v1 Aramæerit kunngiata Ben-Hadadip sakkutuuni tamaasa katersorpai. Kunngit 32-t hestinik qamutinillu nassataqartut sorsukkiartoqatigai, Samariamullu ingerlaarput ungujartorlugu saassukkiartorlugulu. v2 Ben-Hadadi illoqarfimmukartitsivoq Israelip kunngia Akabi nalunaarfigiartortillugu: v3 »Ben-Hadadip oqarfigeqquaatit: Sølviutitit kuultiutitillu tassaapput uanga pikka, taamatuttaaq nuliatit kusanartut ernitillu!« v4 Israelip kunngia akivoq: »Soorlu oqartutit naalagaq kunngi: Uanga pigisakkalu tamaasa pigaatit.« v5 Oqariartortitat Akabimut tikiuteqqikkamik oqarput: »Ben-Hadadip ima oqaqquaatigut: Nalunaarfigitereerpakkit sølviutitit kuultiutitillu, nuliatit ernitillu uannut tunniutissagitit. v6 Aqaguli kiffakka ilinnukartissavakka, taakkualu illit illussaarsuat kunngikkormiortavillu illui ujarlerfigereerunikkit erligisatit tamaasa tigooqqariarlugit aallarukkumaarpaat.« v7 Taava Israelip kunngiata nunami utoqqaanertat tamaasa qaaqqutippai oqarfigalugillu: »Paasisinnaavarsi angut taanna ajortumik pilersaaruteqartoq! Oqariartorfigitimmanga nuliakka ernikkalu, sølviutikka kuultiutikkalu piumallugit piumasaanik erliguutinngikkaluarpara; tamannali naammagisimanngilaa.« v8 Utoqqaanertat tamarmik inuillu tamarmik oqarfigaat: »Naalaqinagu, nakkaannarfigeqinagulu!« v9 Taava Akabip Ben-Hadadip aallartitai oqarfigai: »Naalagara kunngi oqarfigissavarsi: Siullermik oqariartortitsigavit piumasarisatit tamaasa akuerigaluarpakka, unali piumasat kingulleq akuerisinnaanngilara!« Aallartitat taama oqqersorneqarlutik uterput. v10 Ben-Hadadilli Akabi aallartitsivigeqqippaa oqarfigitillugulu: »Guutit pillaqattaartuarilinnga Samariami pujoralammik angutitama tamarmik immikkut itumammiorisinnaasaannik amiakkuutitaqassappat!« v11 Israelip kunngiata akivaa: »Ben-Hadadi oqarfiguuk: Panamininngooq sanerarmiulersoq usorsisimaassanngilaq panaminik sanerarmiuminik peersisutut!« v12 Ben-Hadadi taama nalunaarfigineqarpoq kunngeqatinilu illuaqqani erngutsillutik, kiffaminullu oqarpoq: »Saassussinissatsinnut piareersarniaritsi!« Samarialu saassutissallugu piareersarput.
v13 Taava Israelip kunngianut Akabimut pruffiitimik sassartoqarpoq taannalu oqarfigalugu: »Ima oqarpoq Naalagaq: Sakkutoorpassuit uku takuigit? Taakku ullumi illit assannut tunniukkumaarpakka paaseqqullugu tassaasunga Naalagaq.« v14 Akabilu aperimmat: »Kikkut ikiortigalugit?« pruffiiti akivoq: »Naalagaq oqarpoq: Naalagaatitat sakkutuui.« Aperimmat: »Kina siulliulluni saassussissava?« pruffiitip akivaa: »Illit!« v15 Akabip naalagaatitat sorsuttartui – angutit 232-t – misissuataarpai kiisalu Israelimiut tamaasa, angutit 7.000-iusut. v16 Ulloqeqqata missaani saassussiartorput Ben-Hadadi kunngillu ilagisai 32-usut illuaqqani erngutsillugit. v17 Naalagaatitat sakkutuui siulliullutik ingerlapput, Ben-Hadadilu nalunaarfigiartorneqarami Samariamiut sakkutuuinik orniguttoqartoq v18 taava oqarpoq: »Eqqisseqatigiinnissaq siunertaralugu orniguttuugaluarpata uumatillugit tigusarissavasi! Sorsukkiartortuugaluarpata uumatillugit tigusarissavasi!« v19 Naalagaatitat sorsuttartui illoqarfimmiit anillaassimapput kunngip sakkutuuinik malitseqarlutik, v20 tamanilu toqoraapput; Aramæerit qimaapput Israelimiunit malersorneqarlutik, Aramæerilli kunngiat Ben-Hadadi hestit qimussersullu ilagalugit qimaanasuarluni aniguivoq. v21 Taava Israelip kunngia saassussivoq hestit qamutillu tigusaralugit Aramilu ajorsartingaarlugu.
v22 Pruffiitilli Israelip kunngia sassarfigeqqippaa oqarfigalugulu: »Sorsuleqqinnissamut piareersarniarit! Qanoq iliornissat eqqarsaatigilluassavat, Aramimmi kunngia aappaagu tikiuteqqikkumaarpoq saassutissallutillu.« v23 Aramæerit kunngiat angutitaasa oqarfigaat: »Guutiat qaqqanut guutiuvoq, taamaattumik ajugaaffigaatigut. Tamatumuuna narsaannarmi saassukkutsigit qularnanngitsumik ajugaaffigissavavut. v24 Imaaliussaatit: Kunngit tamaasa soraarsissavatit naalagaatitanillu taarserlugit! v25 Taamaalioreeruit sakkutuussarsissaatit annaasimasavit amerlaqataannik, pissarsissaatillu hestinik qamutinillu siornatigut pigisarigaluavit amerlaqataannik, taava Israelimiut narsaannarmi saassukkumaarpavut ajornanngitsumillu ajugaaffigisinnaajumaarlugit.« Siunnersuutaat kunngip akuersaarpaa.
