v1 Ukiut Pekap Remaljap ernerata naalakkersuiffiisa 17-ianni Akazi kunnginngorpoq. Taanna Judap kunngiata Jotamip erneraa. v2 Akazi 20-nik ukioqarluni kunnginngorpoq, Jerusalemimilu ukiuni 16-ini naalakkersuivoq. Siuaasani Daavi assiginagu Naalakkap Guutimi isaani eqqunngitsumik iliorpoq. v3 Israelip kunngiisa ileqqui malippai. Allaat ernini innikkoortippaa inuiaat Naalakkap Israelikkunnit qimaatitaatissimasaasa ileqquat maajunnartoq issuarlugu. v4 Qattunerni qattunersanilu orpiillu qorsuusut tamarmik ataanni toqutassanik pilliisarpoq pilliiniarlunilu innermik ikitsisarluni.
v5 Taamani Aramip kunngia Resini Israelillu kunngia Peka Remaljap ernera majuarput Jerusalemi saassukkiartorlugu. Akazi ungusarigaluarpaat ajugaaffigisinnaanaguli. v6 Tamatuma nalaani Edomip kunngiata Elati tigusaraa Edomimullu ilannguteqqillugu. Judamiut Elatimit peersinneqareermata Edomikkuusunik Elatimi najugassittoqarpoq, ullorlu manna tikillugu tassani najugaqarput.
v7 Taava Akazip Assyriap kunngia Tiglat-Pileseri nalunaarfigitippaa: »Inussiaatigaarma erneralungalu. Aramip kunngianit Israelillu kunngianit uannik saassussisunit aniguisikkiartunnga!« v8 Akazillu sølvit kuultillu Naalakkap naalaffianiittut kunngillu illussaarsuani erlinnartuusivinniittut tunissutitut Assyriap kunngianukaatitimmagit v9 taassuma Akazip kissaatigisaa akueraa. Damaskusimukarluni illoqarfik tigusaraa inuilu Kirimut aallarullugit, Resinilu toquppaa.
v10 Kunngi Akazi Damaskusimukarpoq Assyriap kunngia Tiglat-Pileseri naapigiarlugu. Pilliivik Damaskusimiittoq takugamiuk titartarnera sannaatalu nalunaarsoqqissaarneqarnera palasimut Urijamut nassiuppai. v11 Kunngi Akazi Damaskusimiit uteriartinnagu palasi Urija pilliiviliorpoq nalunaarsuutit kunngip Damaskusimiit nassiussai malilluinnarlugit. v12 Kunngi Damaskusimiit uterluni pilliivik takugamiuk tassunga sassarpoq pilliillunilu. v13 Pilliutissani ikikkagassat naatitanillu pilliutissani pilliutigai; pilliutissanilu kueragassaq kuerarpaa pilliivillu pilliutit nereqatigiissutissat aavannik serpartarlugu. v14 Kisianni pilliivik kanngussaasoq Naalakkap sioraaniittoq naalaffiup sioraani inaanit, pilliiviup nutaap Naalakkallu naalaffiata akornannit, peerpaa pilliiviullu nutaap avannaatungaanut inissillugu. v15 Kunngip Akazip palasi Urija naalakkerpaa: »Pilliivimmi annermi pilliutigisassavatit ikikkagassat ullaakkut pilliutissat, naatitat unnukkut pilliutissat, kunngip pilliutissai ikikkagassat naatitallu, inuit tamarmik pilliutissaat ikikkagassat naatitallu kueragassallu; pilliutillu ikikkagassat toqutassallu aavat tamaat pilliivimmut serpartaatigisassavat. Pilliivilli kanngussaasoq tassaassaaq uanga pisussanik paasiniaaffigisartagassara.« v16 Palasi Urija kunngip Akazip naalakkiutai tamaasa malillugit iliorpoq. v17 Kunngip Akazip qamutaasat listiisa kuultertaat peerpai igaasarsuillu qamutaasanit peerlugit. Eqqiarfik Imaq ussiusat kanngussaasut qaavanni inissisimagaluartoq aqqarneqartippaa ujaqqanillu toqqavilersillugu. v18 Naalakkap naalaffiani sabbatimi ingerlavigisartagaq qulisaq kunngillu isertariaa silarleq peerpai. Taamaaliorpoq Assyriap kunngia pillugu.
v19 Akazip oqaluttuassartai allat naammassisaalu tamarmik Judap Kunngiisa Nalunaarsuutaanni allassimapput. v20 Akazi siuaasamini qasuersaalerpoq siuaasaminilu Daavip Illoqarfiani ilineqarluni; erneralu Hizkija kingoraarlugu kunnginngorpoq.