v1 Kunngip Salomop Israelip utoqqaanertai naggueqatigiinnilu naalagaasut, Israelikkut siuaasaqaqatigiissortaasa qullersaat, Jerusalemimi imminut katersortippai angerutsip illerfia Daavip Illoqarfianit – tassa Zionimit – majuunniarlugu;
v2 Israelikkullu angutitaat tamarmik kunngimi Salomomi katersuupput nalliussivimmi qaammammi etanimimi, qaammatit arfineq-aappaanni.
v3 Israelip utoqqaanertai tamarmik tikiummata palasit angerutsip illerfia kivippaat,
v4 Naalakkallu angerusiata illerfia majuuppaat Tupeq Naapeqatigiittarfik atortullu illernartut tupermiittut tamaasa ilanngullugit. Palasit Levikkullu majuussisuupput.
v5 Kunngi Salomo ilagiillu Israelikkut Salomomukarsimasut tamarmik angerutsip illerfiata siornani ingerlaarput pilliutigalugillu savat ussigillu amerlangaaramik kisinneq naatsorsornerlu ajornartut.
v6 Palasit Naalakkap angerusiata illerfia inimi qinngorlermi, Illernarnerpaami, inissaanut inissippaat kerubiusat suluisa ataannut.
v7 Kerubiusat angerutsip illerfiata qulaani sulutik siaarsimavaat taamaalillutillu angerutsip illerfia akiarfiilu qulaannit assersimallugit.
v8 Akiarfiit takingaaramik isui Illernartumiit inip qinngorliup sioraaniitumiit takuneq ajornanngillat; kisianni silataaniit takuneq ajornarput, ullorlu manna tikillugu iniminniipput.
v9 Angerutsip illerfiata imai tassatuaapput allaffissiat ujaraasut marluk Mosesip Horebimi tassunga inississimasai, taamani Naalakkap Israelikkut Egyptenimit anereerneranni angerfigeqatigimmagit.
v10 Palasit naalaffimmiit animmata nuissap Naalakkap naalaffia ulikkaarpaa;
v11 palasit suliassatik suliarisinnaajunnaarallarpaat nuiaq pissutigalugu, Naalakkap naalannassusiata Naalakkap naalaffia ulikkaarmagu.
v12 Taava Salomo oqarpoq:
»Naalagaq oqarpoq taartumi ineqarumalluni.
v13 Maanna illuliuutereerpagit,
illit najugarisinnaasannik naassaanngitsumik.«
v14 Kunngip Israelikkut katersorsimasut tamaasa saallugit pilluaqquai Israelikkut katisimasut tamarmik qeqartillugit.
v15 Oqarpoq: Unnersiutigineqarli Naalagaq Israelip Guutia, maanna eqquutitikkamiuk ataatannut Daavimut neriorsuutini oqarami:
v16 »Ullup innuttannik Israelikkunnik Egyptenimit anisitsiffigisama kingorna qinigaqarsimanngilanga Israelip naggueqatigiissortaasa kikkuusulluunniit illoqarfiannik illuliorfissannik aterma inissaanik, Daavili qinerpara innuttannut Israelimut naalaganngortillugu.«
v17 Ataatama Daavip Naalakkap Israelip Guutiata aqqa illuliuukkumagaluarpaa,
v18 Naalakkalli ataataga Daavi oqarfigaa: »Atera illuliuukkumallugu pilersaaruteqarnerit ajunngikkaluarpoq;
v19 kisianni illu taanna illit sanassanngilat. Ernerpit illit uininnit aannillu pinngorumaartussap atera illuliuutissavaa.«
v20 Naalakkap neriorsuunni taanna eqquutitippaa: Uanga ataataga Daavi kingoraarpara; Naalakkap neriorsuutaa malillugu Israelip issiavissaarsuani issiavunga, Naalakkallu Israelip Guutiata aqqa illuliuuppara.
v21 Tassani inissippara angerutsip illerfia taamani Naalakkap siuaasavut Egyptenimit anisikkamigit taakkununnga angerfigeqatiginnissutaanik imaqartoq.
