v1 Ukiuni pingasuni Arami Israelilu eqqissisimaqatigiipput imminnut sorsuunnatik. v2 Ukiulli pingajuanni Joshafati Judap kunngia Israelip kunngianukarpoq. v3 Israelip kunngia sakkutuuminut oqarpoq: »Nalunngilarsi Ramoti Gileadimiittoq uagut pigigaluaripput. Taamaattoq Aramæerit kunngiannit utertinnianngiinnarsimavarput.« v4 Joshafatimullu oqarpoq: »Ramotimut Gileadimiittumut sorsoqatigiumavinga?« Joshafatillu Israelip kunngia akivaa: »Uanga illit peqatigissavakkit, sakkutuuma sakkutuutit, hestiutima hestiutitit!« v5 Joshafatili Israelip kunngianut oqarpoq: »Naalagaq siunersioqqaarallaak!« v6 Taava Israelip kunngiata pruffiitit 400-t missingi katersortippai aperalugillu: »Ramoti Gileadimiittoq sorsuffigissavara, imaluunniit taamaaliussanngilanga?« Akipput: »Saassunniaruk! Naalakkap kunngip assaanut tunniukkumaarpaa.« v7 Joshafatili aperivoq: »Naalakkap pruffiitianik siunersiorsinnaasatsinnik allamik maaniittoqannginnami?« v8 Israelip kunngiata akivaa: »Suli ataatsimik peqaraluarpoq Naalakkamut siunersiuisissinnaasatsinnik, taannali uumigaara ajunngitsumik pinnani ajortuinnarmik siulittuiffigisarmanga. Tassa Mika Jimlap ernera.« Joshafatili oqarpoq: »Kunngi taama oqaluttussaanngilaq!« v9 Taava Israelip kunngiata kunngikkormiut ilaat qaaqquaa oqarfigalugulu: »Mika Jimlap ernera maanngartipallaguk!«
v10 Israelip kunngia Judallu kunngia Joshafati qallersaateqarlutik tamarmik immikkut issiavissaarsuarminni issiapput karrertaajaaffimmi Samariap isaaffiata killinganiittumi, pruffiitillu tamarmik siulittuillutik sioraanniipput. v11 Sidkija Kena'anap ernera imminut saviminermik nassuusaliuussimavoq, oqarporlu: »Ima oqarpoq Naalagaq: Taakkuninnga Aramæerit nassummigassavatit nungutserlugit.« v12 Pruffiitit allat tamarmik taassumatut siulittuipput oqarlutik: »Ramoti Gileadimiittoq saassuguk, ajugaassaatit! Naalakkap illoqarfik kunngip assaanut tunniukkumaarpaa.«
v13 Mikamik aallersitap taanna oqarfigaa: »Tusaagit! Pruffiitit allat isumaqatigiillutik kunngi iluatsitsinissaanik siulittuiffigereerpaat, aamma illit taakkunatut oqalunniarna ajunngitsumik akissuteqarlutit.« v14 Mikali oqarpoq: »Ilumut uumammat Naalagaq: Naalakkap uannut oqaatigeqqusai kisiisa oqaatigissavakka.« v15 Mika tikiummat kunngip oqarfigaa: »Mika, Ramoti Gileadimiittoq sorsuffigissavarput, imaluunniit taamaaliussanngilanga?« Akivoq: »Saassuguk, ajugaajumaarputit! Naalakkap kunngip assaanut tunniutissavaa.« v16 Kunngip akivaa: »Qasseriarlunga uppernarsaasissavagit allat pinnagit ilumoortut kisiisa Naalakkap aqqani uannut oqaatigisassagitit?« v17 Taava Mika oqarpoq: »Takuara Israeli tamarmi qaqqani siammarsimasoq savatut paarsisoqanngitsutut, Naalagarlu oqarpoq: Naalagaqanngillat, tamarmik eqqissillutik angerlaannarlit!« v18 Taava Israelip kunngia Joshafatimut oqarpoq: »Takuammi, soorlu oqarfigereerikkit! Ajunngitsunik pinnani ajortuinnavinnik siulittuiffigisarpaanga.«
v19 Mikali oqarpoq: »Taavami Naalakkap oqaasii tusaakkit! Takuara Naalagaq issiavissaarsuarmini issiasoq qilaallu perpassui saniani qeqartut – talerpiatungaani saamiatungaanilu. v20 Naalagaq oqarpoq: Kiatoq Akabi pilerisaarlugu Ramotimut Gileadimiittumut saassussiartortilliuk tassanilu toqutaatillugu! Taava suaartaatilerput assigiinngitsunik oqalullutik. v21 Taavali anersaaq sassarpoq Naalakkap saavanut pilluni oqarlunilu: Uanga pilerisaassavara! Naalakkap aperimmani qanoq ililluni pilerisaassaneraa v22 anersaaq akivoq: Anissaanga pruffiitiisalu tamarmik qarnini anersaanngorlunga sallutooq. Naalakkap oqarfigaa: Illit pileritsatsissinnaavat, taamaalioriartorit! v23 Tassa Naalakkap maani pruffiitivit qarninut ilisimasaa anersaajuvoq sallutooq, Naalakkammi sioorasaarpaatit ajunaartitaanissannik.«
v24 Sidkijalli Kena'anap ernerata Mika ornillugu isappaa oqarfigalugulu: »Naalakkap anersaavata qimassimaneraminga ilikkut oqalukkumalluni?« v25 Mika akivoq: »Tamanna paasiumaarpat ulloq taanna isertorfissarsiorlutit inimut ilorlermut iseruit!« v26 Israelilli kunngia oqarpoq: »Mika tigusiuk illoqarfiullu qullersaanut Amonimukaallugu kunngillu erneranut Joashimut, v27 oqaritsilu: Kunngi ima oqarpoq: Angut una parnaarussiuk imiinnarmik timiusaannarmillu inuussuteqartillugu ajornanga uternissama tungaanut.« v28 Taava Mika oqarpoq: »Ilumut ajornak utissaguit, taava uakkut oqaluttoq tassaasimassanngilaq Naalagaq.«
– Oqarporlu: »Naalaaritsi inuiaqatigiit tamassi!« –
v29 Taava Israelip kunngia Akabi Judallu kunngia Joshafati Ramotimut Gileadimiittumut majuarput sorsukkiartorlutik. v30 Israelip kunngia Joshafatimut oqarpoq: »Ilisarnarunnaarsarniarpunga akiuutilersinnanga, illit nammineq atisatit atuinnakkit.« Taava Israelip kunngia ilisarnarunnaarsarpoq, akiuutilerpullu. v31 Aramip kunngiata qamutimini sorsuutini naalagaasut – katillutik 32-usut – naalakkersimavai allat pinnagit Israelip kunngia kisiviat saassuteqqullugu. v32 Qamutit sorsuutit naalagaasa Joshafati takugamikku oqarput: »Unaassaaq Israelip kunngia!« Saaterpaallu saassunniarlugu. Joshafatili ikioqqulluni suaartarmat v33 qamutillu sorsuutit naalagaasa paasigamikku taanna tassaanngitsoq Israelip kunngia tunuarput.
