v1 Israelikkut ingerlaqqipput Moabillu narsartaani Jordanip kangiani Jerikop akiani tammaarlutik.
v2 Balakip Sipporip ernerata Israelikkut Amorikkunnut qanoq iliorsimaneri tamaasa takusimavai, v3 Moabikkullu Israelikkunnut sioorangaalerput amerlassusiat pissutigalugu. v4 Moabikkut Midjanimi utoqqaanertanut oqarput: »Inuppassuit taakkua eqqarput tamaat sueruttussanngorpaat, soorlu ussigit narsaammi naatitat nungullugit mangiartaraat.« Taamani Balaki Sipporip ernera Moabimi kunngiuvoq. v5 Taassuma Bileami Beorip ernera Petorimi innuttami ernerisa nunaanni kuussuup killingani najugaqartoq oqariartortitsivigaa aggeqqullugu; oqarpoq: »Inuiaat Egypteniminngaanneersut nuna tamaat ulikkaarpaat, akerpiannilu tammaarput. v6 Aggerlutit inuiaat taakku uannit perloqqujartukkit, uannimmi pissaaneqarnerupput; taava immaqa ajugaaffigisinnaassavakka nunamillu matumannga anisillugit; nalunngilarami illit pilluaqqusat pilluaqqusaasartoq illillu perloqqusat perloqqusaasarluni.« v7 Taava Moabikkut Midjanikkullu utoqqaanertaat aallarput siulittuisartumut akissamik nassarlutik. Bileami tikikkamikku Balakimiit oqariartuutigititaasoq oqaatigaat. v8 Bileamip oqarfigai: »Maani unnuiniarallaritsi, taava Naalagaq siunersioreerukku akissuteqarfigissavassi.« Moabillu naalagartai Bileamimi unnuipput. v9 Guutili Bileamimut saqqummerpoq oqarlunilu: »Inuit taakku ilinniittut kikkunuku?« v10 Bileami Guutimut oqarpoq: »Balakip Sipporip ernerata Moabimi kunngip ima nalunaarfigitippaanga: v11 Inuiaat Egypteniminngaanneersut nuna tamaat ulikkaarlugu tikiussorput nunamalu killeqarfia tikivillugu tammaarlutik! Maannarlutit perloqqujartukkit! Taava immaqa saassussinnaavakka anisillugillu.« v12 Guutili Bileamimut oqarpoq: »Balakip oqariartortitai aallaqatigissanngilatit! Inuiaat taakku perloqqussanngilatit, pilluaqqusaammata.«
v13 Bileami aqaguani ullaakkut makikkami Balakip naalagartaanut oqarpoq: »Nunassinnut uterniaritsi! Naalakkap uanga ingerlaqataaqqunngilaanga.« v14 Taava Moabip naalagartai aallarput, Balakimullu uteramik oqarput: »Bileamip ilagiumanngilaatigut.« v15 Balaki naalagartanik allanik siullermernit amerlanerusunik akimanerusunillu aallartitsivoq. v16 Taakku Bileamimut tikiukkamik oqarput: »Balaki Sipporip ernera ima oqaqqusivoq: Naaggaarnak uannukarit! v17 Naammattorsuarmik akilissavagit, uannullu iliuusereqqusatit tamaasa iliuuserissavakka. Qaaginnarniarit inuiannullu taakkununnga perloqqusissullunga!« v18 Bileamip Balakip angutitai akivai: »Balakip sølvit kuultillu illumini pigisani tamaasa uannut tunniukkaluarpagilluunniit Naalakkap Guutima peqqussutaanut akerliusumik sunnguamilluunniit iliuuseqarsinnaanngilanga. v19 Maanili unnuiniaritsi; ilisimalissavara Naalakkap sumik allamik oqaasissaqarfigineraanga.«
v20 Unnuakkut Guuti Bileamimut tikiuppoq oqarfigalugulu: »Inuit taakku aggersimappata aallutit, taava ingerlaqatigikkit! Uangali ilinnut peqqussutinnit allaasumik iliorniaqinak!« v21 Aqaguani ullaakkut Bileami makikkami siutituujutini arnaviaq issiaatserpaa Moabillu naalagartai ilagalugit aallarluni.
