v1 Taamani Naalakkap qaqqami Sinajimi Mosesi oqaluffigimmagu Aronip Mosesillu kinguaavi ukuupput: v2 Aroni ukuninnga erneqarpoq: Nadabi angajulliliaasoq, Abihu, Eleazari Itamarilu. v3 Taama ateqarput Aronip erneri, palasitut taninneqarsimasut palasitullu sulinissamut ivertinneqarsimasut. v4 Nadabi Abihulu Sinajip inoqajuitsuani toqupput Naalakkap kiinaata saani qeqartillutik, tassa inneq illernartitaanngitsoq Naalakkap kiinaata saanut sassaakkamikku. Taakku erneqanngillat. Kingorna Eleazari Itamarilu palasitut kiffartorput ataataminnit Aronimit nakkutigineqarlutik.
v5 Naalakkap Mosesi oqaluffigaa: v6 »Levip naggueqatigiissortai maanga aggerlit! Palasimut Aronimut sassarlit kiffartorfigalugulu. v7 Taassuma isumagisassai Toqqup Naapeqatigiittarfiup sioraani suliarissavaat ilagiit tamaasa kiffartuullugit illernartuummi suliassat isumagigaangamikkit. v8 Tupermi Naapeqatigiittarfimmi atortut tamaasa nakkutigissavaat. Taamaalillutik Israelikkut kiffartuutissavaat illernartuummilu suliassat isumagissallugit. v9 Levikkut Aronimut ernerinullu tunniutikkit, taakkuupput Israelikkunnit taassumunnga tunniussaalluinnartussat. v10 Aroni ernerilu palasitut kiffartortunngortissavatit. Kinaluunniit alla illernartuummut palliguttoq toqusussaassaaq.«
v11 Taava Naalakkap Mosesi oqaluffigaa: v12 »Levikkut Israelikkut akornanni uanga pigisassattut immikkoortippakka Israelikkunni erneqqaatinut taarsiullugit. v13 Uangami angajulliliat tamaasa pigisussaavakka. Taamani Egyptenimi angajulliliat tamaasa toqukkakkit Israelikkunni angajulliliat tamaasa, tassa inuit angajulliliaat nersutaatillu piaqqeqqaataat, uannut pigititassanngortippakka. Uanga pigisarissavakka. Uanga tassaavunga Naalagaq!«
v14 Naalakkap Sinajip inoqajuitsuani Mosesi oqaluffigaa: v15 »Levikkut naatsorsussavatit siuaasaqaqatigiikkuutaarlugit eqqarleriissortakkuutaarlugillu. Angutit nukappiaqqallu ataatsimik qaammateqalereersut tamaasa naatsorsussavatit.« v16 Mosesillu Naalakkap peqqusinera malillugu naatsorsorpai, soorlu peqqusimagaani.
v17 Levip ernerisa aqqi tassaapput: Gershoni, Kehati Merarilu. v18 Gershonip ernerisa aqqi, eqqarleriissortakkuutaarlugit, ukuupput: Libni Shim'ilu. v19 Kehatip erneri, eqqarleriissortakkuutaarlugit, ukuupput: Amrami, Jis'hari, Hebroni Uzzielilu. v20 Merarip erneri, eqqarleriissortakkuutaarlugit, ukuupput: Makli Mushilu. Tassa Levip eqqarleriissortai siuaasaqaqatigikkuutaat. v21 Gershoni Libnikkut Shim'ikkullu eqqarleriissortaasa nagguigaat. Taakku tassaapput Gershonikkut eqqarleriissortaat. v22 Angutit nukappiaqqallu ataatsimik qaammateqalereersut tamarmik naatsorsorneqaramik katillutik 7.500-upput.
v23 Gershonikkut tammaarsimaffeqarput illernartuutip tunuani kimmut sammerngani. v24 Gershonikkut siuaasaqaqatigiissortaanni qullersaavoq Eljasafi Laelip ernera. v25 Gershonikkut Tupermi Naapeqatigiittarfimmi isumagisassaraat illernartuut, tupeq, toqqup qalerai, Toqqup Naapeqatigiittarfiup isaariaata saagua, v26 silarliup ungalui illernartuummik pilliivimmillu kaajallaasut, silarlermut isaariaata saagua, allunaasaqutit suliassallu taakkununnga tunngasut tamaasa.
v27 Kehatimit naggueqarput Amramikkut, Jis'harikkut, Hebronikkut Uzzielikkullu eqqarleriissortaat. v28 Angutit nukappiaqqallu ataatsimik qaammateqalereersut tamarmik naatsorsorneqaramik angutit illernartuummi kiffartortussat 8.600-upput.
