v1 Kunngip Salomop arnat nunani allamiut amerlaqisut asasarai Faraop paniata saniatigut, taakku tassaapput Moabikkut, Ammonikkut, Edomikkut, Sidonimiut Hittikkullu arnartaat. v2 Inuiaat taakku pillugit Naalagaq Israelikkunnut oqarsimagaluarpoq: »Taakkuninnga inooqatiginnissanngilasi, guutiminnut saatseqinavaasi.« Taamaakkaluartoq taakkua arnartaat Salomop asavai, attavigiuarpaalu. v3 Arnanik akimasunik 700-nik nuliaqarpoq 300-nillu panerfaqarluni, nuliaasalu uummataa killormut sangutippaat, v4 tassa Salomo utoqqalimmat nuliaasa uummataa guutinut allanut saatsippaat ataatani ilumoorsusiatigut assiginagu Naalakkamut Guutiminut uummammigut iluunngarluni ilumoorunnaarsillugu. v5 Salomop guutisiorfigai Astarte Sidonimiut guutiat Milkomilu Ammonikkut guutiat maajunnartoq. v6 Naalakkap isaani ajortumik iliorpoq, ataatanilu Daavi assiginagu Naalakkamik malinnilluartuujunnaarpoq. v7 Taamani Salomo qaqqami Jerusalemip kangianiittumi Kemoshimut Moabikkut guutiannut maajunnartumut Milkomimullu Ammonikkut guutiannut maajunnartumut qattunermik pilliiviliorpoq, v8 taamatullu nuliani nunanit allanit pisut tamaasa pilliiviliuuppai guutiminnut pilliiniarlutik innermik ikitsiffissaannik toqutassanillu pilliiffissaannik.
v9 Naalakkalli Salomo kamaatilerpaa uummammigut tunussimammagu Naalagaq Israelip Guutia marloriarluni imminut takutittarsimasoq v10 peqqusisimasorlu allanik guuteqassanngitsoq; Salomolli Naalakkap peqqusinera naalassimanngilaa. v11 Taava Naalagaq Salomomut oqarpoq: »Angerusera ileqqoreqqusakkalu ilinnut inassutikka naalakkunnaarakkit naalagaaffinnik arsaarumaarpakkit ilinnut kiffaasumut tunniullugu. v12 Taamaattorli ataatat Daavi pissutigalugu inuutillutit taamaaliussanngilanga, ernerilli naalagaaffianik arsaarumaarpara, kisianni tamaat ilinnit arsaarinnissutiginagu. v13 Kiffarami Daavi Jerusalemilu illoqarfik qinersimasara pissutigalugit naggueqatigiit ataatsit erninnut pigiinnartikkumaarpakka.«
v14 Naalakkap Salomomut akerarilersippaa Hadadi Edomikkuusoq Edomimi kunngip kinguaavisa ilaat. v15 Taamani Daavip Edomi ajorsartimmagu sakkutuullu naalagaanertaat Joabi majuarsimammat toqutaasut iliartorlugit Joabi Edomip angutitaanik tamanik toqoraasimavoq. v16 Joabi Israelilu tamarmi qaammatini arfinilinni tassaniissimapput Edomip angutitaasa nungutitaanerisa tungaanut. v17 Hadadili ataatami angutitaasa ilaannik Edomikkuusunik ilaqarluni Egyptenimut qimaasimavoq; taamani Hadadi inuusuttunnguusimavoq. v18 Midjanimit aallarput Paranimullu pillutik, angutillu Paranimiut ilaat ilassarsiareriarlugit Egyptenimukarput Faraomut Egyptenip kunngianut. Faraop Hadadi illussaanik tunivaa inuussutissaanillu isumagalugu nunaminermillu tunillugu. v19 Faraop Hadadi nuannaringaaleramiuk ukuani, dronningip Takpenesip qatanngutaa, nulissiutitippaa. v20 Takpenesip qatanngutaata Hadadi ernertaappaa, taannalu Genubatimik atserpaat. Takpenesip nukappiaraq taanna Faraop illussaarsuani peroriartortippaa. Genubati Faraop illussaarsuani najugaqarpoq Faraop erneri ilagalugit. v21 Hadadip Egyptenimiitilluni tusaramiuk Daavi siuaasamini qasuersaalersoq sakkutuullu naalagaanertaat Joabi toqusimasoq Farao oqarfigaa: »Nunannut angerlarlanga.« v22 Faraop oqarfigaa: »Uanni ajorsaateqaravit aallarumallerpit?« Hadadilli akivaa: »Ajorsaateqanngikkaluarpunga, taamaattorli aallarnissara qinnutigaara.«
v23 Aamma angut alla Guutip Salomomut akerarilersippaa, tassa Rezoni Eljadap ernera naalakkaminit Sobap kunngianit Hadad'ezerimit qimaasimasoq. v24 Taamanikkut Daavip ajorsartimmatik angutit toqqisimaffeqarnatik angalaaginnartut ilataariortorsimavai siulersugarilerlugillu. Damaskusimukarsimapput tassani nunassillutik Damaskusimilu imminnut naalaganngortillutik. v25 Israelimut akeraajuarpoq Salomo inuutillugu, Hadaditullu iliorluni Israelikkut ajunaaqutissiorpai. Aramimi kunngiuvoq Israelilu uumissugaralugu.
