v1 Taamani Naalakkap anorersuakkut Elia qilaliartimmagu ima pivoq: Elia Elisalu Gilgalimit aallaramik v2 Eliap Elisa oqarfigaa: »Illit tamaaniiginnarit, uanga Naalakkap peqquaanga Beteliliaqqullunga.« Elisali akivoq: »Ilumut uumammat Naalagaq, ilumullu illit uumagavit: Qimassanngilakkit!« v3 Betelimukartillugit pruffiiteqatigiit Betelimiittut Elisa ornippaat oqarfigalugulu: »Nalunngiliuk Naalakkap naalagarisat ullumi ilinnit qimagutitinniaraa?« Akivoq: »Aap, nalunngilara; nipangiinnarniaritsi!« v4 Eliap oqarfigaa: »Maaniiginnarit, Elisa, uanga Naalakkap peqquaanga Jerikomukaqqullunga.« Elisali akivoq: »Ilumut uumammat Naalagaq, ilumullu illit uumagavit: Qimassanngilakkit!« Jerikomut pimmata v5 pruffiiteqatigiit tassani najugaqartut Elisa ornippaat oqarfigalugulu: »Nalunngiliuk Naalakkap naalagarisat ullumi ilinnit qimagutitinniaraa?« Akivoq: »Aap, nalunngilara; nipangiinnarniaritsi!« v6 Eliap Elisa oqarfigaa: »Maaniiginnarit, uanga Naalakkap peqquaanga Jordanimukaqqullunga.« Elisali akivoq: »Ilumut uumammat Naalagaq, ilumullu illit uumagavit: Qimassanngilakkit!« Taava ingerlaqatigiipput. v7 Pruffiitillu 50-it ingerlaqataapput, taakkulu Elia Elisalu Jordanip sinaani qeqartut ungasiarlugit unipput. v8 Taava Eliap qallersaatini tigoriarlugu imuaa, taassuminngalu kuup ernga anaavaa anaasami nalaa paqqersillugu; marluullutillu masatalaarnatik ikaarput.
v9 Ikaareeramik Eliap Elisa oqarfigaa: »Tusariassagiga ilinnit qimagutitaatinnanga sumik kissaateqarfiginerimma.« Elisa akivoq: »Anersaarpit avinneri marluk pilakka!« Elia oqarpoq: v10 »Kissaatigisaq taama ittoq saperuttaatsuuvoq; qimagutitaanerali isiginnaarukku kissaatigisat pissavat, taamali pisoqanngippat naami.« v11 Oqaloqatigiitsillugit takkupput qamutit innerinnaasut innerinnaasunik qimuttullit. Taakkua Elia Elisalu imminnit avissaartippaat, Elialu anorersuakkut qilaliartinneqarpoq. v12 Elisap taama pisoqartoq takugamiuk suaarpoq: »Ataataga, ataataga, illit Israelip qamutai hestiilu!« Elialu takusinnaajunnaarpaa. Taava atisani marlunngorlugit siippai. v13 Taava Eliap qallersaataa inuata katassimasaa tigoriarlugu uterpoq Jordanillu sinaanut qeqqilluni. v14 Qallersaammik Eliap katassimasaanik imeq anaavaa oqarlunilu: »Naak Naalagaq Eliap Guutia?« Imeq anaammagu anaasaata nalaa paqqerpoq, Elisalu ikaarpoq.
v15 Pruffiitit Jerikomeersut qanoq pisoqarnera takugamikku oqarput: »Eliap anersaava Elisamut pisimavoq!« Taava naapikkiartorpaat, nunamullu pallorfigalugu v16 oqarfigaat: »Kiffatit ilaqarput angutinik 50-inik nukittuunik; taakkua naalakkat ujariartorlissuk. Imaassinnaavoq Naalakkap anersaavata tigusimagaa igillugulu qaqqat qooqqulluunniit arlaannut.« Elisalli akivai: »Aallartitsissanngilasi.« v17 Kimigiiserfigivallaaleqimmannili oqarpoq: »Qaami, aallartiinnarsigit!« Taava angutinik 50-inik aallartitsipput, ullunilu pingasuni ujarleraluaramik Elia naninngilaat. v18 Elisamut uterput Jerikomiitillugu. Elisap oqarfigai: »Oqarfigigaluarpassimi ujarleriartussanngitsusi.«
v19 Jerikomiut Elisa oqarfigaat: »Illoqarfipput pitsaasumik inissitaagaluarpoq, soorlu nammineq takusinnaagit, naalagaq; imerli ajorpoq, arnallu naartuminnik anitsigajoqaat.« v20 Elisap oqarfigai: »Puugutaasamik nutaamik aalliussinga taratsunillu immerlugu!« Aalliutereermannilu v21 puilasumukarami taratsut tassunga kuivai oqarlunilu: »Ima oqarpoq Naalagaq: Imeq una peqqinnartunngortissavara, toqussutaaqqissanngilaq naartusunillu anitsisitseqqissanani.« v22 Imerlu peqqinnartunngorpoq ullorlu manna tikillugu taamaalluni, soorlu Elisa taama oqalussimasoq.
v23 Elisa tassanngaanniit Beteliliarpoq. Majuartillugu nukappiaqqat illoqarfimmit aniallutik mitaatigaat oqalullutik: »Nujaatsoq, qaagit, nujaatsoq, qaagit!« v24 Elisa kingumut qiviarpoq isigeriarlugillu Naalakkap aqqani perloqqullugit, orpikkaniillu nannut marluk anillaapput nukappiaqqallu ilaat 42-t toqullugit.
v25 Elisa Betelimiit qaqqamut Karmelimukarpoq tassanngaanniillu Samariamut uterluni.