v1 Kingorna ima pisoqarpoq: Naboti Jizre'elimioq viinnequteqarfiuteqarpoq Jizre'elimi Samariap kunngiata Akabip illussaarsuata killinnguaniittumik. v2 Akabi Nabotimut oqarpoq: »Viinnequteqarfigisat pilara nerisassanut akussanik naatitsivigissagakku, illumami killinnguaniimmat. Taava taarsiullugu viinnequteqarfimmik pitsaanerusumik tunissavakkit, imaluunniit iluarinerugukku akianik akilissavagit.« v3 Nabotili Akabimut oqarpoq: »Siuaasannit kingornussama ilinnut tunniunneqarnissaa qanortoq Naalakkamit ajornartinneqarili!« v4 Akabi angerlarpoq Nabotip Jizre'elimiup siuaasaminit kingornussani tunniukkumanagit oqaasii ajuummisimassutigalugit kamaatigalugillu, siniffimminullu innarpoq iikkamut saalluni neriumananilu. v5 Taava nulia Jezabeli iserpoq oqarfigalugulu: »Sooq ajuummisimaqaat neriumanallu?« v6 Akabip nuliani oqaluttuuppaa Naboti Jizre'elimioq saaffigisimagaluarlugu oqarfigisimagaluarlugulu: »Viinnequteqarfigisat pilara aningaasanik akilerlugu, iluarinerugukkuluunniit viinnequteqarfimmik allamik taarserlugu,« oqarsimasorli: »Viinnequteqarfiutiga ilinnut tunniukkumanngilara!« v7 Nuliata Jezabelip oqarfigaa: »Illinuna Israelimut kunngiusutit! Makinniarit nerillutit nuannaarlutillu. Nabotip Jizre'elimiup viinnequteqarfiata pissarsiarinissaa uanga isumagissavara.«
v8 Taava Jezabeli allappoq Akabimut allagaritillugit. Akabip naqitsisaanik naqissuserpai Nabotillu illoqarfiani utoqqaanertaasunut akimanertaasunullu siunnersuisoqatigiinnut ilaasortaaqataanut nassiullugit. v9 Allappoq: »Iisinnginniartoqarnissaa suaarutigisiuk, Nabotilu inunni akimanerpaatut inississiuk v10 akianilu inupilunnik marlunnik inissiillusi. Taakku nalunaajaassapput Guuti kunngilu Nabotimut perloqqusimanerarlugit. Taava illoqarfimmit anisillugu ujaqqanik milloorlugu toqussavarsi!« v11 Nunaqqatai utoqqaanertat akimanertallu illoqarfiani siunnersuisoqatigiinnut ilaasortat Jezabelip allakkamini peqqusinera malillugu iliorput. v12 Iisinnginniartoqarnissaa suaarutigaat Nabotilu inunni akimanerpaatut inissillugu. v13 Inupiluit marluk iserput Nabotillu akerpiaani inissillutik; katersorsimasullu tutsaanni unnerluutigaat oqarlutik: »Nabotip Guuti kunngilu perloqqusimavai«. Taava illoqarfiup avataanukaappaat ujaqqanillu milloorlugu toqullugu. v14 Taamaalioreeramik Jezabeli nalunaarfigitippaat: »Maanna Naboti ujaqqanik milloorneqarluni toqunneqareerpoq.« v15 Jezabelip Naboti ujaqqanik milloorneqarluni toqunneqartoq tusarniariaramiuk Akabi oqarfigaa: »Nabotip Jizre'elimiup viinnequteqarfiutaa akilersillugu ilinnut tunniukkumanngisaa pigisassattut tiguniaruk, Naboti toqoreerpoq.« v16 Akabip tusaramiuk Naboti toqusoq Jizre'elimiup taassuma viinnequteqarfianukarpoq viinnequteqarfimminut ilanngukkiartorlugu.
v17 Naalakkalli oqaasia Eliamut Tishbemiumut pivoq imaalluni: v18 »Aterit Israelip kunngia Akabi Samariami najugaqartoq naapigiarlugu, maanna Nabotip viinnequteqarfianiippoq tassunnarami pigisassamisut tigujartorlugu. v19 Akabi oqarfigissavat: Ima oqarpoq Naalagaq: Toqutseriarlutit toqutavit pigisaa pigilereerpiuk? Aamma oqarfiguuk: Ima oqarpoq Naalagaq: Qimmit Nabotip aavanik aluttuiffimminni aamma illit aat aluttorumaarpaat.« v20 Akabi Eliamut oqarpoq: »Aammaasiit nanivarma, akerartortiga!« Elia akivoq: »Tassami nanivakkit! Naalakkap isaani ajortumik iliornermut tunniutiinnarsimagavit v21 ajunaarnermik ilinnut nalliutitsiumaarpunga kinguaassatillu igitassatut piiarlugit, tassa Akabip eqqarliisa angutitaat tamaasa Israelimi nungutillugit amiakkuerutivillugit. v22 Inoqutitit iliuuseqarfigiumaarpakka Jeroboamip Nebatip ernerata eqqarliinik Bashallu Akijap ernerata eqqarliinik iliorfiginninnerma assinganik. Narrutsatsissimavarmami Israelimiullu ajortuliortillugit. v23 Aammattaaq Jezabeli pillugu Naalagaq oqarsimavoq: Jezabeli qimmit neriumaarpaat Jizre'eli kaajallallugu qarmarsuup killingani. v24 Eqqarleriit Akabikkut illoqarfimmi toqusortaat qimminit nerineqassapput, narsaammilu toqusortaat qilaap timmiaasa nerissavaat.«
v25 Siornatigut Akabitut Naalakkap isaani ajortumik iliornermut imminik akigisoqanngisaannarsimavoq; Akabimi nuliaminit Jezabelimit pututinneqarluni taamaaliorpoq. v26 Ajornerpaamilli iliorpoq guutipalaat guutisiorfigigamigit Amorikkut Naalakkap Israelikkunnit qimaatissimasaasa iliornerattorluinnaq.
v27 Akabip Eliap oqaasii taakku tusaramigit atisani alittorpai puunillu atisilluni iisinnginniarlunilu; allaallu atisani taanna atuinnarlugu sinittarpoq, nikallungallunilu angalaarpoq. v28 Taava Naalakkap oqaasia Eliamut Tishbemiumut pivoq imaalluni: v29 »Takuiuk Akabip qanoq maniguuffigitigigaanga? Maniguuffigilersimammanga maanna inoqutai ajunaartinnianngilakka inuutillugu, aatsaalli ernerata nalaani.«