v1 Israelikkut Naalakkap isaani ajortumik iliulerput. Taava Naalakkap Midjanikkut assaannut tunniuppai, ukiunilu arfineq-marlunni v2 taakkua Israelikkut naalatsigaat. Midjanikkunnut ersigamik Israelikkut iluarsaappaat qimarngufissat qaqqaniittut, tassa qaarusuit pallittaalisallu qaqqaniittut. v3 Israelikkut naatitassanik siaruarteriniariaraangata Midjanikkut, Amalekikkut Kangiamiullu takkuttarput saassuttarlugillu. v4 Israelikkut nunaataat tammaarfigisarpaat nunamilu naatitat aserortertarlugit Gaza tikivillugu. Israelikkut inuussutissaannik sumilluunniit amiakkoqartitsineq ajorput – savamilluunniit ussimmilluunniit siutituumilluunniit naamerluinnaq. v5 Pillertarpassuartut amerlatigalutik tikiuttarput nersutaatitik nassarlugit tupilisarlutillu. Tamakku qatigattuujutaalluunniit kisissaanngillat. Midjanikkut sumulluunniit pigaangamik nuna suerutivittarpaat. v6 Midjanikkut Israelikkut piitsunngortilluinnarpaat. Taava Israelikkut Naalagaq torlorfigaat.
v7 Midjanikkut naalliutsitsinerat pillugu torlorfigimmanni v8 Naalakkap pruffiitimik aallartitsivigai, taannalu oqarpoq: »Ima oqarpoq Naalagaq Israelip Guutia: Egyptenimit majuartippassi inussiaataaffimmit anisillusi. v9 Egyptenimiunit inuiannillu ilissinnik qunutitsisunit tamanit aniguisippassi; ilissinnit qimaatippakka nunaallu ilissinnut tunniullugu. v10 Ima oqarfigaassi: Uanga tassaavunga Naalagaq Guutersi. Amorikkut najugaqarfigisasi guutii mianerissanngilasi. Kisianni naalakkumanngilassinga.«
v11 Taava Naalakkap inngilia tikiuppoq orpiullu egip ataanut ingilluni Oframi Joaship Abiezerikkuusup pigisaani. Tamatuma nalaani Gideoni Joaship ernera tunguiaaffimmi qajuusiassanik karrertaajaavoq karrit isumannaarniarlugit Midjanikkunnit tiguneqaqqunagit. v12 Naalakkap inngilia taassumunnga tikiuppoq oqarlunilu: »Naalakkap najorpaatit, sorsuttartuusutit qunusuitsoq!« v13 Gideoni akivoq: »Tusaannga, naalagaq! Naalakkap najorpatigut sooq perlunnik tamakkuninnga tamanik pisoqarsimava? Sooq tupinnartulianik siuaasatta oqaluttuarisartagaasa assinginik pisoqassaarpa? Siuaasavummi oqaluttuarput Naalakkap Egyptenimit anisikkaatik; maannali Naalakkap ajattorpaatigut Midjanikkullu assaannut tunniulluta.« v14 Taava Naalakkap Gideoni saallugu oqarfigaa: »Nukitit atorlugit Israelikkut Midjanikkut assaannit aniguisikkiartukkit! Uanga aallartitaraakkit.« v15 Gideoni akivoq: »Tusaannga, naalagaq! Qanoq ilillunga Israelikkut aniguisissinnaavakka? Eqqarlerisakka Manassekkunni nikanarnersaapput, uangalu ataatama inoqutaani nukarlersaavunga.« v16 Taava Naalakkap oqarfigaa: »Uanga najorumaarpakkit! Midjanikkut tamaviisa toqorassavatit.« v17 Gideoni oqarpoq: »Isinnut saammaannarsisimaguma taava nalunaaqutiliorit uppernarsarlugu illiusutit uannut oqaluttoq. v18 Maannga qimagutissanngilatit tunissutissannik tikiussereertinnanga taannalu ilinnut sassaatereertinnagu.« Naalagaq akivoq: »Uternissannut maani utaqqissaanga.«
v19 Gideonip angerlarluni savaasaaraq pilliutissaq piareersarpaa, qajuusanillu efamik ataatsimik tiguseriarluni seernarsaateqanngitsumik timiusaliorpoq. Neqi koorimut ikivaa suppaalu igamut kuillugu. Taava egip ataani issiasumukaappai. Tikiummagit v20 inngilip oqarfigaa: »Neqi timiusarlu seernarsaateqanngitsoq tigoriarlugit qaarsumut ilikkit suppalu taakkununnga kuillugu!« Gideoni taamaaliorpoq. v21 Taava Naalakkap inngiliata ajaappiaq tigumiani isatsippaa nuuanillu neqi timiusarlu seernarsaateqanngitsoq attorlugit. Innerlu qaarsumit anillappoq neqilu iffiugarlu ikuallallugit, Naalakkallu inngilia takussaajunnaarpoq. v22 Gideonip paasigamiuk takusani tassaasoq Naalakkap inngilia, oqarpoq: »Ila Guuti Naalagaq, Naalakkap inngilia kiinarsillugu takuara!« v23 Naalakkalli oqarfigaa: »Eqqissigit! Erseqinak, toqussanngilatit!« v24 Gideoni tamaani Naalakkamut pilliiviliorpoq atserlugu »Naalagaq eqqissisitsisuuvoq«. Pilliivik taanna ulloq manna tikillugu napavoq Oframi Abiezrikkut pigisaanni.