v29 Kehatikkut eqqarleriissortaat tammaarsimaffeqarput illernartuutip kujataatungaani. v30 Kehatikkut siuaasaqaqatigiissortaanni qullersaavoq Elisafani Uzzielip ernera. v31 Taakkua isumagisassaraat angerutsip illerfia, nerriviusaq, qullilerfik, pilliiviit, atortut illernartitat guutisiornermi atorneqartartut, saagorsuaq suliassallu taakkununnga tunngasut.
v32 Levikkunnut qullersaasuni annerpaavoq Eleazari palasip Aronip ernera. Taanna illernartuummi kiffartortunut nakkutilliisuuvoq.
v33 Merarimit naggueqarput Maklikkut Mushikkullu eqqarleriissortaat. Tassaapput Merarikkut eqqarleriissortaat. v34 Angutit nukappiaqqallu ataatsimik qaammateqalereersut naatsorsorneqaramik katillutik 6.200-upput. v35 Merarikkut siuaasaqaqatigiissortaanni qullersaavoq Surieli Abikajilip ernera. Taakku tammaarsimaffeqarput illernartuutip avannaatungaani. v36 Merarikkut isumagisassaraat Toqqup Naapeqatigiittarfiup salliligarsuartai, quassuttoortai sannerutit, napasui toqqaviilu, atortut tassaniittut suliassallu tamakkununnga tunngasut, v37 aammattaarlu kaajallalluni silarliup napasui taakkualu toqqavii, paagutai noqarutaalu. v38 Mosesi Aronilu Aronillu erneri tammaarsimaffeqarput illernartuutip kangiatungaani Toqqup Naapeqatigiittarfiup sioraani. Israelikkut sinnerlugit illernartuummi kiffartorneq isumagisaraat. Illernartuummut palliguttut allat kikkulluunniit toqusussaapput. v39 Levikkut, tassa Naalakkap peqqusinera malillugu Mosesimit Aronimillu eqqarleriissortakkuutaarlutik naatsorsorneqartut, angutit nukappiaqqallu ataatsimik qaammateqalereersut tamarmik katillutik 22.000-iupput.
v40 Naalagaq Mosesimut oqarpoq: »Israelikkunni angajulliliat naatsorsussavatit, angutit nukappiaqqallu ataatsimik qaammateqalereersut tamaasa; kisissavatillu. v41 Taava uannut – uanga tassaavunga Naalagaq! – tunniunneqarlit Levikkut Israelikkunni angajullilianut tamanut taarsiullugit, aammalu Levikkut nersutaataat Israelikkut nersutaataasa piaqqeqqaataannut tamanut taarsiullugit.« v42 Mosesi Naalakkap peqqusinera malillugu iliorpoq Israelikkunnilu angajulliliat tamaasa naatsorsorlugit. v43 Angajulliliat naatsorsorneqartut aqqilu nalunaarsorneqartut, tassa angutit nukappiaqqallu ataatsimik qaammateqalereersut tamarmik, katillutik 22.273-iupput.
v44 Taava Naalakkap Mosesi oqaluffigaa: v45 »Levikkut Israelikkut angajulliliaannut tamanut taarsiullugit immikkoortikkit; taamatuttaaq Levikkut nersutaataat Israelikkut nersutaataannut taarsiullugit immikkoortikkit. Levikkut uanga pigisassarissavakka. Uanga tassaavunga Naalagaq! v46 Israelikkunnili angajulliliat Levikkunnit 273-inik amerlanerummata taakkununnga utertitsissutissatut v47 tigusissaatit aningaasanik, angajulliliaq ataaseq sekelinik tallimanik nalilertarlugu; uuttuutit illernartuummi atorneqartartut uuttuutigissavatit sekeli ataaseq geranik 20-nik nalilertarlugu. v48 Aningaasat taakku Aronimut ernerinullu tunniutissavatit Israelikkut angajulliliaasa amerlanerussutaannik utertitsissutissatut.« v49 Taava Mosesip tiguai aningaasat Israelikkunni angajullilianut Levikkunnut naleqqiullutik amerlanerussutaasunut utertitsissutissat. v50 Taamaalilluni pissarsiarai sekelit 1.365-it, uuttuutit illernartuummi atorneqartartut uuttuutigalugit uuttukkat. v51 Naalakkallu peqqusinera malillugu aningaasat utertitsissutit Aronimut ernerinullu tunniuppai. Mosesi Naalakkap peqqusinera malillugu iliorpoq.