v1 Jiisusip inuit takugamigit qaqqamut majuarpoq ingillunilu, ajoqersugaasalu ornippaat. v2 Taava oqalulerpoq ajoqersorlugillu:
v3 »Pilluarput anersaakkut piitsut,
taakkuami Qilaap Naalagaaffia pigaat.
v4 Pilluarput aliasuttut,
taakkumi tuppallersarneqassapput.
v5 Pilluarput qanilaartut,
taakkuami nunarsuaq kingornutissavaat.
v6 Pilluarput iluarnermut kaattut imerusuttullu,
taakkumi qaarsillartinneqassapput.
v7 Pilluarput nallittuisut,
taakkumi nallittorneqassapput.
v8 Pilluarput uummatimikkut minguitsuusut,
taakkuami Guuti takussavaat.
v9 Pilluarput eqqisseqatigiissitsisut,
taakkumi Guutip qitornaanik taaneqassapput.
v10 Pilluarput iluarneq pissutigalugu qinugineqartut,
taakkuami Qilaap naalagaaffia pigaat.
v11 Pilluarpusi ilissi uanga pillunga mitaatigippasi qinugalusilu tamanillu ajortunik oqaatigippasi sallullutik.
v12 Tipaatsugitsi nuannaarlusilu akissarsiassarsi qilanniittoq angeqimmat; taamatuttaarmi pruffiitit qinugisarpaat ilissi siunissigut.
v13 Ilissi nunap tarajoraasi, tarajorli kimeeruppat sumik taratserneqaqqissava? Allamut atorsinnaajunnaartarpoq igitassaannanngorluni inunnullu tullaarisassanngorluni. v14 Ilissi silarsuup qaamasoraasi. Illoqarfik qaqqap qaaniittoq isertorneqarsinnaanngilaq. v15 Naneruarluunniit ikissinnarlugu nappartap ataanut inissinneqarneq ajorpoq, qullilerfimmulli, illumiittunut tamanut qaammaqqutaaqqullugu. v16 Taamatuttaaq qaamasorsi qaamali inunnut, suliasi ajunngitsut taakkununnga takoqqullugit Ataatarsilu qilanniittoq unnersiutigeqqullugu.
v17 Isumaqaqinasi inatsisit pruffiitilluunniit atorunnaarsikkiartorlugit tikiuttunga. Tikiutinngilanga atorunnaarsitsiartorlunga, naammassisitsiartorlungali. v18 Ilumut oqarfigaassi: Qilak nunalu nungutsinnagit allanneq minnerpaaq titarninnguarluunniit ataaseq inatsisinit peerneqassanngilaq, pisussat tamarmik pereersinnagit. v19 Taamaattumik inassutit ilaannik minnerpaartaannilluunniit ataatsimik atorunnaarsitsisoq taamaalioqqusillunilu inunnik ajoqersuisoq Qilaap Naalagaaffiani minnertamik taaneqassaaq. Maleruaasorli taamaalioqqusillunilu ajoqersuisoq, taanna Qilaap Naalagaaffiani angisuujusumik taaneqassaaq. v20 Oqarfigaassimi: Iluarsusersi allakkanik ilisimasut farisiiarillu iluarsusiannit annerujussuunngippat Qilaap Naalagaaffianut isissanngilluinnarpusi.
v21 Tusarparsi siulisi ima oqarfigineqarsimasut: ›Inuassanngilatit‹, aamma: ›Inuartoq eqqartuussisunit pisuutinneqassaaq‹. v22 Uangali oqarfigaassi: Kinaluunniit qatanngumminut kamattoq eqqartuussisunit pisuutinneqassaaq. Qatanngumminullu oqartoq: Raka! Killisiuisoqatigiinnit pisuutinneqassaaq. Oqartorli: Sianiitsoq! Anniarfiup inneranut eqqartuunneqassaaq. v23 Taamaattumik tunissutissat pilliivimmukaakkukku tassanilu eqqaalerlugu qatanngutit illit pillutit unnerluussutissaqartoq, v24 taava tunissutissat pilliivimmut qimallugu qatanngutit saammaakkiartoqqaarallaak, taavalu aatsaat kingorna tunissutissat pilliutigiartorlugu. v25 Eqqartuussinermi akerlerisat aqqutaani ingerlaqatigitillugu isumaqatigilipallanniaruk, taassuma tunniuteqinammatit eqqartuussisumut eqqartuussisullu parnaarussanik paarsisumut taamalu parnaarussaatillutit. v26 Ilumut oqarfigaakkit: Tassannga iperagaassanngilatit aningaasannguaq akiligassavit nunngutaat akilereertinnagu.
