v1 Manasse aqqaneq-marlunnik ukioqarluni kunnginngorpoq ukiunilu 55-ini Jerusalemimi naalakkersuilluni. Anaanaa Hefsibamik ateqarpoq. v2 Manasse Naalakkap isaani ajortumik iliorpoq inuiaat Naalakkap Israelikkut pillugit qimaatissimasaasa ileqqui maajunnartut issuarlugit. v3 Qattorngit pilliisarfiit ataatami Hizkijap aserortersimasai sanaqqippai. Ba'alimut pilliiviliorpoq nappartitsivorlu napasumik Asheramut pigititaasumik soorlu Israelip kunngia Akabi taamaaliorsimasoq; qilaallu perpassui tamaasa pallorfigisarpai guutisiorfigisarlugillu. v4 Allaat Naalakkap naalaffiani pilliiviliorpoq naak Naalagaq naalaffik pillugu oqarsimagaluartoq: »Jerusalemimi atera ineqartissavara.« v5 Naalakkallu naalaffiata kaajaluisartaani silarlerni marlunni qilaap perpassuinut tamanut pilliiviliorpoq. v6 Ernini innikkoortippaa, angakkuartitsisarpoq, pisussanik ilimasaarisarluni timaajagarsiortunillu siulittuisartunillu atorfinitsitsilluni; annertoqisumik Naalakkap isaani ajortumik iliorpoq tamatumuunakkullu narrutsatsillugu. v7 Asherap assinga sanaani naalaffimmi nappartippaa, uffa Naalagaq naalaffik pillugu Daavimut erneranullu Salomomut oqarsimagaluartoq: »Naalaffimmi tassani Jerusalemimilu Israelip naggueqatigiissortaasa tamarmik akornanni qinersimasanni atera ineqartissavara naassaanngitsumik; v8 Israelikkullu nunamit siuaasaannut tunniussannit peerseqqissanngilakka peqqussutikka tamaasa maleqqissaarumappatigit inatsisillu kiffama Mosesip tunniussai tamaasa maleruarlugit.« v9 Kisianni naalakkumanngillat, Manassellu inuiannit Naalakkap Israelikkut pillugit nungutissimasaanit ajornerusumik iliortippai.
v10 Taava Naalakkap kiffamigut pruffiititigut manna nalunaarutigaa: v11 »Judap kunngia Manasse taama maajunnartuliortigigami tamatumuuna Amorikkut sioqqulluni iliuuserisimasaat akimorlugit iliorpoq guutipalaamigullu Judattaaq ajortuliortilersimallugu. v12 Taamaattumik Naalagaq Israelip Guutia oqarpoq: Jerusalemi Judalu ajunaartikkumaarpakka tusartut tamarmik siutaannik avilulersitsiumaartumik. v13 Jerusalemi uuttorumaarpara uuttuummik Samariamut uuttuutigisimasannik allunaasamillu makittarissaammik oqimaalutartalimmik Akabip ilagisaanut misiligutigisimasannik; Jerusalemilu errortorlugu salikkumaarpara puugutarsuartut errortorneqartutut taavalu pusinneqartutut. v14 Innuttama amiakkui ajattorumaarpakka akeraasalu assaannut tunniullugit. Akeqqaminnut tamanut ujajaaffigisassanngortitaassapput piiaaffigisassanngortitaallutillu v15 uanga isinni ajortumik ilioramik. Siuaasamik Egyptenimiit aninerannit ulloq manna tikillugu narrutsatsittarsimavaannga.«
v16 Manassep Juda ajortuliortilersimavaa Naalakkap isaani ajortumik iliortilerlugu, ilallugulu inuit pinngitsuusut toquttarsimavai aak Jerusalemip aqquserngini kuugaartuinnanngortillugu.
v17 Manassep oqaluttuassartai allat, naammassisai ajortuliaalu Judap Kunngiisa Nalunaarsuutaanni allassimapput. v18 Manasse siuaasamini qasuersaalerpoq illussaarsuarmilu naatsiiviani, Uzzap naatsiiviani, ilineqarluni; erneralu Amoni kingoraarlugu kunnginngorpoq.
v19 Amoni 22-nik ukioqarluni kunnginngorpoq, Jerusalemimilu ukiut marluk naalakkersuivoq. Anaanaa Meshullemetimik atilik Harusip Jotbamiup panigaa. v20 Amoni Naalakkap isaani ajortumik iliorpoq ataatami Manassep ileqqui malillugit. v21 Ataatani maleqqissaarpaa guutipalaallu ataatami guutisiorfigisai guutisiorfigai pallorfigalugillu. v22 Naalagaq siuaasami Guutiat tunuppaa aqqutigeqqusaa ingerlavigiunnaarlugu. v23 Amoni angutitaasa pikitsitsiffigilerpaat illussaarsuarmilu toqullugu. v24 Nunaatilissuilli kunngimut Amonimut pikitsitsisimasut tamaasa toquppaat, erneralu Josija kingoraartigitillugu kunnginngortippaat.
v25 Amonip oqaluttuassartai allat naammassisaalu Judap Kunngiisa Nalunaarsuutaanni allassimapput. v26 Amoni Uzzap naatsiiviani ilineqarpoq, erneralu Josija kingoraarlugu kunnginngorpoq.