v1 Kunngi Daavi utoqqalingaarami qipittorneqaraluaraangamiluunniit uunnanneq sapilerpoq. v2 Taava kiffaasa oqarfigaat: »Qinerliuttariaqaraluarputit, naalagaq kunngi, niviarsiamik ilinnut kiffartortussamik paaqqinnittussamillu, kunngi. Pakkussimaleraangakku, naalagaq kunngi, uunnattassaatit.« v3 Israelimi tamarmi ujarlerput arnamik inuusuttumik pinnersumik, pissarsiaraallu Abishagi Shunemimioq; taannalu kunngimukaappaat. v4 Niviarsiaq assut pinnerpoq. Taassuma isumagaa paaqqillugulu; kunngilli innaatinngilaa.
v5 Adonija, Haggitip ernera, assut imminut pingaartittuuvoq, oqarporlu: »Uanga kunnginngortussaavunga.« Qamutinik hestinillu pissarsivoq sakkutuussarsillunilu angutinik 50-inik paarsisussaminik. v6 Ataataata naqqissunngisaannarsimavaa imalu oqarfigisimanagu: »Sooq-una taamaaliortutit?« Adonija angutaavoq inugissoq, Absalomimillu nukarliulaannguarpoq tulleralugu. v7 Joabi Serujap ernera palasilu Ebjatari isumaqatiginiarpai, taakkulu Adonijamut ililiupput. v8 Kisianni palasi Sadoki, Benaja Jojadap ernera, pruffiiti Natani, Shim'i, Re'i Daavillu sakkutuui sorsullammaat Adonijamut ililiutinngillat.
v9 Taava Adonija savanik, ussinnik nersutinillu puallarsakkanik toqutsivoq Zoheletip Ujaraata Rogelip puilasuata killinganiittup saniani, qaaqquaalu qatanngutini kunngip erneri tamaasa Judakkuusullu kunngimi kiffartortuusut tamaasa. v10 Kisianni pruffiiti Natani, Benaja, sakkutuut sorsullammaat qatanngunnilu Salomo qaaqqunngilai. v11 Taava Natanip Salomop anaanaa Batseba oqarfigaa: »Tusarpiuk Adonija, Haggitip ernera, naalagarput Daavi arajutsisillugu kunnginngorsimasoq? v12 Illit inuunerit ernerpillu Salomop inuunera annaassinnaaniassagakkit maanna siunnersorumavakkit v13 erniinnaq kunngimut Daavimukaqqullutit imalu oqarfigalugu: ›Uppernarsaasimannginnerpit, naalagaq kunngi, ernera Salomo kingoraarlutit kunnginngussasoq issiavissaarsuannilu issiassalluni? Taavami sooq Adonija kunnginngorpa?‹ v14 Tassaniillutit kunngi oqaloqatigitillugu takkukkumaarpunga oqaatsivillu eqqortuunerat uppernarsarlugu.« v15 Batseba kunngimukarpoq sinittarfianullu iserluni. Kunngi utoqqalisimaqaaq, Abishagillu Shunemimiup paaqqivaa. v16 Batsebap sikiffigaa kiinni nunamut tutsillugu. »Suniarpit?« kunngi aperivoq. v17 Batseba akivoq: »Naalagaq! Naalagaq Guutit naqqissigalugu uppernarsaareeraluarputit ernera Salomo kingoraarlutit kunnginngussasoq issiavissaarsuannilu issiassalluni. v18 Maannali Adonija kunnginngorsimavoq illit sianiginngisannik. v19 Ussinnik, nersutinik puallarsakkanik savanillu amerlasuunik toqutsisimavoq qaaqqusimallugillu kunngip erneri tamaasa, palasi Ebjatari sakkutuullu naalagaanertaat Joabi. Kisianni kiffat Salomo qaaqqusimanngilaa. v20 Naalagaq kunngi, Israelikkut tamarmik pissangallutik qanoq oqaaseqarumaarnissat utaqqivaat. Nalunaarfigitigut naalagara kunngi kingoraarlugu kina kunnginngussasoq. v21 Taamaaliunngikkuit siuaasanni qasuersaalereeruit uanga erneralu Salomo pisuutitaajumaarpugut.«
v22 Tassaniilluni kunngi suli oqaloqatigigaa pruffiiti Natani tikiuppoq. v23 Kunngi nalunaarfigineqarpoq pruffiiti Natani tikiuttoq, kunngimullu sassarami nunamut pallorfigaa. v24 Natani oqarpoq: »Naalagaq kunngi, oqarsimavit Adonija kingoraarlutit kunnginngussasoq issiavissaarsuannilu issiassalluni? v25 Taanna ullumi aterpoq ussinnik nersutinillu puallarsakkanik savanillu amerlaqisunik toqutsiartorluni qaaqqusimavaalu kunngip erneri tamaasa sakkutuunullu naalagaanertaasut palasilu Ebjatari. Maanna taakkua Adonija nereqatigaat imeqatigalugulu, suaartarpullu: Kunngi Adonija inuummersorli! v26 Uangali kiffat palasilu Sadoki Benajalu Jojadap ernera kiffallu Salomo qaaqqunngilaatigut. v27 Naalagaq kunngi, tamakku illit peqqussutigisimavigit uangalu kiffat ilisimatinnanga kina kingoraarlutit kunnginngussanersoq?« v28 Kunngi Daavi akivoq: »Batseba qaaqqujuk!« Batseballu sassarfigimmani saavani qeqarluni v29 kunngi uppernarsaavoq oqarluni: »Ilumut uumammat Naalagaq navianartunit tamanit uannik aniguisitsisimasoq: v30 Naalagaq Israelip Guutia naqqissigalugu uppernarsaasimavunga ernerit Salomo kingoraarlunga kunnginngussasoq issiavissaarsuarmilu issiassalluni taarserlunga. Taama uppernarsaanera ullumi eqqortinniarpara.« v31 Batsebap kunngi nunamut pallorfigaa oqarlunilu: »Qanortoq naalagara kunngi Daavi naassaanngitsumik inuugili!«
