v1 Tamatuma nalaani Jeroboamip ernera Abija napparsimalerpoq. v2 Taava Jeroboami nuliaminut oqarpoq: »Allanik atukkersorlutit Jeroboamip nuliarigaatit ilisarnarunnaarsillugu Shilomukarit. Tassani najugaqarpoq pruffiiti Akija; taanna tassaavoq inuiannut ukununnga kunnginngorumaarnissannik siulittuisoq. v3 Timiusanik qulinik kaagialunnillu qummuattamillu tungusunnitsuummik imalimmik nassarlutit orniguk. Taassuma oqaluttuutissavaatit nukappiaqqap qanoq piumaarneranik.« v4 Jeroboamip nulia taamaaliorpoq. Shilomukarpoq Akijalu illuanut iserfigalugu. Akija isigisaqanngilaq utoqqalinermik quertinissimagami. v5 Naalakkalli Akija oqarfigisimavaa: »Jeroboamip nulia aggerpoq ernermi napparsimanera pillugu siunersiorniarlutit. Ima imalu oqarfigiumaarpat. Ilisarnarunnaarsarsimalluni tikiutissaaq.«
v6 Akijap tusaaleramiuk matukkut isilerluni pisuppalunnera oqarfigaa: »Jeroboamip nulia, iserniarit! Sooq ilisarnarunnaarsaravit? Artornartumik nalunaarutissaqarfigaakkit. v7 Jeroboami oqarfigiartoruk: Ima oqarpoq Naalagaq Israelip Guutia: Inuiaqatinnit allanit pingaarnerulersikkaluarpagit uanga innuttannut Israelimut naalagaaninngortillutit; v8 Daavikkut kunngiussusiannik arsaarlugit naalagaaffik ilinnut tunniukkaluarpara. Kisianni assiginngilat kiffara Daavi uanga peqqussutinnut naalattoq uummatimigullu iluunngarluni uannik malinnittoq tamatigut uanga isinni eqqortuusumik iliuuseqarluni. v9 Kunnginit siulinnit tamanit ajornerusumik iliorputit, imminullu allanik guutiliuupputit kuisanillu guutilialiorlutit narrutsatsillunga tunullungalu. v10 Taamaattumik Jeroboamikkut ajunaartissavakka: Eqqarleriit Jeroboamikkut angutitaat Israelimiittut tamaasa nungutinniarpakka amiakkuerullugit. Eqqagassanngorlugit piiarumaarpakka annat piiarneqartarnerattut – nungulluinnarlugit. v11 Eqqarleriit Jeroboamikkut illoqarfimmi toqusortaat qimminit nerineqassapput, nunaannarmilu toqusortaat qilaap timmiaasa nerissavaat. Naalagarmi taama oqaluppoq! v12 Maanna angerlarniarit! Illoqarfimmut tummarniariaruit nukappiaraq toqussaaq! v13 Israelimiut tamarmik upputigissavaat ilineqarneranilu najuutissallutik, taannami eqqarleriinni Jeroboamikkunni ilivermut ilineqartutuaassaaq tassaagami Naalakkap Israelip Guutiata eqqarleriinni Jeroboamikkunni ajunngitsorsiffigisimasatuaa. v14 Taavali Naalagaq Israelimi kunngeqalersitsiumaarpoq eqqarleriinnik Jeroboamikkunnik maanna ullumi nungutitsisussamik. Maanna taamaaliorfissanngorpoq, tassa maannakkumiit! v15 Naalakkallu Israelimiut pillassavai ivissuartut imermi aalatinneqartutut, Israelimiullu nunamit naggorissumit siuaasaannut tunniussaminit nusullugit peerumaarpai kuussuullu Eufratip illuatungaanut siammartillugit napasunik Asheramut pigititanik sanasimammata Naalagarlu narrunarsarsimallugu. v16 Israeli imminiiginnarumaarpaa ajortuliat Jeroboamip nammineq piliai Israelimullu piliarititai pillugit.«
v17 Taava Jeroboamip nulia aallarpoq Tirsamullu pilluni. Illup matuata alloriusaanut tutisorlu nukappiaraq toquvoq. v18 Israelimiut tamakkerlutik ilineqarnerani peqataapput upputigalugulu, taamalu eqquuppoq Naalakkap kiffamigut pruffiitikkut Akijakkut oqaatigisaa.
v19 Jeroboamip oqaluttuassartai allat – sorsuttarneri qanorlu naalakkersuinera – Israelip Kunngiisa Nalunaarsuutaanni allassimapput. v20 Jeroboami ukiuni 22-ni kunngiuvoq. Taava siuaasamini qasuersaalerpoq, erneralu Nadabi ataatani kingoraarlugu kunnginngorpoq.
v21 Salomop ernera Rehabeami Judami kunnginngorpoq. Kunnginngorami 41-nik ukioqarpoq, ukiunilu 17-ini naalakkersuivoq Jerusalemimi – illoqarfimmi Naalakkap Israelip naggueqatigiissortaanit tamanit atermi inigisassaatut qinersimasaani. Anaanaa Ammonikkuusoq Na'amamik ateqarpoq.
v22 Judamiut Naalakkap isaani ajortumik iliorput, ajortuliamikkullu Naalagaq siuaasaminnit annerusumik kamatsippaat. v23 Taakkuttaaq qattunernik pilliiffissaliortarput ujaqqanillu napasuliortarlutik napasullu Asheramut pigititat sanasarlugit qattunerni portusuuni tamani orpiillu qorsuusut ataanni tamani; v24 allaammi nunami tassani anguteqarpoq naalaffimmi atortittartunik. Inuiaat Naalakkap Israelikkut nunagiligassaannit peersissimasaasa ileqqui maajunnartut tamaasa issuartarpaat.
v25 Ukiut kunngip Rehabeamip naalakkersuiffiisa tallimassaanni Egyptenip kunngia Shishaki Jerusalemimut sorsukkiartorpoq. v26 Erlinnartuutit Naalakkap naalaffianiittut kunngillu illussaarsuaniittut tamakkivillugit tiguarpai. Aammattaaq tiguai eqqortinnaveeqqutit kuultiusut Salomop sanasimasai, v27 kunngilu Rehabeami taakkua taartissaannik eqqortinnaveeqqutiliorpoq kanngussaasunik. Taakku paaritippai kunngimik paarsisut illussaarsuup isaaffianik nakkutilliisut naalagaannut. v28 Kunngip naalaffimmut iserneri tamaasa kunngimik paarsisut eqqortinnaveeqqutit taakku atortarpaat kingornatigullu kunngimik paarsisut inaannut ileqqittarlugit. v29 Rehabeamip oqaluttuassartai allat naammassisaalu tamarmik Judap Kunngiisa Nalunaarsuutaanni allassimapput. v30 Rehabeami Jeroboamilu sorsuuttuarsimapput. v31 Rehabeami siuaasamini qasuersaalerpoq taakkualu iliveqarfianni Daavip Illoqarfianiittumi ilineqarluni. Anaanaa Ammonikkuusoq Na'amamik ateqarpoq. Ernera Abija ataatani kingoraarlugu kunnginngorpoq.