v25 Unnuaq taanna Naalagaq Gideonimut oqarpoq: »Ataatavit ussiutaasa ilaat, ussik inersimasoq arfineq-marlunnik ukiulik, tiguuk. Ataatavit Ba'alimut pilliiviutaa aserorteruk napasorlu Asheramut pigititaq sanianiittoq killorlugu. v26 Qattorngup qaarsuusup taassuma qaavani Naalakkamut Guutinnut pilliiviliussaatit najoqqutareqqusat malillugit. Taava ussik inersimasoq pilliutitut ikikkagassatut pilliutigissavat. Napasoq Asheramut pigititaq kipisat qisugissavat.«
v27 Gideoni inussiaatimi ilaat qulit peqatigalugit Naalakkap peqqusineratut iliorpoq. Ilaquttani illoqarfimmiullu angutitaat ersigigamigit ulluunerani suliassani naammassinianngilai unnuaaneranili taamaaliorluni. v28 Aqaguani ullaakkut illoqarfimmiut angutitaat makikkamik takuleramikku Ba'alimut pilliivik aserortersimasoq napasorlu Asheramut pigititaq sanianiittoq kipineqarsimasoq pilliiviliamilu nutaami ussik inersimasoq taanna pilliutigineqarsimasoq v29 imminnut oqarfigipput: »Kinaana taamaaliorsimasoq?«. Taava apersuipput paasiniaallutik tusarlugulu Gideoni Joaship ernera taamaaliorsimasoq. v30 Taava Joashimut oqarput: »Ernerit uatsinnut anisinniaruk! Toqunneqassaaq Ba'alimut pilliivik aserortersimagamiuk napasorlu Asheramut pigititaq sanianiittoq kipisimallugu.« v31 Joashilli eqqaminiittut tamaasa oqarfigai: »Ilumut Ba'ali illersorniarpisiuk? Ilumut annaanniarpisiuk? Taamaaliortoq qaalertinnagu toqussaaq. Ba'ali guutiuguni nammineq imminut illersorniarli, pilliivini aserorterneqarsimammat.« v32 Ulloq taanna Gideoni Jerubba'alimik atserpaat ima oqaramik: »Ba'ali nammineq taassumunnga pilliivimminik aserorterisumut akiuunniarli!«
v33 Midjanikkut, Amalekikkut Kangiamiullu tamarmik katersuupput. Jordanikkut ikaarput Jizre'elillu narsartaani tammaarlutik. v34 Taava Naalakkap anersaavata Gideoni ativaa. Gideoni sulluartaammik qarlortarpoq, Abiezrikkullu katersuuffigaat malillugulu. v35 Naggueqatini Manassekkut tamaasa tamanit qaaqqutippai. Taakku aamma ilannguffigaat. Taamatuttaaq Asheri, Zebuloni Naftalilu qaaqqutippai; taakkulu aggerput ilannguffigalugillu. v36 Gideoni Guutimut oqarpoq: »Oqarsimanerit malillugu Israelip aniguisinnissaanut atorumagumma v37 taava savap meqquinik maanga karrertaajaaffimmut ilisissaanga. Meqqut kisimik kanernermit isugutsersimassappata nunali eqqaanniittoq panerluni, taava ilisimalissavara Israelip aniguisinnissaanut atorumagimma, soorlu taama oqarsimasutit.« v38 Taamatullu pisoqarpoq. Gideonip aqaguani ullaakkut meqqut siggorpai, isugutsersimangaaramillu masaata puugutaasaq ulikkaarpaa. v39 Taava Guutimut oqarpoq: »Kamaanniaqinanga aamma oqaloqqilerama. Meqqut uku atorlugit misileeqqikkumagaluarpunga. Tamatumuuna meqqut panerilit nunalu eqqaanniittoq tamarmi kanernermit isugutsersimalluni.« v40 Unnuarlu taanna Guuti taamaaliorpoq. Meqqut kisiisa panersimatippai nunali eqqaanniittoq tamaat isugutsersimatillugu.