v26 Jeroboami Nebatip Efraimikkuusup Seredamiup erneraa; anaanaa Seruamik ateqarpoq uillarnerullunilu. Salomomut kiffartortuugaluarluni kunngi pikitsitsivigaa.
v27 Jeroboamip kunngimut pikitsitsinera matuminnga pissuteqarpoq: Salomop pallittaalisaliaq Millo iluarsartissimavaa ataatamilu Daavip illoqarfiata qarmaasa aserorneri milissortillugit. v28 Jeroboami angutaavoq pikkorissoq. Salomop takugamiuk angut inuusuttoq taanna qanoq sulleritsigisoq nammattartunut naggueqatigiinnit Josefikkunnit pisunut nakkutilliisunngortippaa. v29 Ilaanni Jeroboami Jerusalemimit aallarami pruffiiti Akija Shilomioq aqqusinermi naapippaa. Taanna nutaamik qallersaateqarpoq, tamaaniippullu kisimiillutik. v30 Taava Akijap qallersaanni nutaaq sissorlugu aggorpaa aqqaneq-marlunngorlugu. v31 Jeroboamilu oqarfigaa: »Aggornerit qulit tigukkit, Naalakkammi Israelip Guutiata oqarfigeqquaatit: Salomo kunngeqarfianik arsaassavara naggueqatigiillu ilaat qulit ilinnut tunniullugit; v32 naggueqatigiilli ilaat ataaseq pigiinnassavaa kiffara Daavi pissutigalugu Jerusalemilu, illoqarfik Israelip naggueqatigiissortaasa akornanni qinersimasara pissutigalugu. v33 Taamaaliussaanga tunummannga Sidonimiullu guutigisaat Astarte Moabillu guutigisaa Kemoshi Ammonikkullu guutigisaat Milkomi pallorfigisimammatigit, aqqutigeqqusakkalu ingerlavigisimanngimmatigit uangalu isinni eqqortuusut malinnagit, Salomollu ataataa Daavi assiginagu inatsisikka malittarisassiakkalu naalassimanngimmatigit. v34 Kisianni kunngiussusianik tamarmiusumik arsaarnianngilara; inuutillugu naalagaanerutiinnarniarpara pissutigalugu kiffara Daavi qinigara, taassuma peqqussutikka inatsisikkalu naalammagit. v35 Kisianni ernera kunngeqarfianik arsaarumaarpara illillu naggueqatigiinnut qulinut naalaganngortillutit. v36 Erneranut naggueqatigiit ataatsit pigiinnartissavakka kiffara Daavi kiinnama saani qaammaqquteqartuaqqullugu Jerusalemimi, illoqarfimmi aterma inigisassaatut qinersimasanni. v37 Illit qinerpakkit naalagaaffigiumasannut tamanut naalagaasussanngortillutit Israelimullu kunngiusussanngortillutit. v38 Peqqussutikka tamaasa naalakkukkit ingerlavigeqqusakka ingerlavigalugit uanga isinni eqqortuusut malillugit ileqqoreqqusakkalu peqqussutikkalu naalallugit, soorlu kiffara Daavi taamaaliorsimasoq, taava najorumaarpakkit illuliuukkumaarlutillu Daavimut illuliarisattut qajannaatsigisumik; Israelilu ilinnut tunniukkumaarpara. v39 Taamaaliornikkulli Daavip kinguaavi nikanarsassavakka, kisianni taamaattuartussaanngitsumik.«
v40 Salomop Jeroboami toqunniaraluarpaa, Jeroboamili qimaavoq Egyptenip kunngianut Shishakimut, Salomolu toqutserlugu Egyptenimiippoq.
v41 Salomop oqaluttuassartai, naammassisai tamarmik ilisimassusialu, Salomop Nalunaarsuutaani allassimapput. v42 Salomop ukiuni 40-ni Jerusalemimi Israeli tamaat naalakkersorpaa. v43 Salomo siuaasamini qasuersaalerpoq ataatamilu Daavip illoqarfiani ilineqarluni, erneralu Rehabeami kingoraarlugu kunnginngorpoq.