v34 Angulli taamungaannaq piseriarami Israelip kunngia eqqorpaa assiaqutit sakiarortinnaveeqqutillu akunneqqullugit. Kunngi qimussiussisuminut oqarpoq: »Uterit akiuuttunillu qimagutitillunga, ikiligaavunga!« v35 Naak sorsunneq ulloq taanna sakkortusiartuinnaraluartoq kunngip qamutimini qeqarluni Aramæerinut sorsunneq malinnaaffigisinnaavaa. Unnukkulli toquvoq, ikiatalu aanaarnera qamutit qaavannut kuuppoq. v36 Seqernup tarrilernerani Israelimiut sakkutuuisa akornanni suaartarpaluttoqarpoq: »Angutit tamarmik illoqarfimminnut nunaminnullu uterlit!« v37 Kunngi toquvoq timaalu Samariamukaanneqarpoq.
Kunngi Samariami ilineqarpoq. v38 Samariami tasiliami kunngip qamutai imermik kuerarlugit salinneqarmata qimmit kunngip aava aluttorpaat, arnallu atortittartut tasinnguami salinneqarfianni uffarput, soorlu Naalagaq taama oqarsimasoq.
v39 Akabip oqaluttuassartai allat – naammassisai, illu nagguaatsup tuugaavinik pinnersagaa illoqarfiillu pallittaalisaliorsimasai tamarmik – Israelip Kunngiisa Nalunaarsuutaanni allassimapput. v40 Taava Akabi siuaasamini qasuersaalerpoq, erneralu Akazja ataatani kingoraarlugu kunnginngorpoq.
v41 Joshafati Asap ernera Judamut kunnginngorpoq ukiut Israelip kunngiata Akabip naalakkersuiffiisa sisamaanni. v42 Joshafati kunnginngorami 35-nik ukioqarpoq, ukiunilu 25-ni Jerusalemimi naalakkersuivoq. Anaanaa Azubamik ateqarpoq, Shilkillu panigaa. v43 Ataatami Asap ileqqui tamaasa malippai soraarukkumanagillu. Naalakkalli isaani eqqortumik iliorpoq. v44 Qattorngilli pilliisarfiit atorunnaanngillat. Inuit qattunerni toqutassanik pilliisartuarput qattunernilu pilliiniarlutik innermik ikitsisartuarlutik. v45 Joshafatip Israelip kunngia eqqisseqatigaa.
v46 Joshafatip oqaluttuassartai allat – sapiitsuliortarneri sorsuttarnerilu – Judap Kunngiisa Nalunaarsuutaanni allassimapput. v47 Naalaffimmili angutit atortittartut ataatami Asap nalaaneersut amiakkui nunaminit anisippai.
v48 Taamanikkut Edomimi kunngeqanngilaq. v49 Kunngilli Joshafatip tassani naalagaatitaa Tarshishiliartaatissamik umiarsualiorpoq Ofirimit kuultinik aallertartussamik; umiarsuarli Ofirilianngitsoorpoq Esjongeberimi umiiarami. v50 Taava Akazjap Akabip ernerata Joshafati siunnersorsimagaluarpaa umiarsuarnik nammineq kiffaminik Joshafatillu kiffaanik inuttaqartunik aallartitsisoqassasoq, Joshafatili taamaaliorumanngilaq.
v51 Joshafati siuaasamini qasuersaalerpoq, siuaasaminilu ilineqarpoq ataatami Daavip illoqarfiani. Ernera Jorami ataatani kingoraarlugu kunnginngorpoq.
v52 Akazja Akabip ernera Samariami Israelimut kunnginngorpoq ukiut Judap kunngiata Joshafatip naalakkersuiffiisa 17-ianni, ukiunilu marlunni Israelimi naalakkersuivoq. v53 Naalakkap isaani ajortumik iliorpoq, malippaalu ataatami anaanamilu ileqqui aammattaaq Jeroboamip Nebatip ernerata Israelimiunik ajortuliulersitsisup ileqqui. v54 Ba'ali guutisiorfigaa pallorfigisarlugulu taamaaliornermigullu Naalagaq Israelip Guutia kamatsillugu ataatami iliorneratorluinnaq.