v26 Aappaaguani Ben-Hadadip sakkutuuni Aramæeriusut misissuataarpai Afekimullu majuarluni Israeli saassutissallugu. v27 Israelimiuttaaq sorsunnissamut piareeramik taquassarsereerlutillu akeqqat sassarfigaat. Israelimiut akeqqamik akerpiaanni tammaassallutik inissikkamik ikingaaramik soorlu tassa savaasarpaat marlussunnguit, Aramæerilli narsaq ulikkaavissimavaat. v28 Taava Guutip kiffaa Israelip kunngianut sassarpoq oqarfigalugulu: »Naalagaq oqarpoq: Aramæerit oqarmata Naalagaq qaqqanut guutiusoq narsanut pinnani taava sakkutoorpassuit uku illit assannut tunniutissavakka paaseqqullusiuk tassaasunga Naalagaq.« v29 Ulluni arfineq-marlunni akileriillutik tammaarsimareerlutik ullut arfineq-aappaanni akiuutilerput. Israelimiut Aramæerit toqorarpaat, ullormi ataatsimi angutit pisuinnaat 100.000-it. v30 Amiakkuusut illoqarfimmut Afekimut qimaapput, tassungalu isermata qarmai nakkaapput angutit amiakkuusut 27.000-it sinneruttut nanerlugit. Ben-Hadadilu qimaalluni aamma illoqarfimmut isersimavoq inimut ilorlermut qimaalluni.
v31 Angutitaasa oqarfigaat: »Israelip kunngii saamasuusut tusaamavavut. Puunik makisequtserluta allunaasarsuarnillu qungaserutserluta Israelip kunngianukarta, taava immaqa inuunerit asattuutissavaa.« v32 Puunik makisequtserput allunaasarsuarnillu qungasequtserlutik, Israelillu kunngianukarput oqarlutillu: »Kiffavit Ben-Hadadip qinnuigaatit inuunini asattuuteqqullugu.« Kunngi Akabi akivoq: »Suli inuua? Qatanngutittut isigaara!« v33 Taama oqarnera angutit ajunngitsumik neriussaarinertut paasivaat, upperalugulu oqarput: »Ilumut, Ben-Hadadi ilinnut qatanngutaasutut ippoq!« Taava Akabi oqarpoq: »Maanngartinniarsiuk!« Ben-Hadadi tikiummat Akabip qamutiminut qaqitippaa. v34 Ben-Hadadi Akabimut oqarpoq: »Illoqarfiit ataatama illit ataatannit tiguarsimasai utertissavakka, illoqarfiullu Damaskusip aqquserngisa ilaanni niuerniarfiliorumaarputit soorlu ataataga Samariami taamatorpiaq iliorsimasoq.« Akabip akivaa: »Taama isumaqatigiissinnaagutta iperarneqartissavakkit!« Taama isumaqatigiissuteqarfigereeramiuk iperarneqartippaa.
v35 Pruffiitit ilaat Naalakkap peqqusineratigut ikinngutiminut oqarpoq: »Anaalinnga!« Taannali taamaaliornissaminut nangaasoormat v36 oqarfigaa: »Naalagaq naalannginnakku qimakkumma løvimit toqunneqassaatit.« Oqarfigisaata qimakkamiuk løveq naammattoorpaa, løvillu toquppaa. v37 Pruffiitip angut alla naapikkamiuk oqarfigaa: »Anaalinnga!« Angutillu anaalerpaa aanaalersorlugu. v38 Taava pruffiiti aqqusinermut kunngip aggerluni ingerlavissaanut inissippoq. Isini asserlugit sattaasersimagami ilisarsaajunnaarsimavoq. v39 Kunngi sanioqqutilermat pruffiitip suaarpaa: »Kiffat sorsoqataasimavoq. Sorsutsilluta angutip ornippaanga tigusaasimasut ilaannik ilaqarluni oqarfigalungalu: Angut una alaatsinaassavat. Maqaasineqalersoq nalunaarutigineqarpat tamanna illit inuuninnik akeqassaaq, imaluunniit sølvimik talentip ataatsip nalinganik akiliissaatit. v40 Kiffalli assigiinngitsunik ulapputeqaqigami angut tammaariataarpaa.« Taava Israelip kunngiata oqarfigaa: »Taama oqaravit imminut eqqartuutereerputit.« v41 Kunngi taama oqartorlu pruffiitip sattaatini peerasuarpaa, Israelillu kunngiata ilisarilerpaa tassaasoq pruffiitit ilaat. v42 Pruffiiti kunngimut oqarpoq: »Ima oqarpoq Naalagaq: Angut suujunnaarsitassatut aalajangiussimasara illit iperagaatikkakku tassunga taarsiullutit toqutaassaatit, innuttatillu taassuma innuttaanut taarsiullutik toqutaassapput.« v43 Taava Israelip kunngia ajuummisimalluni kamassimallunilu Samariamut angerlarpoq.