v1 Josija arfineq-pingasunik ukioqarluni kunnginngorpoq, ukiunilu 31-ni Jerusalemimi naalakkersuilluni. Anaanaa Jedidamik atilik Adajap Boskatimiup panigaa. v2 Naalakkap isaani eqqortumik iliorpoq siuaasami Daavip ileqqui malillugit talerpimmut saamimmulluunniit sanguallannani.
v3 Kunngip Josijap ukiut naalakkersuiffimmi 18-ianni naalagaaffimmi allattuuneq Shafani Asaljap ernera Meshullamip erngutaa Naalakkap naalaffianut aallartippaa oqarfigalugulu: v4 »Palasiunermut Hilkijamukarit oqarfigalugulu aningaasat Naalakkap naalaffianukaanneqarsimasut isaaffinnillu paarsisut inunnit katersorsimasaat kisissagai. v5 Aningaasat tunniutissavaat iluarsaanermi pisortaasunut Naalakkallu naalaffianik nakkutilliisunut; taakkualu ingerlateqqissavaat Naalakkap naalaffiata iluarsagassartaanik suliaqartunut, v6 sanasut naalagaannut, illuliortut naalagaannut qarmaasunullu, qisuit ujaqqallu sikkigissakkat naalaffiup iluarsarneranut atortussat pisiarineqarsinnaaqqullugit. v7 Aningaasalli naatsorsuusiornissaat piumasarineqassanngilaq tatigineqarnertik naapertorlugu atortussaammatigit.«
v8 Palasiuneq Hilkija naalagaaffimmi allattuunermut Shafanimut oqarpoq: »Mappersagaq inatsisit allassimaffiat Naalakkap naalaffiani nassaaraara!« Hilkijap mappersagaq Shafanimut tunniuppaa, taassumalu atuarpaa. v9 Taava naalagaaffimmi allattuuneq Shafani kunngimukarpoq nalunaarfigalugulu: »Angutitavit aningaasat naalaffimmiittut iluarsaanermi pisortaasunut Naalakkallu naalaffiani nakkutilliisunut tunniuppaat.« v10 Naalagaaffimmilu allattuunerup Shafanip kunngi oqaluttuuppaa palasip Hilkijap mappersakkamik tunisimagaani, Shafanillu kunngi atuffappaa.
v11 Kunngip mappersakkami inatsisit allassimaffiani allassimasut tusaramigit atisani alippai, v12 palasilu Hilkija, Ahikami Shafanip ernera, Akbori Mikap ernera, naalagaaffimmi allattuuneq Shafani Kunngillu Kiffaa Asaja naalakkerpai: v13 »Uanga inuillu Judalu tamaat Naalakkamut siunersiuissukkiartortigut mappersakkami matumani nassaarineqarsimasumi allassimasut paasiniarlugit; Naalakkammi uatsinnut kamangaarnera angingaarpoq siuaasatta oqaatsit uani allassimasut naalassimanngimmatigit taakkulu malillugit iliorsimanatik.«
v14 Taava palasip Hilkijap, Ahikamip, Akborip, Shafanip Asajallu ornippaat pruffiiti arnaq Hulda Shallumip Tikvap ernerata Harhasip erngutaata atisaasivimmik nakkutilliisup nulia. Hulda illoqarfiup Jerusalemip nutaartaani najugaqarpoq. Oqariartuutertik taassumunnga nalunaarutigaat, v15 pruffiitillu arnap oqarfigai: »Ima oqarpoq Naalagaq Israelip Guutia: Angut taanna ilissinnik uannukartitsisoq oqarfigissavarsi: v16 Ima oqarpoq Naalagaq: Illoqarfimmut maanga inunnullu maani najugaqartunut ajunaarneq nalliutitikkumaarpara mappersakkami Judap kunngianit atuarneqartumi allassimasutorluinnaq, v17 tassa tunussimammannga innermillu ikitsisarlutik guutinut allanut pilliiniarlutik guutiliamikkullu assammik sanaavisigut narrutsatsillunga; taamaattumik illoqarfik manna kamaatingaalerpara, kamanneralu soraassanngilaq. v18 Judalli kunngia ilissinnik Naalakkamut siunersiuiartortitsisoq oqarfigissavarsi: Ima oqarpoq Naalagaq Israelip Guutia: Maanna oqaaserineqartut tusareerpatit. v19 Uummatikkulli qussalagavit Naalakkallu kiinaata saani nikanartillutit tusarakkit illoqarfimmut matumunnga tassanilu najugaqartunut sioorasaarutikka taakkulu tataannartunngussasut perloqqussutinngussasullu, atisatillu alittorakkit kiinnamalu saani qiallutit, taava qinnutit tusarumavara, oqarpoq Naalagaq. v20 Taamaattumik siuaasannut pisikkumaarpakkit; eqqissillutit ilineqarumaarputit, ajunaarnerillu illoqarfimmut matumunnga nalliutsitassakka tamaasa takussanngilatit.« Akissut taanna kunngimut ingerlatippaat.