v22 Aallaqataanerali pillugu Naalakkap kamaatingaarpaa. Taamaattumik Naalakkap inngiliata aqqutissaani inissilluni akornusersorpaa Bileami siutituujutimini qimusserluni kiffani marluk ilagalugit ingerlatillugu. v23 Siutituup takuleramiuk Naalakkap inngilia panani silutsissimallugu aqqutissamini qeqartoq aqqusinermit sanguvoq narsaammullu pilluni. Bileamilli anaavaa aqqusinermut piseqqinniarlugu. v24 Kingorna Naalakkap inngilia viinnequteqarfiit akornanni aqqusinermut amitsumut avatimigut illuttut ujaqqanik qarmaqartumut inissippoq. v25 Siutituup Naalakkap inngilia takugamiuk qarmamut talippoq Bileamip isigaa tassunga kiggisillugu. Taava Bileamip siutitooq anaaqqippaa. v26 Naalakkap inngilia siumut ingerlaqqippoq ninnittumullu talerpiatungaatigut saamiatungaatigulluunniit sanioqquffissaqanngitsumut inissilluni. v27 Siutituup Naalakkap inngilia kingumut takuleramiuk aqupippoq Bileami attataralugu. Taamaaliormat Bileami kamalerpoq siutitoorlu ajaappissaminik anaalerlugu. v28 Taava Naalakkap siutitooq oqalussinnaalersippaa, siutitoorlu Bileamimut oqarpoq: »Qanoq-una iliorfigigakkit maanna pingajussaannik anaalilerpinga?« v29 Bileami akivoq: »Kamassaarparma. Panalisarsimagaluaruma qangali toqussimassagaluarpagit!« v30 Siutitoorli Bileamimut oqarpoq: »Tassaannginnerpunga siutituujutit mikigallarninniit ulloq manna tikivillugu qimusserfigiuaannarsimasat? Ileqqorisimanerpara taama iliorfigisarlutit?« Bileami akivoq: »Naamik.« v31 Taava Naalakkap Bileamip isai uisippai Naalakkap inngilia panani silutsissimallugu aqqusinermi qeqartoq takusinnaanngortillugu, Bileamilu sikilluni pallorpoq. v32 Naalakkap inngiliata oqarfigaa: »Sooq siutituujutit pingasoriarlugu anaalerpiuk? Takuat, aallarsimavunga akornusersoriartorlutit, angalanerit isumaatsoornerummat uangalu piumasannut akerliulluni. v33 Siutituup takuaanga pingasoriarlunilu nigoriartarlunga. Taamaaliorsimanngikkaluarpat toqussimassagaluarpagit siutitoorlu uumatiinnarlugu!« v34 Taava Bileami Naalakkap inngilianut oqarpoq: »Ajortuliorsimavunga, sianiginnginnakku aqqusinermi uanga siuninniittutit! Angalaneq manna illit isinni ajortuuppat utissaanga.« v35 Naalakkap inngilia akivoq: »Angutit taakku ingerlaqatigiinnarniakkit! Taamaallaalli oqaasereqqusakka oqaaserissavatit.« Taava Bileamip Balakip naalagartai ingerlaqatigai.
v36 Kunngip Balakip Bileami tikiutilersoq tusaramiuk naapikkiartorpaa Ar-Moabimi kuup killeqarfiup Arnonip sinaaniittumi, nunap ilaani ungallerpaami. v37 Balaki Bileamimut oqarpoq: »Sooq aasillutit aallartitsigama orninngilinga? Isumaqaravit akilersinnaanngikkikkit?« v38 Bileami akivoq: »Maanna tikippakkit, Guutilli oqaasereqqusaanit allaasumik oqalussinnaanngilanga!« v39 Taava Bileamip Balaki ingerlaqatigaa, Kirjat-Hosotimullu pigamik v40 Balaki ussinnik savanillu toqutsivoq Bileamilu naalagartallu ingerlaqatigisai taakkua ilaannik aatsivigitillugit. v41 Aqaguani ullaakkut kunngip Bileami Bamot-Ba'alimukaqatigaa. Tassanngaanniit Israelikkut tammaarsimaffianni inuit avallersaat takusinnaavai.