v27 Tusarparsi oqartoqarsimasoq: ›Allasiussanngilatit.‹ v28 Uangali oqarfigaassi: Kialuunniit allap nulia pilerigalugu isigiguniuk taanna uummatimigut allasiorfigereerpaa. v29 Isivit talerpiup tammartippatit, peeruk igillugulu. Ilinnummi pitsaaneruvoq timinni avativit ilaat ataaseq annaassallugu timivit tamarmiusup Anniarfimmut iginneqarnissaanit. v30 Talerpippit tammartippatit, kipiuk igillugulu. Ilinnummi pitsaaneruvoq avativit ilaat ataaseq annaassallugu timivit tamarmiusup Anniarfimmut pinissaanit.
v31 Oqartoqarsimavoq: ›Nuliaminik avittup allakkanik avissutinik tunissavaa.‹ v32 Uangali oqarfigaassi: Kinaluunniit kinguaassiuutitigut inuunerlunnerunngitsumik peqquteqarluni nuliaminik avittoq, taanna nuliami allasiorfigineqarneranut pisuuvoq, avitamillu nuliartoq allasiorpoq.
v33 Aamma tusarparsi siulisi oqarfigineqarsimasut: ›Sallullutit uppernarsaassanngilatit‹, aamma: ›Naalakkamut uppernarsaallutit neriorsuutigisatit naammassissavatit‹. v34 Uangali oqarfigaassi: Uppernarsaassanngilluinnarpusi qilak naqqissigalugu taanna Guutip issiavissaarsuarimmagu, v35 nunaluunniit naqqissigalugu taanna isigaasa tummarfigimmassuk, Jerusalemiluunniit naqqissigalugu taanna kunngersuup illoqarfigimmagu. v36 Niaqqulluunniit naqqissigalugu uppernarsaassanngilatit nujaq ataasiinnarluunniit qaqortitissinnaannginnakku qernertitissinnaanaguluunniit. v37 Angernersi imaassaaq: Aap, naaggaarnersilu: Naagga. Taakkununnga ilanngunneqartut ajortumit pipput.
v38 Tusarparsi oqartoqarsimasoq: ›Isi isimik naleqartinneqassaaq, kigullu kigummik.‹ v39 Uangali oqarfigaassi: Ajortumik pinninniartumut akersuuteqinasi. Kialuunniilli ulussakkut talerperlikkut isappatit illuattaaq maniuk. v40 Eqqartuussisutigut ilupaannik arsaarniarneqaruit, qallersaatittaaq tunniuguk. v41 Kialuunniillu miili ataaseq ingerlaqatigeqqulluni pinngitsaaliniarpatit miilit marluk ingerlaqatigiuk. v42 Ilinnit qinusoq tuniuk, sumiginnaqinagulu ilinnit atorniartoq.
v43 Tusarparsi oqartoqarsimasoq: ›Tullit asassavat akeqqallu uumissorlugu.‹ v44 Uangali oqarfigaassi: Akeqqasi asasigit, ilissinnillu qinuginnittut qinnussigit v45 Ataatassinnut qilanniitumut qitornaaqqullusi; taassumammi seqerni ajortunut ajunngitsunullu nueqqusarpaa siallersitsisarlunilu iluartunut iluaatsunullu. v46 Ilissinnimmi asannittut kisiisa asagussigit, taava suna akissarsiarissasoraasiuk? Ilanngaaserisuttaaq taamaaliortarput. v47 Qatanngutisimi kisiisa inussiarnisaarfigigussigit, taava sumik immikkooruteqartumik iliuuseqarpisi? Guutimik nalusuttaaq taamaaliortarput. v48 Taamaattumik ilissi iluarluinnaritsi, soorlu Ataatarsi qilammiittoq iluarluinnartuusoq.