v1 Judap ajortuliai nalunaarsorsimapput allaammik saviminiusumik, allaammik diamantiusumik kigartorsimallutik uummataasa allaffissiaani pilliiviisalu nassuusaanni,
v2 ernerinut eqqaamaqqullugit pilliiviit napasullu Asheramut pigititat orpiit qorsuusut tamarmik ataanni qattunernilu tamani,
v3 qaqqani narsaatinilu.
Pisuussutitit erlinnartuutitillu tamaasa
nunanni tamarmi ujajagassanngortissavakka
unioqqutitsininnut akigitillugit.
v4 Taamaatittariaqassavat nuna
illit pigisassattut tunniussaraluara.
Akeqqavit inussiaataatut sulisissavakkit
nunami illit nalusanni,
kamannerami ikuallappoq,
ikumassaaq naassaanngitsumik.
v5 Ima oqarpoq Naalagaq:
Perloqqunarsili inuk inoqatiminik tatiginnittoq
inunnilu toqujasuni nukissarsiortoq
uummataali Naalakkamit nigortoq.
v6 Taanna orpikkatut inoqajuitsumiittutut ilissaaq
pilluaammillu misigisaqassanani;
najugaqassaaq inoqajuitsumi,
nunami tarajuusumi inuuffissaanngitsumi.
v7 Pilluaqqunarsili inuk Naalakkamik tatiginnittoq taassumanilu qimarnguffissarsiortoq.
v8 Taassuma assigissavaa orpik kuunnguup killingani ikkunneqarsimasoq,
sorlai kuunnguamut anngussimasut,
annilaangalissanngitsoq aasap kiassua nalliuppat,
uummaajuaannartunik pilutaqartoq,
ernumalissanngitsoq panernersuaqarnerani,
inerititaarutinngisaannassasorlu.
v9 Tamanit annerusumik uummat tatigisassaanngitsuuvoq.
Katsorsagassaanngilaq; Kiammi inuup uummammiugisai ilisimasinnaavai.
v10 Uanga, Naalagaq, uummatit misissuiffigisarpakka
tartullu misilittarlugit,
kinaluunniit pisassaanik pitikkumallugu
inuuserisaa suliaalu missiliuutigalugit.
v11 Assigaa aqissiusaq nammineq manniginngisaminik ivasoq,
peqquserlunnikkut pisuunngortittoq.
Inuuffigisami qiteqqunneranni pisuussutini qimaannartariaqarpai,
toqunerminilu paasinarsissaaq sianiitsuusimasoq.
v12 Illernartuutitta assigaa issiavissaarsuaq alutornartoq
pileqqaarneraniilli qutsissisitaasoq.
v13 Naalagaq tassa Israelip neriuutaa.
Ilinnik qimatsisut tamarmik kanngutsipput;
ilinnik tunussisut pujoralanni allanneqassapput,
Naalagaq, erngup uumanartup puilaffia, qimassimagamikku.
v14 Naalagaq, katsorsannga, taava aatsaat ajorunnaassaanga,
annaatinnga, taava aatsaat annaanneqassaanga;
illimmi tassaavutit erinalimmik unnersiutigisara.
v15 Maanna aperineqarpunga:
»Naalakkap oqaasii sumunuku pisut? Nalliunniarlit!«
v16 Ajunaarnissaq ilinnit qinnuuloorutiginngilara,
ulloq neriuuteqarfiunngitsoq kissaatigisarinngilara;
nalunngilat oqaatsit uanga qarlunnit anisut
ilinnut saqqumiinnartut.
v17 Uannut annilaarutissaaleqinak,
qimarnguffissarilakkit ullormi ajunaarfiusumi!
v18 Qinuginnitsikka pakatsilit, uangali pakatsissanngilanga,
taakku annilaartinneqarlit,
uangali annilaartinneqanngikkilanga.
Ulloq ajunaarfik taakkununnga nalliutitiguk,
sequmisikkit, sulilu sequmiseqqillugit!
v19 Naalakkap oqarfigaanga: Inissikkiartorit inuinnaat isaaffiannut Judap kunngiisa isertarfigalugulu anisarfiannut Jerusalemillu isaaffiinut tamanut v20 inuillu oqarfigalugit: »Tusarsigit Naalakkap oqaasii, ilissi Judap kunngii Judamiullu tamassi Jerusalemimiullu tamassi isaaffitsigut makkunuuna isertartusi! v21 Ima oqarpoq Naalagaq: Mianersoritsi ullormi sabbatimi Jerusalemip isaaffiisigut nammagaqarlusi isissannginnassi! v22 Ullormi sabbatimi illussinnit annississanngilasi. Sumilluunniit suliaqassanngilasi; ulloq sabbati illernartissavarsi, soorlu siuaasasi taama peqqusiffigigikka.« v23 Kisianni taakku naalanngillat tusaaniarnatillu, naalasseriippulli naalakkumanatik anusinngorumanatillu. v24 Ilissili naalakkumagussinga, oqarpoq Naalagaq, ullormi sabbatimi illoqarfiup matuma isaaffiisigut nammagaqarlusi isissanngilasi, ullorli taanna illernartissiuk suliffiginngilluinnarlugulu, v25 taava kunngit Daavip issiavissaarsuani issiasut naalagartatik Judamiullu Jerusalemimiullu ilagalugit illoqarfiup matuma isaaffiisigut isertassapput qamuteqarlutik hestinik qimuttulinnik, taavalu illoqarfik taanna naassaanngitsumik inunnit najugarineqassaaq. v26 Judamilu illoqarfinnit Jerusalemillu eqqaanit, Benjaminip nunaanit Nunallu Qattunilittaanit, Nunap Qaqqalittaanit Nunallu Kujasissortaanit aggissapput Naalakkallu illuanut aggiussissallutik pilliutissanik ikikkagassanik toqutassanillu, naatitanit pilliutissanik, tipigissaatinik pilliutissanillu qujaniutinik. v27 Kisianni ullup sabbatip illernartinneqarnissaanik ullormilu sabbatimi nammagaqarluni Jerusalemip isaaffiisigut iseqqusinnginninnik oqaatsikka naalakkumanngikkussigit taava Jerusalemip isaaffii ikuallassavakka, innerullu Jerusalemip illussaarsui nungutissavai, qaminneqanngisaannassaarlu.