v32 Kunngi Daavi oqarpoq: »Palasi Sadoki pruffiitilu Natani Benajalu Jojadap ernera qaaqqutissigit.« Tikiummata kunngip v33 oqarfigai: »Angutitakka katersorsigit, erneralu Salomo uanga siutitoorsuaatinnut qaqitillugu Gihonimut atertissiuk. v34 Tassani palasip Sadokip pruffiitillu Natanip tanissavaat Israelimut kunnginngortillugu, sulluartaammillu qarlortassaasi suaarlusilu: Kunngi Salomo inuummersorli! v35 Taava ingerlaqatigalugu tamaanga majuassaasi, issiavissaarsuannullu ingissaaq. Kingoraarlunga kunngiussaaq, Israelimut Judamullu naalagaaninngortippara.« v36 Benajap Jojadap ernerata kunngi akivaa: »Taama pili! Qanortoq Naalagaq, naalakkama kunngip Guutia, taamatuttaaq oqarli! v37 Naalakkap Salomo najorliuk ilinnik najuisimanermisut, issiavissaarsualu illit pinnit suli pissaanerulersikkiliuk, naalagaq kunngi.«
v38 Taava palasi Sadoki, pruffiiti Natani, Benaja Jojadap ernera, kreterit pleterillu aterput, Salomolu kunngip Daavip siutitoorsuaataanut qaqitippaat Gihonimullu ingerlallugu. v39 Palasip Sadokip nassuk uuliamik imalik Tupermit tiguaa Salomolu tanillugu. Sulluartaammik qarlortarput, tamarmillu suaarput: »Kunngi Salomo inuummersorli!« v40 Taava tamarmik Salomo majuaqatigaat, qarlortarpullu, nuannaangaaramillu nuna qulloortingajappaat. v41 Adonijap qaaqqusaasalu tamarmik nerereerlutillu nipiliorneq tusaalerpaat. Joabillu sulluartaatip nipaa tusaaleramiuk oqarpoq: »Soormitaavaana illoqarfimmi nipiliortorsuit?«
v42 Suli oqalutsillugu Jonatani palasip Ebjatarip ernera tikiuppoq. Adonija oqarpoq: »Qaagit, illit tatiginartuuvutit. Ajunngitsumik tusagassaateqarunnarsivutit!« v43 Jonatanilli Adonija akivaa: »Naamivik, kunngip Daavip naalakkatta Salomo kunnginngortippaa. v44 Salomomut ilagitillugit kunngip aallartissimavai palasi Sadoki, pruffiiti Natani, Benaja Jojadap ernera kreterit pleterillu; taakkualu Salomo kunngip siutitoorsuaataanut qaqitissimavaat, v45 palasillu Sadokip pruffiitillu Natanip Gihonimi tanissimavaat kunnginngortillugu. Tassanngaanniit nuannaarlutik majuarsimapput illoqarfimmilu nuannaarneq naaffeqanngilaq. Tassaana tamanna tusaasinnaagissi. v46 Salomo kunngip issiavissaarsuani issialiinnanngilaq v47 aammattaarli kunngip angutitai naalakkatsinni kunngi Daavimiissimapput pilluaqqusimallugulu oqarlutik: Qanortoq Guutivit Salomop aqqa illit atinnit suli annerulersikkiliuk issiavissaarsualu illit pinnit pissaanerulersillugu! Kunngilu innanngavimminiilluni qinulluni sikippoq. v48 Kunngilu oqarsimavoq: Unnersiutigineqarli Naalagaq Israelip Guutia kingoraartissannik issiavissaarsuarmut ingititsisoq uannullu tamanna takusinnaatillugu.« v49 Adonijap qaaqqusai tamarmik annilaaqaat anillutillu tamanut tamaanga aallararlutik. v50 Adonijap Salomo siooragigamiuk tuaviinnaq pilliivimmukarluni nassuusartai tigutiterpai.
v51 Salomo nalunaarfigineqarpoq Adonijap ersigaluni pilliiviup nassuusartai tigutitersimagai oqarluni: »Kunngip Salomop uppernarsaaffigeqqaassavaanga kiffani panamik toqutikkumanagu.« v52 Salomo oqarpoq: »Ilumoorfigiguninga sumilluunniit pinerlineqassanngilaq, ajortumilli iliorsimasutut paasinarsiguni toqutaassaaq!« v53 Taava kunngi Salomo oqariartortitsivoq pilliivimmit peersinneqassasoq. Adonijap kunngi Salomo pallorfigiartorpaa. Salomop oqarfigaa: »Illunnut angerlarniarit.«