v1 Paulusi Silvanusilu Timotheusilu.
Ilagiinnut Thessalonikamiunut Guutimi Ataatatsinni Naalakkamilu Jiisusi-Krisusimi.
v2 Guutip Ataatatta Naalakkallu Jiisusi-Kristusip saammaallisi eqqissisillusilu!
v3 Qatanngutit, Guutimut qujassutigittuinnartariaqarpassi, taamaaliortariaqarattami, uppersusersi alliartuinnarmat asaqatigiinnersilu anneruleriartuinnarmat tamarluinnassinni. v4 Taamaattumik usorsisimaarutigisinnaavassi Guutip ilagiissaani allani, nikallujuikkassi uppersuseqarassilu qinugineqarnissinni annikilliuutinilu atortariaqakkassinni tamani. v5 Tamanna ilimasaarutaavoq Guutip eqqartuussutaanut naapertuilluartumut, Guutip naalagaaffianut maannakkut erloqinartorsiuutissinnut isernissamut qinngaqqunnanngitsuutitaassagassi. v6 Guutimmi naapertuilluarnertut isigaa ilissinnik annikilliortitsisut annikilliortitaanermik akilissallugit v7 ilissilu annikilliortitaasusi uagutsinnut ilagitillusi akilissallusi atoruminarsisitsinermik Naalagaq Jiisusi inngilini pissaasut ilagalugit qilammit saqqummersitaappat v8 innermi ikualasorsuarmi, aggiullugu pillaatissaq Guutimik ilisimasaqanngitsunut Naalakkamillu Jiisusimik iivangkiiliumut naalakkumanngitsunut. v9 Taakku Naalakkap kiinaanit naalannassusianillu pissaaneranillu peersitaallutik naassaanngitsumik suujunnaarsitaaneq pillaatisiarissavaat, v10 ullormi issumani tikiuppat naalannarsisitaassalluni illernartitami akornanni uppertunngortullu tamarmik akornanni nersorneqassalluni – ilissinnummi nalunaajaatigisarput upperaarsi. v11 Taamaattumik qinnuttuinnarpassi Guutitta qinngaqqunnartissanngikkaasi qaaqqussummut, pissaanikkullu immissagaasi pilersaarutinik ajunngitsunik tamanik uppernikkullu suliarisaasunik tamanik v12 Naalakkatta Jiisusip aqqa ilissinni naalannarsisinneqaqqullugu, ilissilu taassumani naalannarsisinneqaqqullusi Guutitta Naalakkallu Jiisusi-Kristusip saammaanneratigut.