anaanama iviangiini.
v11  Inunngorninnilli ilinnut isumageqqusaavunga,
anaanama iluaniillungali illit Guutigaakkit.
v12  Taava qimagusimaqinak uannit,
annikilliornartut qanillimmata
ikiortissaqannginnamalu!

v13  Ussigit angutivissat nakuusut iluaannga,
Bashanip ussippaarsuisa avatangerpaannga.
v14  Løvit qaasuttut uiannisaartut
aatsarutereerpaannga.
v15  Assigaara imeq maangaannaq kuisaq,
kaanngarput saanikka tamarmik,
ilersimavoq uummatiga kutsuttut
aqililluni ilunni aattutut.
v16  Marraminertut panerpoq qilaara,
oqara nipeqqavoq ikkinnut,
nallartipparma pujualanut toqup piinut!

v17  Qimmit ilusimavaannga,
avatangersimavaannga pinerluttut ataatsimoortut,
assakka isikkakkalu putusimavaat,
v18  kisissinnaavakka saanikka tamaasa.
Inuit isigaannga quiassuaatigalunga,
v19  atisakka imminnut agguaappaat
ilupaaralu immeraatigalugu.

v20  Illilli Naalagaq, qimagusimaqinak,
illit nakuussutiga, ikiuiartorasuarit!
v21  Aniguisiguk inuunera panamit,
inuuneralu akisooq qimminit,
v22  annaannga løvip qarnganit,
ussigit nujuartat nassuinit!

Akivarma!
v23  Aqqit nalunaajaatigissavara uanga qatanngutinnut,
katersorsimasuni unnersiutigissavakkit:
v24  Ilissi Naalakkamik mianerinnittusi, unnersiutigisiuk,
ataqqinartissiuk, eqqarleriit Jaakukkut tamassi,
uullutigisiuk, eqqarleriit Israelikkut tamassi!
v25  Taassuma asiginnanngimmagu suusupaginagulu
ikiortariallip annikilliuutaa;
kiinni taassumunnga isertunngilaa,
tusarpaali ikioqqulluni torlulanera.

v26  Erinalimmik unnersiutigissavakkit katersorsimasorpassuarni,
neriorsuutikka eqquutitissavakka Naalakkamik mianerinnittut takkuanni.
v27  Maniguuttut nerissapput qaarsillarlutik.
Naalakkamik ujarlersut unnersiutigissavaat,
nutaamillu sapiissuseqalissapput atajuartussamik.

v28  Nunarsuup isorartoqisup tamarmi Naalagaq eqqaamassavaa
Naalakkamullu uterlutik,
inuiaallu eqqarleriissortaasa tamarmik
pallorfigissavaatsit.
v29  Naalakkap kunngiussuseq pigaa,
inuiannut naalagaavoq.
v30  Ilumummi, nunap iluani sinittut pallorfigissavaat,
pujualanut aqqartut tamarmik seeqqumiarfigissavaat.
v31  Uangami taassumunnga inuujumavunga, kinguaassamalu Naalagaq kiffartorfigissavaat.
Naalagaq nalunaajaatigineqassaaq kingulissanut,
v32  nalunaajaatigissavaat iluarsusia inunnut erniujumaartunut,
iliuuseqarmammi!