v22 Salomo Naalakkap pilliiviata sioraanut qeqqippoq Israelikkut katersorsimasut saallugit, assanilu qilaap tungaanut isatsillugit v23 qinuvoq:
Naalagaq Israelip Guutia, Guuteqanngilaq ilittut ittumik qilammi pavani nunamilu maani, Guuteqanngilaq kiffannut angerutsiminik ilumoorsutsiminillu atatitsiuartumik, taakku uummatimikkut iluunngarlutik illit kiinnavit saanni inuugaangata. v24 Illit kiffannut, uanga ataatannut Daavimut, neriorsuutit aalajangiussimavat; taassumunnga neriorsuutit ullumi eqquutitippat. v25 Naalagaq Israelip Guutia, kiffannut uanga ataatannut Daavimut neriorsuutit imaattoq eqquutitikkiuk: »Illit kinguaannik Israelip issiavissaarsuani issiasussaqartuassaaq ernivit inuusertik sianigippassuk kiinnama saani inuuseqarlutik illit kiinnama saani inuuseqarsimanittut.« v26 Illillu Israelip Guutia, qanortoq kiffannut uanga ataatannut Daavimut neriorsuutigisat atajuarli. v27 Guuti nunarsuarmi najugaqarnerami? Naagga, qilak qilaallu qilaat ilinnut najugassatut mikivallaareermata illu manna sanaara suli mikiginerujussuussavat! v28 Naalagaq Guutiga, kiffavit ilungersorluni qinuneranut naalaarit; ullumi kiinnavit saani kiffavit torlorfiginninnera qinuneralu tusakkit! v29 Illu manna aterpit najugarisassaatut qinikkat ulloq unnuarlu paariuartariuk. Najukkamut tassunga saalluni kiffavit qinnutigisaa tusaruk. v30 Kiffavit innuttavillu Israelikkut qinnutaat tusakkit tassunga saallutik qinusaraangata, qilammi najugarisanni tusakkit, tusaagit isumakkeerfiginnillutillu!
v31 Kinaluunniit tulliminut ajortuliorsimanerminik pasillerneqartoq uppernarsaaqquneqarpat, maannarpallu illumi maani pilliiviutivit sioraani pinngitsuunini uppernarsassallugu, v32 taava qilammi tusaajuk; iliuuseqarillu takutillugulu pisuunersoq pisuunnginnersorluunniit. Pisuuppat eqqartuuguk nammineq suliaminit eqqorneqartillugu, pisuunngippallu pinngitsuutiguk iliuuseqarfigalugulu pinngitsuunera naapertorlugu.
v33 Innuttatit Israelikkut ajorsartitaappata ilinnut ajortuliorsimanertik pissutigalugu, taamalu pineqareernermikkut ilinnut saappata aqqit unnersiutigalugu naalaffimmilu maani ilungersorlutik qinnuigippatsit, v34 taava qilammi tusaagit innuttatit Israelikkut ajortuliaannik isumakkeerfigalugit nunamullu siuaasaannut tunniussannut utertillugit!
v35 Qilak matuneqarpat siallissaarlunilu ilinnut ajortuliorsimanerat pissutigalugu, maangalu saallutik qinuppata aqqit unnersiutigalugu ajortuliaminnillu saanniarlutik, illit nikanarsarakkit, v36 taava qilammi tusakkit, kiffatit innuttatillu Israelikkut ajortuliaannik isumakkeerfigalugit aqqummillu ajunngitsumik ingerlavissaannik unnersuullugit; nunamilu illit innuttannut pigisassanngortitanni siallersitsigit.
v37 Nunami kaannersuaqaraangat, toqoraataasumik nappaateqaraangat, karrit oqunnerannik naasullu nappaataannik, pillertat sullinerillu allat ajoqutaasut nalliukkaangata, akeraasa nunami illoqarfinni ungusarigaangatigit – perluit nappaatillu suulluunniit nalliuttaraangata – v38 taava qilammi najugarisanni tusakkit, inuup innuttannut Israelikkunnut ilaasup uummatimigut eqqorneqartutut misigisimalluni assanilu illumut tassunga isatsillugit qinnutai suulluunniit. v39 Qinusoq isumakkeerfigisaruk, taamaattorli kinaluunniit qanoq inuuseqarnera naapertorlugu pineqartittaruk akillugulu iliuuseqarfigalugu – illit uummammiugisai nalunngilatit, illimmi kisivit inuit tamarmik uummammiugisaat ilisimagakkit. v40 Taamaaliortarit nunami siuaasatsinnut tunniussanni inuutillutik mianereqqullutit.
v41 Aamma takornartat innuttavit Israelikkut ilaginngisaat nunamit ungasissumit illit aqqit pillugu tikiuppata v42 aqqit angingaartoq assallu pissaasoq talillu isassimasoq tusartarsimagamikkit, inuillu taakku illu manna saallugu qinuppata, v43 taava qilammi najugarisanni tusartaruk, takornartallu ilinnut torlulanera naapertorlugu iliorfigiuk nunarsuarmi inuianni tamani aqqit ilisimaneqaleqqullugu, innuttavit Israelikkut mianerinninnerattut taakkunannga mianerineqaqqullutit paaseqqullugulu illu manna sanasimasara illit atinnik atserneqartoq.
v44 Innuttavit akeqqat illit sorsuffigiartoqqusatit sumulluunniit sorsuffigiartoraangatigit illillu Naalagaq qinnuigisaraangatsit illoqarfik illit qinersimasat illulu illit atinnut illuliarisimasara saallugit, v45 taava ilungersungaarlutik qinunerat qilammi najugarisanni tusartaruk naapertuilluartumillu pineqartillugit!
v46 Ilinnut ajortuliorpata – inuimmi tamarmik ajortuliortarput – kamaakkukkillu akeqqanut ajugaaffigitillugit taakkualu nunaannut ungasissumut qanittumulluunniit aallarussaatillugit, v47 taavalu nunami aallarussaaffimminni peqqissimippata allamillu isumataarlutik ilungersungaarlutillu parnaarussatut paarsisimik nunaanni qinnuigippatsit nassuerlutillu ajortuliorsimallutik iluaatsutullu ileqqorlussimallutik, v48 ilinnullu saappata uummatimikkut iluunngarlutik tarnimikkullu iluunngarlutik akeqqamik aallarussisimillu nunaanniitillutik, ilinnullu qinuppata nunaminnut siuaasaminnut tunniussimasannut saallutik, illoqarfimmullu illit qinikkannut saallutik, illumullu uanga illit atinnut illuliarisannut saallutik, v49 taava ilungersungaarlutik qinnutaat tusartaruk qilammi illit najugarisanni; naapertuilluartumillu pineqartikkit, v50 innuttatillu ilinnut ajortuliaannik ilinnullu unioqqutitsinerinik tamanik isumakkeerfigikkit, parnaarussatullu paarsisiminnit naakkineqarlit nallittorneqarlutillu; v51 tassaappummi illit innuttatit pigisatit Egyptenimit – aatsitsivimmit – anisitatit.
v52 Isitit uissimalit kiffavit innuttavillu Israelikkut ilungersungaarlutik qinnutaannut, tusakkillu torlorfigippatsit. v53 Illimmi, Guuti Naalagaq, Israeli nammineq pigisassattut nunarsuup inuinit tamanit immikkoortissimavat, soorlu kiffakkut Mosesikkut taama oqaluttutit taamani siuaasavut Egyptenimit anisikkakkit.
v54 Salomo ilungersoqaluni taama Naalakkamut qinoreerami assani qilaap tungaanut isatsillugit Naalakkap pilliiviata seeqqumiarfigisimasami sioraanut nikuippoq, v55 qeqarlunilu Israelikkut katersorsimasut tamaasa nipituumik pilluaqquai: v56 Unnersiutigineqarli Naalagaq, neriorsuutini eqqortilluinnarlugu innuttani Israelikkut qasuerfissaannik tunimmagit. Kiffamigummi Mosesikkut oqaasiisa ajunngitsut ilaat ataasiinnarluunniit maangaannanngilaq. v57 Naalakkap Guutitta najorlisigut siuaasatsinnik najuisimanermisut. Qanortoq qimanngikkilisigut ajattornatalu. v58 Qanortoq uummativut taassumunnga sammiuarlit aqqutigeqqusaani tamani ingerlasinnaaqqulluta peqqussutai inatsisaalu malittarisassiaalu siuaasatsinnut maleruagassanngortitai maleruarlugit. v59 Qanortoq oqaatsikka taakku Naalakkap kiinaata saani qinnutikka Naalakkamut Guutitsinnut annguttarlit ulloq unnuarlu, kiffani innuttanilu Israelikkut ullut tamarluinnaasa naapertuilluartumik pineqartittaqqullugit, v60 nunarsuarmi inuiannut tamanut ilisimaqqullugu Naalagaq Guutiusoq allamillu Guuteqanngitsoq. v61 Uummatissigut iluunngarlusi Naalagaq Guuterput ilumoorfigissavarsi ileqqoreqqusai maleruarlugit peqqussutaalu naalallugit soorlu ullumi taama inuususi.
v62 Kunngi Israelilu tamaat ilagalugu pilliutinik toqutassanik pilliipput Naalakkap kiinaata saani. v63 Salomop Naalakkamut pilliutigisai nereqatigiissutissat tassaapput ussigit 22.000-it savallu 120.000-it, taamaalillutillu kunngip Israelikkullu tamarmik Naalakkap naalaffia atoqqaartippaat. v64 Pilliivik kanngussaasoq pilliutissarpassuarnut mikivallaarmat Salomop ulloq taanna silarliup ilaa qiterleq Naalakkap naalaffiata sioraaniittoq illernartippaa; tassanilu pilliutigai pilliutit ikikkagassat naatitanillu pilliutigisassat pilliutillu nereqatigiissutissat tunnortaat.
v65 Taamani Salomo Israelilu tamarmi ulluni arfineq-marlunni ullunillu arfineq-marlunni, tassa ulluni 14-ini Naalakkap kiinaata saani nalliuttorsiorput. Katersorsimasorpassuit aggiasimapput Lebo-Hamatimiit Egyptenip kuunngua tikillugu. v66 Ullut arfineq-pingajussaanni inuit qimagutitippai. Kunngi nersorpaat angerlarlutillu, nuannaarlutik Naalakkap kiffaminut Daavimut innuttaminullu Israelimut iliuuserisimasai ajunngitsut tamaasa nakussatsissutigalugit.